Vanhnuaithata Lungdawh

Lal ropui Liankhama Sailo Vangtea a awm laiin, a fapa naupang Vanhnuaithata chu a chan hlauh mai a. Vanhnuaithata kuang chu a ur a, a ruh rote Khawdungsei lamah a keng ta zel a. Vanhnuaithata thihna Vangteah tihian a pualin Lungdawh a siam ta a. Hei hi Vanhnuaithata Lungdawh tih a ni a. Vangte hi tuna Phullen dai a awm hi a ni.

Advertisements

Ka pu Lalsiamliana hming hi kan lal Awksarala phuah a ni

Ka pu B. Siamliana hming hi Phullen lal Awksarala Sailo phuah a ni a. Hman lai huna hming phuah chungchanga lalte leh miliante an zahin, hming ropui leh hming chapo, lalte ngaih huat palh theih thilah mite an fimkhur teh lul nen, ka pu erawh kan lalte ngeiin hming chhuanawm tak an lo phuahsak hi ka ngai hlu em a. An phuah chhan ni a ka pute min hrilh dan hi kan tarlang ve ang e.

Khandaih lal Vanphunga Sailo te leh ka pu B.Siamliana te hi pute atang tawhin inngheng hnai tak an ni a. B. Siamliana te pu hriat theih hla ber chu Pu Chalchima Bawihtlung a ni a. Chalchima hi tuna Phullen rama Chalchima Tui hming put chhan hi a ni. Chalchima kha lal ina seilian a ni a. A hleitlingin, a pumrua leh a hmelte a tha a, a lo fel ve viau mai a. Lal chhungkaw zinga tel ve ta chu lal fapa ang maiin a awm zui ta a.

Chalchima chu a lo puitling a, mite pawhin an zah hle a, indo leh ralrun nikhuaah pawh a huaisenin salte a hawn nual avangin lal chuan a chawimawi hle a. Chhak leh thlang indo lai a niin, khaw khat pasaltha huai ve ve thu inhmu lo palhah pawh, an tawp mai thei lo a, Chalchiman ngawi tura an tih meuh chuan, pasaltha huaisente pawh an kimki dak niin Pu C.Nundanga (Pu Hrangsaipuia fapa, Khandaih) khan min hrilh nghe nghe.

A hnu zelah Pu Chalchima tu leh fate chu lal tan mi tangkai tak an ni zui zel a. Pu Siamliana pu Lalbonga pawh chu Khandaih lal Vanphunga Sailo khawnbawl upa min a ni leh a. Lalbonga kha Vanphunga Sailo khan kum 1906 ah Luangpawn ah khua a din tir a, Lalbonga chu a awp tir nghal a. (Hei hi Sangalkhawng angin nge lal puitling tak tak angin ka hre mai lo, Mahse Luangpawn lal hmasa leh khaw dintu chu Lalbonga tih a ni – Buata)

Chutiang chuan Vanphunga pawh khan, B.Siamliana pu kha a fapa ang maiin tlang hran a lo chan tir ve hial a ni. Mahse Lalbonga chuan lal nih nuam a ti lo a, Vanphunga hnenah a fapa lal tir zawk turin a ngen a. Hei hi British lo luh hnu a ni a, lal ho inhmuhkhawm nikhuaah Sailo lal ni ve ta chiah lo ta chu, lal dangte lakah nuam a ti lo a ni mai thei. A ngenna chu Vanphunga hian a tihhlawhtlinsak dawn loh chuan Sihfa ah Thangkaman Upa atan a sawm ve rengna chu chhan mai a duh thu a thlen hial a. Tichuan Pu Lalbuaia Sailo, Vanbawnga awm mek chu Luangpawnah lal atan Vanphunga Sailo chuan a dah ta a (Source Ngurthankima Sailo, Pu Lalbuaia tupa)  Luangpawnah hian hun engemaw chen chu Lalbonga hi lala awmin, Vanphunga lalram tan dai do ah a ṭang ve a ni. Lalbuaia lala a awm tak hnuah pawh lal upa tangkai tak a ni zui zel bawk a.

Chutiangin Lalbonga fate Thanghrima te pawh chu lal te nen an inngheng hnai viau zel a.  Lal chhungkua te pawh chuan, Chalchima tu leh fa, Lalbonga, Thanghrima etc te chu duhsak takin…. “Anni hi lal te tiropuitu leh siamliantu ṭangkai an ni e”  tiin Luangpawna a khawnbawl upa Thanghriman fapa a neih khan a hmingah LALSIAMLIANA tiin Phullen lal Pu AWKSARALA khan Phullen aṭangin a han phuahsak a ni. Lalsiamliana tih chu a hming pum ni mahse, tun hnuah B. Siamliana tiin hriat zui a ni.

Khatih laia kan lalte ropuina leh an lenna kha, ka Pu Siamliana te vang chu a ni tak tak hauh lo ang a. Mahse kan Lal ten hetiang hming ropui tak an phuahsak phal hi a lawmawm ka ti tak zet a. Kan lalte thilphalna hi ka ngaihluin, a ropui ka ti tak zet a, ka pu hming LALSIAMLIANA tih hi ka chhuang hle a ni.

 

Buata Bawihtlung
Date |12.052018I10:57PM

 

Zan 2 riakin kan khuaah – Tuivai, Khawhlui etc kan tlawh

May ni 2, 2018 Wednesday khan Phullen Historical Society ten kan hmachhawp Documentary (Film) siam turin Chawlh la meuhin ṭhiante Aizawl aṭangin Phullenah kan haw chho a. Documentary (film) tawi siam kan tum a.

Thlen zan aṭangin ruah sur mahse, awngṭaina nen ruahmanna kan siam zui zel tho a. Kan tih tur zinga langsar tak Khandaih pahoin kum 1906 a Tuivai luia Sangha Tlangvuak an neihna a Harhna lo thleng lem chan kha a ni a. Sangha kg 20 vel Bazar ami kan lei a, Tuivai Lui, Lisei hnarah Sangha Tlangvuak lem chu kan chang ta a.

A tukah khaw hmun hlui, Khandaih, Pengṭhuamthum, Lal Awksarala thlan leh kan khaw chhung hmun hrang hrangte kan tlawh a, lung a leng duh ngei mai.

 

SA LOAH CHUAN TUI BER MAI

SA LOAH CHUAN TUI BER MAI
-Saithangpuia Sailo, Dek Party

Chhang ei tur kan va duh tak em,
Chhang ei lo val kan riang chuang e,
Ei mah ila kan chak leh si;
Zaikung nu I deng dawn lawm ni.

Tuibur chu Tuibur a ni a,
Kurtai pawh kurtai a ni a;
Chhang zawng chhang a ni na ngei e,
Sa loah chuan tui ber mai tui ber mai.

Chhang deng leh deng lo I hriat duh chuan,
An sum kotlang en zel mai rawh;
Chutah a lo pawt phawt chuanin,
Tihdan I hre thiam mai lawm ni.

Chhang dengin in hriatreng tur chu,
In ei hmain ngaihtuah ula;
Mizo Army’n an duh em kha,
Khawnge I ko the ang tiin.

Chhang ei tur kan tawn chang chuanin
Manager in an siam vel a,
Chutah Kurtai an han thet a,
Kan hmeh belhbawm kan chhawk hmawk thin

Chhang ei tura kan khuk ruai hi,
A nuamin ava nuam take m!
Chawlhni a chhang ei loh hi chuan,
Kan chak lutuk kan khusun thin.