Zoram Tluana Mi riangvai Thangteeka

 

Thangteeka Phullen

Thangteeka hi rualban lo, chhungkhat laina sawi tur pawh nei lo, ringvai a ni a. A nu leh pa hming takngial pawh a hre lo a. A pian kum chu Thli chhe tleh kum a ni.

 Amah hi Piangsual, ke lek lam deuh a nih avangin a thatlai deuh pawhin kal pangngaiin a kal hlei thei lova. A kawng kal hi tlan deuh reuhin a petek euh euh thin a ni. Tum khat chu Aizawl ah miin Pheikhawk an lo pe a, a Pheikhawk thar bun chuan Durtlang lamah a kal ta a. Durtlang a thlen chuan a Pheikhawk thar chu a chhip a pawp hman tawh a ni.  Ratu lam tlangdung a zin tum pawhin, kawng lakah Sakei nen an in tawk hlauh mai a. Sakei chu kawrah a zuang lut ta daih a, Thangteeka chuan a hlau lutuk petek chuan Sakei zuan luhnaah tak a petek lut ve a ni awm a, tun thlengin Thangteeka leh Sakei zuan thlakna tiin an la sawi a ni.  Chutianga ke dik lo chu a ni a, a lainatawm hle.

Chutiang a ni chunga kawng mumal lo leh fur khaw chhe karah pawh, khaw hrang hrang a tlawh kual reng tho a. Mi ten mak an ti hle thin a, Sapuiin a hruai thin a nihte an ring hial thin. Hmun thenkhatah chuan naupang ten an lo chhaih nawmnah chang a tam a, chutih rualin, amah lainata, duhsaktu pawh a tawng ve zel bawk. Phullen pawh a lo tlawh ve tawh thin a ni ngei ang Khawnbawl Upa Pu Hrangphunga, Pu Tlanhnuna pa te nen an in hre tha hle a, tin Pu Khuanghnuna pi (a nu nu)  Pi Tlingzovi te nen pawh an in hre hle a ni.

 Chutianga khaw hrang hranga a awm kual hnu chuan Phullen chu nuam a ti hle a ni ang, Phullen a thih a, Phullen a lunghah a duh thu a sawi a. Phullen tlangval leh pa ho chuan Chhawrtui atangin Changzawl lamah kalpuiin, Phullen ah an zawn haw ta a. A pualin Lailak veng, Pu Hmingthanga In bulah a In tur an sak sak a. Tah chuan awm ve in, khawtlang mipui ten Buhfai te an khawn khawm sak a, eitur an pe thin a. Chhawrtui khua ah hian miin coat an lo pe a. Chu coat chu a buang, fual lam deuh a ni nghe nghe a.  Chu a coat dawn chu ama mamawh lei nan pawisa a chantir kha tha zawkin an hriatsak a, Hmun hlui veng a mi Pu Chawngkhuma (Pu Kaphlira patea) chuan Rs 20 (sawmhnih) laiin an lei chhawn sak ta a ni.

 A pian dik tawk lo vang hian a mu te hi thawh a harsat a.  A upat deuh hnu phei chuan kal a harsat zual a, tlangval hovin an riahpui thin a ni. Vawikhat chu, Pu Ralzinga leh Pu Lalbuanga (Rammawii pasal) ten an riahpui a. Zan ah a zun a chhuak ta, a tho mai thei si lo, “Tlangval te u, ka zun a chhuak e” a ti a. A riahpuitute kha an lo mutui deuh a ni ang, an hre thei si lo. Kawmchhak pa Pu Awrhchunga (Pu Hmingthanga pa) chuan a lo hria a, a zuk kai tho ta a ni awm e. Chutiang chuan thenawm khawveng nula tlangval ten an ngaihsak hle a ni.

 Thangteeka hian Kohhran a belbul hle a. Kohhran mi tak a nih vangin Kohhranin a ngaihsak em em a, chaw petu turte, riahpui turte Kohhran inkhawm a thulh ngai lo a ni. Mahse a ke dik loh deuh vangin a kal tha thei vak lo va. Tlangval hovin a inkhawm turte hi an zak zeh a, an kalpui nawl nawl thin. Biak In ah pawh Pulpit hnung lam deuh ah chuan thutna chuam bik a nei a, a thlen tlai pawhin chulai chu a pan vang vang thin. Khawi ah leh lehkha a zir hriat a ni lo va, mahse lehkha a chhiar thiam a. Bible hi a kawl reng thin a, a Bible chhiar erawh a awmzia hriat fiah hleih theih a ni lo.

 Chutianga hun a hman hnu chuan, kum 1947 October ni 23, Nilaithawhtan khan chatuan ram a pan ta a. Thangteeka thih ni hian, mak tak maiin, khua a chhe nasa hle a. Thli a tleh hum hum a, nasa taka ruah surin, khua a cheng a, a hrehawm hle a. A thlan hi hmunhlui thlanmual ah, tuna Bung lianpui chhak lawk, Zangchhiaa (Lalbeli pa) thlan bulah an laih sak a. Tlangval thlan lai tan pawh Thlan khur pawna awm kha a hrehawmin taimak leh tlawmngaihna zawkah ngaih hial khawpin khua a chhia a ni. He a thih ni a thli tleh hi Tualbung velah a na zual a, Kawlthei hnah leh thing hnah dangte, phaitual hnim chenin a chhem fi thulh nghe nghe.

 Hmunhlui thlanmuala phum a nih bakah, Phullen tlangval leh pahote chuan Thangteeka pual hian Lungdawh tha tak siam sak an tum a. Nula leh tlangval ten Thangteeka lung dawh tur hi Hmunhlui lam Khiangkarkah thlen hma Tuitai mawng ami an la a, phur tak leh hlim takin an zawn haw a, an haw haw hulh hulh a ni awm e. A thlan lunga thu ziak dah tur pawh tha tak a siam an duh a. Upa Zalawra (Sande Sikul lama mi lar tak) Mission veng chuan  “in duh angin a thu rawn ziak ula, phai ah ka lo thawn ang e” a ti a. YMA in Thlana ziak tur thu a thawn chu Pu Zalawra khan kimchang deuh hret turin a lo tidanglam hret a.  Tichuan Culcutta ah a thawn ta a, a thu ziak chu thir phekah reh thei lo turin thil var phum hmangin tha takin an ziak a ni.

 Tichuan a thih atanga kum khat hnu, kum 1948 khan Phullen YMA chuan nalh leh mawi takin, Phullen Kawn atanga Aizawl lam panna kawngpui kam, hnai te ah chuan Thangteeka Hriatrengna Lungdawh tha tak chu an siam ta a. He lungdawh hi lal Awksarala thlan tih loh ah chuan a hun laia Phullen lung dawh tha ber a chhal theih a ni ang.  Thangteeka Lungdawh ah chuan a hnuaia thu ang hian ziah a ni a, a laiah Kros lem mawi tak ziah lan a ni bawk –

 

ZORAM TLUANA MI RIANGVAI
THANGTEEKA
KUM 76, THIH NI : 23.10.’47

 Kuta sak loh chatuan In chu
A tan buatsaih a ni.

 LUNG PHUNSAKTU:-
PHULLEN
YOUNG MIZO ASSOCIATION
(Y.M.A 1948)

 Khaw hlui atangin khaw hnuai lamah, motor kawngpui kal awlsamna lamah insawn a nih takah khan khaw hlui chu ramngaw a lo nit a a. Thangteek Lungdawh pawh chu Motor kawngpui kam Serzawl-Kawn, tuna YMA Ram an tih tak ah sawn a nit a a. (Thangteeka Lungdawh sawn a ni hi ka ui tak zet – Buata)

A pian kum hi Thlichhe tleh kum tih a ni a. Thli chhe tleh kum chu 1876 a ni a. Mahse a Lungdawh ah chuan kum 76 mi niin ni 23.10.1947 ah a thi tih ziah a ni a.  Thli chhe tleh kum a piang a nih chuan kum 72 mi ni awm tak a ni. Thlan lung phuntu Phullen Branch YMA te hian Thli chhe tleh kum hi an hai nge a kum zat hi an chhut sual palh zawk tih chu hriat mai a harsa deuh.

 

Buata Bawihtlung
Dt. 6th July, 2017

*******************

Advertisements

Mawmrang Tlang huai lal Sahmula

Kan pi leh pu te atangin Ramhuai chi hrang hrang an sawi kan hre awm e. Ramhuai zingah hian mihringte tina thin leh nunna hial laksak thin an awm laiin, Ramhuai fel tak tak, mihringte malsawmna pe thinte pawh an awm bawk.

Mizo pi leh pu ten Ramhuai an sawi thin hrang hrangte chu, a vai chuan kan sawi seng lo vang a. Ramhuai tam tak zingah Lasi, Khuavang, Maimi, Tau, Khawhring, Phung, Chawm leh Huai te hi hriat an hlawh viau. Huai kan tihte pawh hi Tui huai, Tlang huai, Sih huai, Bung huai te an awm ve leh bawk a.

Tlang huai zawng zawng zingah Mawmrang tlang huai lalpa Sahmula chu lal ber, thu ber leh huai ber ah kan pi leh put e khan an ngai a. Ramhuai lal in a thut ni a sawi Tlang te chu – Mawmrang tlang te, Reiek tlang te, Chhawrpial tlang te, Khawbawn tlang te, Pukzing tlang te niin an sawi.  

Mawmrang tlang hi Aizawl atanga hmar chhak lam 150 kms velah a awm a. Mawmrang chhim lam tlang chhip ah hian Lungpui tohlawt lianpui, fai vuk mai hi a a awm a. Chumi chung zawl chu thing leh mau te to lovin phul te a awm a, a fai nuam hle a. Chulai chu Mawmrang tlang huai lal Sahmula tualchaina niin an ngai a, Sahmula Tual tih a ni.

Sahmula pa hi Sabereka a ni a, Sabereka pa chu Beilebuta a ni a, Belebuta pa chu Tuanlehmanga ni a sawi a ni. Sahmula hian fanu hmeltha em em mai, sawisel bo khawp a tha a nei a, a hming chu Lengthuampuii a ni awm e. Sahmula hi a lal hle a, ramhuai dangten an zahin an hlau hle a ni.

Sahmula hi Mihringte hnenah malsawmna pe theitu ah ngaih a ni a, chuvangin tihlungawi loh an hlau hle thin a, lal leh Upate, Sadawt te, Thirdeng te leh Upamin ten khua atanga chhuakin khun khan takin an be thin. Sahmula an biak dawn hian Mawmrang lan theihnaah Maicham an siam a, Mawmrang tlang lan theih lohna ah pawh, a lam hawi talin an be thin. Mawmrang tlang lal Sahmula an biakna a Sadawtin Thiam Hla an chham thin chu –

Hm…Hm…Hm..
Chibai, Chibai, Chibai..
Kan hlan e, kan hlan e, kan pu Sahmula kan hlan e.
Kan Ar hluingo kan hlan e
Lengthuampuii kan hlan e, Kelchal hmai tluak kan hlan e.
Kan dil e, kan dil e, Mal sawm mal za kan dil e
Sawmfang mal za kan dil e.
Sa tin mal za kan dil e, a lian tha tha kan dil e
Mi lu, sa lu lawi nan kan dil e.
Chhang ang, chhang ang, kan pu Sahmulan chhang ang.
Lengthuampuiin chhang ang, Maltin sawmin chhang ang.
Sawmfang malzain chhang ang,
Mi lu sa lu tamin chhang a,Thing dam chenin chhang ang,
Ngalfim khup bihin chhang ang.
Pi biakin lo chhang ang che, Pu biakin lo chhang ang che.
A chhang ngaiin lo chhang ang che…..

Hetianga Sahmula an biak naah hian, chaw fun nen kalin, hlum a an siam – Milim te, Darbu thum te, Se lem (sawm) te, Darkhuangte, Bing leh Haite ten en, Ar ngo leh Tui te paiin an kal a. Maichamah chuan Milim, Darkhuang, Darbu, Se lem te chu Mawmrang lam hawiin an dah tlar thin a ni. Tin, Sahmula fanu Lengthuampuii pualin Kel chal lim an hlan tel thin bawk. Sahmula an biak lai hian, khaw mipuite pawh pawn chhuak lovin an lo inkharkhip tlat thin. Vanbawng khaw ram a Tlang pakhat pawh, tun thlengin “Sahmula biakna tlang” an la ti a ni.

Sahmula hi a lalin chanchin a ngah hle a. Hmanlai hian Reiek tlang huai hote chu, an lalnu Khawluahlali hovin Tlawng huai nena an  indo zo, hnehna lawmin chawng an chen a, an lam mup mup a. Chutih lai tak chuan thlang lam atangin Chhawrpial  Tlang huai ho chuan Reiek huai ho chu run an tum a. Reiek thuai ho awmna lungpui lian tak takte chu tih chim vek tumin a rukin an bei ta tluk tluk a. Chu chu Belkhai Tlang huai chuan a lo hre khiau a, Reiek Tlang huaite chu a khawngaih a, a hrilh ta a.

Chutia an chawngchen hlim laia an awmna Lungpui kar chim vek tuma Chhawrpial tlang huai ten an lo bei chu an thin a rim a, Reiek huai ho chu Sialsir ah changing an thlawk chhuak a. Chhawrpial huai ho nen chuan vansang indona rapthlak tak mai chu an nei ta a. Thisen nasa takin a far a, Lu bung leh thla tliakin an tla a, an let rem rum a. Reiek Tlang huai lalfanu Darthaikawii pawhin nunna a chan phah a. An sal mante hnanga an phuar theih loh nan tiin Belkhai huai ho chuan chu lai Mau ho chu a chang vet chhuak chiatin mit a neih tir vek a. Hei hi tun thlengin a la ni zui zel a ni awm e.

Chu indona rapthlak tak chu tlang huai lal ber Mawmrang tlang huai Sahmula chuan a lo hre ta a, tha a ti lo hle a, tawp turin a ti a. Mahse an indo nasa mai si a, an tawp mai thei lo va. Chutah Samula ngaihdan a ni ta lo va, Reiek tlang leh Chhawrpial tlang te chu a sai ta dum dum a, a hek huai nghe nghe a ni awm e. Chutia Sahmula a thinrim tih an hriat chuan, Reiek tlang huai leh Chhawrpial tlang huaite chu an indo chhunzawm ngam ta lo va, an tawp san ta a ni an ti.

Mawmrang tlang atanga hla vak lo Phullen leh Buhban inrina bul ah hian Lungleng kham a awm a, a bulah Tuivawl lui a luang bawk a. Zawngin ram ah hian Puk huai lalpa Melmula a awm a, Zawngin nula hmeltha Siami chu neih tumin a rim thin a ni awm e.  Tumkhat chu, Lungleng kham Huai ten Tuivawl tiau pho a an fate Ni lum ai tira an pho chu, Zawngin khaw pasaltha ramvak ten an rah hlum sak hlauh mai a. Lungleng kham huai te chu an thin a rim ta em em a. Phuba lak ngei duhin, mihringte chu tihlum ve ngei an tum a.

Lungleng kham huai te chuan Puk huai lalpa Melmula chu an berawn hmasa ta a. Melmula chuan, “e Mihringte thih leh dam thu te chu, keia rel theih rual a ni lo ve, Mawmrang tlang huai lal Sahmula rawn zawk rawh u” tiin a lo hrilh a. Sahmula chu an pan ta a.

Mawmrang tlang huai Sahmula chuan, Lungleng kham huaiho henah chuan, “mihringte hmuh theih lohin in insiam a, an kalna tur takah infate in pho bawk si a, an rah hlum mail oh nakah. Mihringte thiam loh pawh a ni lo, in fimkhur loh vang zawk a ni” a ti a. Lungleng kham huaite chuan Sahmula chu an hlau hle a, mihringte chungah phuba lak an tum pawh chu ti ngam ta lo a ni awm e.

Hetiang hian ramhuite chanchin hi sawi tur tam tak a awm a. Mawmrang tlang huai lal Sahmula hian chanchin a ngah hle a ni. Sahmula tual bul velah hian Purun a awm a. Chu chu tuna Mizo purun ang hi a ni a, chu chu Sahmula purun an ti thin. Tin, Sahmula tualah hian Zawhte ki nei a awm a, a hmu apiang chu an thi zel thin niin an sawi thin bawk.  

    Mizoram a Kristianna a lo luh hlim deuh 1903-ah Mawmrang Tlang bul Vanphunga khua Khandaih (Tuna Phullen ni ta) ah hian Kristianna a lo lut ve a. Sikul te dinin Kristian an pung zel a. Kum 1906 ah Khandaih khuaah chuan hri a leng ta hlauh mai a. Tui hri a ni awm e. Hei hi Kristian lote chuan Kristian te vanga lo thlengah an ngai tlat a. Kristian ten Ramhuai lal Sahmula an ti thinur niin an ngai a ni. Zosapte leh Sorkar lam ten hrileng tih reh tuma Tuikhura damdawi an phul te chu hre thiam lovin, Kristian te hian min hrai hlum an tum a ni ang tiin khaw thar kai an rel phah hial a ni.

Heng ramhuai te leh an chanchinte  hi a thawnthu viau na a, kan pi leh pute atanga an rindan leh an hriat dan an inhrilh chhawn zel a ni a. Kan awih emaw awih lo emaw, a ngaihnawm bakah a hlu ve riau.

Biakrawn leh Thu laknate:
1. Pu K. Zawla
2. Pu B. Ngurchhawna
3. Pu R. Chaldailova
4. Pu V. Vanthuampuia

Buata Bawihtlung
9862035204, buata.tkt@gmail.com

************

Thlanpial – mitthite thlarau kalkawng ka

THLANPIAL

IMG-20170625-WA0023

IMG-20170625-WA0017

Mizorama Kristianna lo luh hma a kan pi leh pute khan thih hnu thlarau khawvel kha rin dan mumal tak an nei a. Mitthi khua leh Pialral te an ti a. Thih hnuah Thlarau chu chutah chuan a kal niin an ngai a ni.

Mitthi thlarau chu a Ludip atanga chhuakin, Tungchaw a zawh a, Khanchhukah a phei zel a, Liangah kal zelin Kawmchar lam atangin Ditipah a chhuak a, tichuan Rihdil panin a kal ta thin niin an ngai. Mitthi thlaraute hian Rih dil an panna kawngah hian THLANPIAL an paltlang thin niin an ngai a. Thlanpial, Thlanpial kawt, Thlanpial pûk ti tein an sawi thin.

THLANPIAL chu awih pang, lungpui kara kalkhân awm a ni ber a. Hmar lam hawia kalin ding lam chu Lung bang, pûk ang lek lek a ni a. Mitthi an awmin chulai Lung bangah chuan thai rin a lo awm thar ziah thin a. Mitthi thlarau thai rân niin an ngai a, Hmeichhe thlarauin a Thir khai a a thai niin an ngai deuh ber.

Thenkhat chuan, tun thlengin a la râng thar zel thin niin an sawi a. Mahse, thai rânna hi a tam tawh em avang leh helai tlawh tuten an thar belh ve ni a ngaih theih a tam a, tun thlenga mitthi an awm a thai ran thar a awm leh awm loh chu finfiah mai a har deuh.

Mitthi thlarau chu kal zelin tlang pakhat mihring, nungdama la awmte fiah taka an lan theihna hmun an thleng a, chu chu Hringlang tlang an ti a. Lungleng a tap zawih zawih chungin an rawn thlir let thin a ni. Chu tlângah chuan tui fim tak a awm a, an tap nasa, dangro tuihal chuan chu tui chu an in a, an lunglenna chu a reh ta vek mai thin a, a hmingah pawh Lungloh Tui an ti a.

Tin, chulai velah chuan Pangpar mawi tak a lo vul chûk mai a, chu pangpar chu a thliah a an tawn chuan minung ram lam an hawi kir thei ta lo a, a pangpar hmingah Hawilopar an vuah a ni.

Tichuan kal zelin Pawla kawt  Zingvanzawl an tih mai chu an thleng a. Hei hi Mitthi khua leh Pialral kawtchhuah a ni. Pawla chu Sairawkherh nen chulaiah chuan a lo awm thin a, mitthi khua leh Pialral a kal tur, chulai rawn paltlangtute chu a lo sai thin a ni awm e.

THLANPIAL lam kha chhunzawm leh lawk ila. Thlanpial hi, tuna Mizoram hmar lam, Tuivai lui leh Tuivawl luiin a kar cheh, Manipur ramri hrul a awm a ni a. Thlanpial hi Vanbawng ram, tuna N.Khawlek khaw ram chhunga awm a ni a. British hunlai khan, Khandaih lal Vanphunga lal ram a ni.

Thlanpial awmna N.Khawlek ah hian 1901 khan Hrangchhunga a lal a, mahse an insawn kual thin a. Bawrhsap Hazlett khan Khandaih lal Vanphunga Sailo chu a tlawh a. A tira Kristian dodaltu Vanphunga chuan, rin loh deuhin a lo dawngsawng tha viau mai a. Lawmthu sawi nan Bawrhsap chuan Vanphunga chu Khandaih atanga THLANPIAL ram thleng hian a pe ta a.

Vanphunga sailo chuan kum 1910-ah Vanbawngah Bawk a khawh a, kum 1911-ah a kai a. A fapa Liankiauva chu lal ah a thut tir zui a. Kum 1926 ah Bawrhsap Parry-a thupek angin Vanbawng atangin N.Khawlekah an insuan a, mahse a tam zawk chu Vanbawngah an let leh a, tun thlengin N.Khawlek leh Vanbawng ah hian an awm zui ta a ni.

Vanbawng ram Vawkte lungkawnah hian Vanphunga Lungdawh a awm a, chu Lungdawh ah chuan tihian a inziak-

Vanbawng ram hi a za in Hezlett

Bawrhsapin ka thlahte thleng a

Rochun turin min pe

Phun ni

22 March 1917           Vanphunga

 

Thlanpial hmun hi Mitthi thlarau ten an tlawh ngei tih an rinna tizualtu thawnthu pakhat, N Khawlek pa, pa fel tak Pu Valtea sawi dan hi kan zep tel leh lawk –

Tumkhat chu Pasaltha Tlangchhunga, Suangpuilawn lam mi chu Rungdil kam velah a ramvak a. Tuivawl dung chu a zawh thla zel a. Thlanpial ram khamah lawn chhovin, Thlanpial kawt a thlen chuan khua a thim ta si a, chutah chuan a riak ta a. Zanah chuan mihring thawm a hre ta a, a’n ngaithla chiang a, a nupui tawng ni ngeiin a hria a, a lo châng ta a. Tumah a hmu thei lo a, mahse a nupuiin tawng bawrh bawrh paha a zawn a lo thlen chuan a kuah ta thut a, a chelh ta tlat a.

A nupui chuan, “E khai, min thlah rawh, mitthi leh minungte chu awm kawp thei kan ni tawh hlei nem. Naupang lah engmah ka hrilh si lo a, kan Bellam chhunga Sarep ka dahte kha naupang ka hrilh bawk si lo” a ti a. A pasal Tlangchhunga chuan a thlah ta a. A ngaih tha lo chu, khua a var ve leh a haw ta vang vang a. In a thlen chuan, a nupui chu a lo thi tak tak a. A nupui sawi ang khan an rappuichungsang a Bellam chhungah chuan Sarep chu a lo awm tak tak bawk a.

Chuta tang chuan, upa in  Mitthi thlarau ten Thlanpial kawng an zawh a an paltlang ngei tih an sawi chu tak takah an ngaih leh zual phah a ni tiin Thlanpial kan tlawh ni 22.06.2017 khan min hrilh a ni. A thawnthu hi Mitthi thlarauin Rihdil an paltlang ngei a ni tih tihfiahtu thawnthu an sawi thin, Pasaltha pakhat Rihdil vela ramvak, a nupui thlarauvin Rihdil lam pana mitthi khaw kawng a zawh lai a lo man chanchin nen a inang hle a. Thil thuhmun, sawi dan dang hret pawh a ni mai thei.

Engpawhnise, pi leh pute khan mitthi thlarau chu Rih dil kaltlang angin an ngai vek a. Mitthi khua leh Pialral thlen hma hian engemaw ti chhung chu minung zinga la awm angin an ngai a. Pawi ho chuan Zinghmuh a kal hmasa ang ten an ngai a, Hmar chuan THLANPIAL hi kal tlang niin an ngai bawk a ni awm e.

Tun hma deuh lawkah thleng pawhin Thlanpial ram lam Lo a neih kum chuan, lovat ram riak ten thawm danglam tak tak an hriat fo thin thu Pu Valtea hian min  hrilh a ni. Hengte hi finfiah harsa tak ni mahse, dawt a ni tih chu thil harsa ve tak a ni.

IMG-20170624-WA0053

Buata Bawihtlung

25.06.2017 Sunday

Phingnu leh Phingpa

Phingnu leh Phingpa

Rairahtea chu a nuhrawnin pawisa kho te khata a hralh hnu chuan Kawrpawl ho buh a veng thin a. Rulpui thih hlau tlan chhia a lo hum tâkah chuan Rulpui chuan lawmthu sawi nan a Bahhnukte thiltithei a kawl tir ta a. Chu Bahhnukte zarah chuan a lo ropui ve ta a, nupuiah pawh reng lal fanu ngat a nei nghe nghe a.

Bahhnukte chu kawl reng theih a ni lo a, Rulpui a peklet leh hnuah Rairahtea chu a harsa leh ta hle a. An nupui raipuar nen chuan khua an chhuahsan ta a. A nupui tuihal tui a chawi sakna lamah kawrpawlho tuikhur hnar a tinu palh a, Rairahtea chu an man ta daih a.

Rairahtea nupui chuan fa mipa a nei a, vanchung nulain a sawi angin a hmingah Chhawnabawraza an sa a. Nausen Chhawnabawraza chu a trahin a mittuiah rangkachak, a nuihin a ka atangin tangka a lo chhuak thin a. Chuvang chuan an awmna pitar chuan nausen chu a tlanbopui ta daih a.

Chhawnabawrahza lo tlangval chu, a hmeltha hle a, a fingin a huaisen em em bawk a. Sakawr thlaki sen nufa duhawm a nei a. Lal ropui tak a ni zui ta a. An khaw nula hmeltha chu nupuiah neiin fapa Rengtea a nei a, an hlim thei hle a ni awm e. Mahse Ramhuai tur nei chuan a lo thik a. Chhawnabawrahza chu a that ta mai a.

Ramhuai tur nei leh Sakawr thlaki sen chu an insual leh ta a, a. Sakawr thlaki sen chu a hliam ta a. Tuchuan Sakawr chuan Rengtea hnenah, “Hetia ka taksa a pem takah chuan ka thi dawn a nih hi, ka thih hunah chuan thangteah min zalh ang a. Sa chi tinrengin min rawn ei an tum ang a, ‘Phingnu leh Phingpa’ ngeiin min ei rawh se,” a ti a.

Rengtea te chuan sa dangte chu an hnar zel a, Phingnu leh Phingpa an lo thlen chuan lawm takin an ei ta a. Rengtea chu thei sak tak pum khat hi an pe a, “Min ngaih chang apiangin he thei hi seh vak la, Phingnu leh Phingpa kan va ngai ve, ti la, kan lo chhuak zel ang,” an ti a. An kalsan ta a

Ramhuai tur nei chuan Rengtea te chu a tibuai zui zel a, Sakei lemah changin seh tumin a um ta a. Rengtea chuan Phingnu leh Phingpa thei pek chu a seh a, an sawi ang khan a chham a. Phingnu leh Phingpa an lo lang vat a, an hnenah chuan “Khu Sakei khuan min um a, ka hlau lutuk” a ti a. Phingnu leh Phingpa chuan, “Hlau suh, keimahni’n kan han bitum ang e,” an ti a. Sakei chu an bei a, an that ta mai a.

Tichuan PHINGNU leh PHINGPA te zarah Rengtea chu Ramhuai lakah chuan a zalen ta a ni awm e. PHINGNU LEH PHINGPA te hi khawi lam mi nge tih hriat ni lo mahse, an hmel pawh hriat ni lo mahse, he Lung chunga inziak hi PHINGNU LEH PHINGPA lem a ni e an ti a!. Kum 2013 khan ka zin haw pahin ka tlawh.

# A thawnthu hi keima irawm chhuak ni lovin, Mizo Thawnthu – Pu Lalhmachhuana Ralte ziah ka chhiar behchhan a remkhawm, Phingnu leh Phingpa hre lo tana ka thai lan tel mai a ni – Buata