Daidangtu Lungbang Berlin Wall chim ta kha!

(Berlin Wall chim.champha 28 na pualin)

Vawiin hi Dodalna leh demna nasa tak hnuaia din, Daidangtu Lungbang “BERLIN WALL” tlukchhiat champha vawi 28-na a lo ni leh ta reng mai. He ni pual hian he Berlin Wall leh a chheh vel chanchin tlem kan tarlang ve ang e.

Thu hma:
Indopui hma leh a hnu thlengin USA leh Soviet Union hian ropui zawk nih an inchuh ve hrim hrim a, Germany Nazi ho do turin an inlungrual mai chauh kha a ni a. Indopui 2-na a tawp chiah khan ralthuam hmang em lovin nasa takin an inbei zui a, chu chu Cold War tiin koh a ni nghe nghe. Mahni ram inrelbawl dan tha an ti zawk ve ve a, ram sum leh pai inrelbawlna (Economic system) lamah US chuan Capitalism an hmang a, Soviet Union chuan Socialism an hmang thung a, Mipui rorelna dik tak (Democracy) zawkah an inchhal ve ve bawk.

Berlin Wall siam a nih chhan:
Khatia Indopui 2-na a tawp takah khan Allied-ho US, Great Britain, France leh Soviet Union-te chuan an ram lak Germany chu an in awp sem a. Mahse kum 1949-ah chuan US, Britain leh France ram awp Germany chu inzawm khawmin West Germany (FRG) tih a ni a, Soviet Union awp ram pawh East Germany (GDR) tih a ni a. German khawpui Berlin chu Soviet Union awp huam chhungah awm mahse, E. Germany leh W. Germany chuan an insem a. West Berlin chu E. Germany chhungah thliar kar angin a awm a ni.

Hun rei lote chhungin E. Germany leh W. Germany mipuite dinhmun chu a danglamin, sum leh pai lamah pawh an inthlau ta hle a. Kum 1950 chho velah khan E. Germany atangin mi tam takte chu West lamah an pem a. Thenkhat chu an kalkawngah lo dang chat thin bawk mahse, kum 1961 an thlen meuh chuan, East Germany chuan hnathawktu leh mipui thahnem tak 2.5 Millions lai a hloh hman hial a. Pem chhuak zat hi E.Germany mipui hmun ruk a thena hmun khat vel hial niin an ngai.

A mite an pem zel tawh loh nan East Germany chuan Berlin-a a ram chinah August ni 13, 1961 Pathianni khan BERLIN WALL chu thirhlingnei (barbed wire) leh hmanraw dang hmangin an siam tan a. He ni hi Barbed Wire Sunday ti a sawi thin a ni bawk. Ni 12 zanlaiah Berlin mipuite mitthilh hlanin Sipai leh hnathawktute chu Truck in an inphur lut a, East leh West inbiak pawhna Phone hruite chu an ti chat vek a, Thirlen hmangin an daidanna Bang chu an siam ta a, a tuk zing khua a lo var chuan mipui an hrilh hai hle a, tumah kal tlang an phal ta lo a ni.

Berlin Wall sei zawng leh len zawng:
He Wall kilometer za chuang zet a thui hi a tirah chuan thirhlingnei (Barbed wire) hmanga siam a ni a. Tum 4 lai siam danglam a ni a, a siam vawi 4-na (4th Version) kum 1975-1980 chhung ami chu a hautak hle a, 12 feet a sang leh 4 feet a chhah a ni a, a chungah thir pipe dah a la ni bawk. Sawi dan tlangpui ah kilometres 140 (mel 87) a thui a ni.

Tihsual palh vangin Berlin Wall a chim:
Kha tih laia US President R. Reagan-a khan Soviet Union hruaitu Michael Gorbachev chu Berlin Wall thiat turin a thlem reng a. US leh a thurualpui ten hma an sawn viau laiin, Communist ramte chu an lo chak lo tial tial bawk a.

November ni 9, 1989 a East German a Press Conference ah Guenther Schabowski chuan, East German mipuite chu daidanna bang paltlanga West German a kal phalsak an nih tur thu a puang ta mai a. Chu veleh, engtikah nge chu phalna chu a taka kalpui tur tia an zawh chuan. Schabowski chuan, “tun atangin a theih nghal” a ti ta mai bawk a.

Guenther Schabowski hi Communist Party a Politburo (Executive Committee) Media Affairs chang tawh thin leh Politburo member ni mek a ni a. He Press Conference neih hma lawk hian, East German hruaitu lu  Egon  Krenz chuan Schabowski henah hian  “Rei vak lo zin veivah phalna dan” chungchang ziakna a pe a. Chu dan chu, East German mi ram danga zin duh tan awlsam zawkin ram danga zin chhuah an dil theih dan turte a chuan mai bakah, ramri paltlanga pem phalna dan te a ni a. Schabowski hian lehkha thuziak hi a chiang lo nge ni, a lehkha thu ang lo takin, tun atanga ramri paltlang phal a nih thu a puang ta mai si a.

Press Conference thu chu W.German Public National TV chuan dar 7:17 PM ah a puang nghal a vat a, an chhuah nawn tluk tluk a. He channel hi East German lam pawhin an en nasat avangin a darh chak vet vet hle a.  

Chu thu thang avang chuan East Berlin mipuite tam tak chu ramriah kalin Berlin Wall paltlang tumin an pungkhawm ruih ruih a. Ramri vengtute chu an buai hle a. An hotu lam atanga tih dan tur thupek an dawn loh mai bakah, mipui tam tak nen an inchim buai vel chu an nuih sawh zawk mah a. Chu laia state security service (Stasi) officer duty Harald Jäger a tihngaihna hre lo chuan zan dar 11:30 PM ah Bornholmer Street a Gate chu hawngin West Germany lama lut duh mipuite chu ama thuin a chhuah ta ringawt mai a ni.  

Berlin Wall a kaltlang theih tih chu mipui tam tak chuan a tirah chuan an awih lo lek lek a, mahse a tak a ni tih an hriat chuan East leh West Germany atang chuan Daidangtu Bang chu tuilian ang maiin an bawh ta hum hum a, a then hlimin an lama, an tap a, a thenin Daidangtu Bang (Berlin Wall) chu an chhu chhe mawlh mawlh a, rei lote chhungin kum 28 zet lo ding tawh BERLIN WALL chu a tlu chhe sawp ta a.

Heti hian Daidangtu Bang hi chim mahse, Ram pahnih – East Germany leh West Germany chu awlsam takin an inzawm fel mai bik lo a, October ni 3, 1990 khan inzawm felin ram pakhat ah a awm leh ta chauh a ni.

Berlin Wall chim, Soviet Union kehdarh, Cold War a tawp:
Berlin Wall a chim hnu lawk hian Soviet Union (Communist ram) hruaitute chu an thu a inhmu lova, an keh darh a, Russia, Ukraine, Lithuania, Georgia a lo piang ta a. Heta tang hian Cold War an tih mai thin pawh chu a lo tawp ta a. Mahse Ukraine buaina vangte, Arab ram buaina vangte leh chhan hrang hrang vangtein khawvel ram ropui leh thiltitheite thu hi a inhmu lo fo va, Cold War dang piang leh dawn dawn a sawi a awm ve  fo.

Kum 28 zet chhungte hmu thei lova Bang in a daidan tlat te an khawngaih thlak a, Bang chhutchhiat a nih hnua mahni duhna lama awm theite leh mahni lainate tawng leh thei a awmte an lawmpui awm tak zet. He lungbang nuaichhiat hi German tan mai ninlo, khawvel tan thil chhinchhiah tlak tak a ni. Zalenna hi a va hlu tak em!

Advertisements

Kum 1892 a Stanford University a thil thleng – NGILNEIHNA VANGA THIANA INSIAM, US PRESIDENT LEH POLAND PRIME MINISTER NI ZUI TATE INTAWN DAN 

Hoover & Paderewski Concert JPG

(Kum 1892 a Stanford University a thil thleng – US President ni ta leh Poland Prime Minister ni tate intawn dan.)

Kum 18 mi zirlai pakhat chu a zirna man (fee) pek tur ngaihtuahin a buai hle a. Fahrah mai a nih avangin pawisa han neih mai dan tur chu a hre lo hle a. Chu tih lai chuan a ngaihtuah naah pawisa thawh chhuah dan tur a lo lang a. A thianpa nen chuan an zirna senso tur tuak nan an College ah Musical Concert huaihawt an tum ta a. Chutih laia Piano tum thiam lar tak Poland mi Ignacy J. Paderewski chu an bia a, a Manager chuan mipui hmaa Inphochhuak tur chuan Dollar 2000 a lo phût a. An inbiakrem hnuah chuan Concert hlawhtling tak neih tumin zirlai mipa naupang pahnihte chuan tihtur tulte an buaipui zui nghal char char a.

Concert neih ni chu a lo thleng ta a. Vanduaithlak takin a hun an ruat leh a puanzarna lama harsatna an neih avangin mi chu an tam lovin ticket chu an hralh tam ta lo hle a. Hoover-a chuan Paderewski hnenah chuan rimawi (Piano) chu tum lo mai turin a ti a. Concert fee turte chu an hmuchhuak dawn lo tih hre reng chungin Paderewski chuan rimawi chu tumin Concert chu a nei lui ta tho a.  An pawisa hmuhchhuah zawng zawng chu Dollar 1600 chauh a ni ta a. Hrilhai tak leh beidawng tak chung chuan Hoover-a te thiandun chu Parderewski hnenah chuan an kal a, an dinhmun khirh tak mai chu an hrilhfiah a. Concert-na a an pawisa thawhchhuah zawng Dollar 1600 leh Dollar 400 lakchhuahna tur (Cheque) an pe a. Cheque a pawisa an pek pawh chu, a rang thei ang bera pawisa a hmuh theihnan an tiam bawk a.

Parderewski chuan, “Ni lo, hetiang hi ka pawm thei lo” a lo ti a. Cheque chu a pawtthler a, Dollar 1600 chu pek lét pahin, zirlai naupang pahnih hnenah chuan, “Khawngaih takin he Dollar 1600 atang hian, in sum senral zawng zawng la chhuak ula. In zirna man (fee) atana in mamawh zat la bawk ula. Chumi bâk la bâng awm ang ang chu min pe dawn nia” a ti ta mai a. Zirlai thiandun chu an hrilhhai zawk hle mai a, lawmthu an hrilh ta mawlh mawlh a. Chu a ngilneihna chuan Parderewski chu mi ropui danglam bik a nih zia a ti lang chiang hle a ni.

Engvangin nge a hriat ngai loh mi pahnih a tanpui ngawt ang? Kan nunah hetiang dinhmun hi kan paltlang fo hlawm a. Mi tamzawkte hi chuan, “Tanpui ta ila, engnge ka chungah lo thleng zui ang?” tih chiah kan ngaihtuah thin. Miropui diktakte erawh chuan, “Tanpui lo ta ila, an chungah engnge thleng zui ang?” tih an ngaihtuah zawk thin a. Beisei let nei chungin thil an ti ve ngai lo. Thil dik tak, tih tur dik tak ni a an hriat vangin an ti mai thin.

Piano tum thiam Paderewski chu a lar zel a,  Poland ram Prime Minister hial a ni ta a. Hruaitu ropui tak a ni a, mahse vanduaithlak takin Indopui pakhatna khan Poland kha a sawp chhe nasa hle mai a. Mipui maktaduaih 1.5 chuang zet chu eitur nei lovin, riltamin an awm a, tanpuina tur pawisa a awm si lo. Prime Minister Paderewski chuan engtia tanpui tur nge tih a hre lo hle mai a. A mangang chuan US Food and Relief Administration hnenah tanpui a dil ta chawt mai a.

Chu hmun, US Food and Relief Administration a an hotupa ber chu Herbert Hoover, a hnu a US President (31-na) ni zui ta kha a ni a. Hoover chuan Poland tanpui chu rem a ti a, Poland mi, tam tuar mekte eitur thahnem tak chu rang takin Lawngin an phur lut nghal a.

Chu manganna chuan kian lam a pan tâk deuh hnu chuan, Paderewski pawh chu a thaw a veng huai a. Tanpuina petu Hoover-a hnenah chuan, amah ngei kal a lawmthu hrilh a tum ta a. Hoover-a thilphalna ropui tak avanga Paderewski-an lawmthu a sawi tan lai tak chuan, Hoover-a chuan lo pawtchatin tihian a lo hrilh a, “Pu Prime Minister, lawmthu mi hrilh tur i ni lo asin. I hre reng tawh kher lo mai thei, kum tam tak kalta a, US a zirlai naupang pahnih i tanpui a, college kal tluan chhuak ta te kha. Khata pakhat zawk kha keimah hi ka ni a” a lo ti a.

Khawvel hi chu a mak teh e. Mi chungah kan thiltih rah hi kan lo seng leh zel zawng a lo ni e.

Kan Inneih champha Sept 25 ah tak Beirual kan thleng, kan nihlawh hle.

 

Ni 25th September, 2017 hi kan Inneih champha vawi 3-na a ni a. Hemi zan hian Tuikhuahtlang Presbyterian Kohhran Upa Bial 2-na Beirual inkhawm kan dawng hlauh mai a. Kan chhungkaw ni pawimawh tak mai, kan Nu nena Chhungkua kan din ni champha ah tak mai, Pathian Kohhran hote hun pawimawh Beirual dawng tura tih kan ni hi a lawmawmin, ngaihtuah chian phei chuan amak zawk hial a, nihlawh ka inti tak zet a ni.

Theih ang tawkin kan In te singsain kan inpuahchah ve a. Programme leh chanvo chelhtu tura ruatte chu –

A hmun       :   Pu Lalbuatsaiha In (H.No 35/A)
Hruaitu       :   Pi Lalthangzauvi
Tantu           :   Nl Lalthanpari
Thupui        :   CHHUNGKUA (Gen 2:18-25)
Hawngtu     :  Pi Lallawmzuali

Inkhawm tan hma, hma deuh takah Thupui hawngtu tur Pi Lawmi a lo kal a, thutna rem dante kan tih fuh loh hlauvin a rawn enfiah a, min ngaihvenpui hle tih a hriat a, a lawmawm ngawt mai.

Inkhawm tan hmain tui taka zaiho a ni a, hla pali – KHB No 294 “Ka chenna ram thlaler a ni Lalpa”  tih hlate, KHB No 163 “Sualin bo mah ila, tu dang ka thlang chuang lo” tihte, KHB 270 “Chhandamtu, chatuan nun nan” tih hlate, KHB No 324 “Lalpa, i aw nema” tihte, KHB No. 2016 “Ka sual atan, ka Tlantuin” tih hlate an ni.

Dar 7:00 PM ah tan a ni a, inkhawm hruaituin Bible chang – Josua 24: 14-20 “Tin, Lalpa rawngbawl hi tha lo awm anga in hriat chuan vawiinah hian tu rawng nge inbawl dawn thlang mai rawh u; in thlahtuten luirala arawng anbawl thin pathian te kha nge, inluah ram Amor-hote pathian te kha? Kei leh ka chhungte erawh hi zawngin Lalpa rawng ania kan bawl dawn ni,” tih chu chhiar chhuakin, tawngtaina a hman zawh hnuah, Upa Bial 2-na Secretary Tv Lalthankima Colney chu hun hmandan tur tlangpui leh hriat tur pawimawhte a puang a. Inkhawm tantui Nl Lalthanpari chuan Thupui innghahna Bible chang – Gen 2:18-25 chu a chhiar a, a tawngtai zawh hnuin, inkhawm hruaituin Thupui hawngtu a sawm a.

Thupui hawngtu Pi Lawmzuali hian uluk tak leh thiam takin, muang fan raihin Thupui zirho tur a chhiar chhuak a, sawi zawm chakawm takin a sawi hawng a. Tichuan inkhawm hoten sawihona neih zui nghal a ni.

 

 

 

 

A kal her luai luai

Kumin 2017 YMA Day khan ka hla duh deuh mai, “A kal her luai luai” tih kha, kan nau Marina Zohmingthangin thiam takin a sak ka ngaithla a, chu chuan he hla ka duhna a chawk tho thar leh hle. Chuvangin tlem kan sawi zui hlek ang e.

Eheu! Eheu! Eheu!

A rui e, tlai ni leng an tam ta em e,

Engtin ngai ve maw khuanulengin,

Damchhung tawite thih hnu sei tur dawn lo rengin,

Awi, raupui phuar vel ang, an meng phuai mai.

 

Buaina chhumpui kara leng zofa ten,

Puan ang hnawl ila Chawltui Ningzu.

Chutin kan than lo sang zel se,

Lungdamten laitual I lang za ang.

 

A hrang chuang e, chun leh zua unau tawnah

Talhfung chawiin a au vel pheilai a vawr

A hawl kim ngei, u leh nau lenrual dawn lo rengin

Ka hlau ber mai aw tur tui Ningzu.

 

I dawn tam lua e, K-chuang Biaksailovi

Hmatiang sawn a har chin lem a awm lo ve

A mawl tual tual, a vai ruai e Belpui kiangah

Awi, lampui tluang laiah a kal her luai luai.

 

 

He hla hi kum 1975 a Central YMA in Zu dona hla inphuahsiak a huaihawt tum a, Sialsuk khaw hla phuah thiam Mangchhuana phuah a ni awm e. A hnuah Radio-ah thun a ni a, Zoram pumah a lar zui ta em em mai a ni.

He hla ka hriat ve na pawh Radio atangin a ni. Nula aw zang veh vawh hian, zo takin a rawn sa a. Eheu! Eheu! Eheu! tia bul a rawn tan khan beng a verh nghal zar mai a, a Aw nen a inmil hle bawkin ka lo hre thin.

Radio-a sa lartu hi Phullen khaw nula zaithiam C. Laldingngheti a lo ni a. Kan khaw nula a ni tih tun hnuah ka hre ve chauh a. Ani hi Pu C.Thangzuala leh Pi B.Lalmuani te fanu niin Phullen a piang leh seilian a ni a. A hnuah hmasawnna duhin Aizawl lamah an pem ta a ni. C.Laldingngheti pa Pu C.Thangzuala hi Pu C.Tlanmawia (muang taka min chawlhsan ta) unaupa a ni.

C.Laldingngheti hi naupan lai atanga Sikul leh Biak In lamahte zai thin a ni a. Middle School a kai lai hian Sikul engemaw zat atanga zaithiam kalkhawmte inelnaah Malzai (solo) ah a tel a. Hla phuah thiam tak Suakliana hla “Khawkhawm hla” chu thiam takin a sa a. Hemi tum hian Lawmman pakhatna a dawng hial a ni.

Tichuan zai lamah chuan a kal zui zel a. Khatih hun laia zaithiamte inpho chhuahna ber Radio ah chuan Artist a ni zui ta a. Kum 1974 vel khan Radio ah a lar tawh hle a. Pu Mangchhuana phuah, Zu dona hla “A kal her luai luai” tih Radio a a’n thun phei chu a lar pui vet vet hle a. He hla hian Mizoram pum mai ni lo, Zofate luah chin chu a fan chhuak vek a ni ber a. Khatih laia zai ngainatu Mizote zingah hre lo an awm lovang tih hial a ni.

Khatiang hunlai a Radio Artist larte lar dan kha a namai lo hle a, a hun lai hre ve pha lo thangtharte chuan kan hrefiah thiam lo mai thei.  Radio a a lar hnu a piang ve chauh te pawhin a lar zia kan hre zui ve a, “A kal her luai luai” ngat phei hi chu ka hla duh em em a ni zui ve ta reng a ni.

A tirah chuan a hla thu ngaihtuah lem lovin ka duh ve em em ringawt a. A hnu deuhah a hla thu hi ka’n chik ve deuh a, ka duh a zual thar hle a.  A rui e, tlai ni leng an tam ta em e, … Awi, raupui phuar vel ang, an meng phuai maitih laite hi a nalh danglam riau a, mi a zilh hau tel thiam bawk si.  Chang hnihnaah Zu in chhungkua a tihbuai theih dan fiah lehzualin a rawn pho lang a, “Ka hlau ber mai aw tur tui Ningzu”  a ti hial a.

Chawng tawp hi a nalh danglam hle a. An hun laia hmeltha lar Biaksailovi, Zu sawi nana an hman fo thin chu he changah hian a rawn zep tel zauhin “I dawn tam lua e, K-chuang Biaksailovi, Hmatiang sawn a har chin lem a awm lo ve, A mawl tual tual, a vai ruai e Belpui kiangah, Awi, lampui tluang laiah a kal her luai luai”  tin sak thlen phei chuan, mitthlaah pawh a fiah hle a ni.

He hla thunawn atang hian, he hla phuah hun lai, Rambuai zualpui reh deuh tawh mahse, Mizoram in Remna a neih hma, harsatna hrang hrang hmachhawn mek a nih zia “Buaina chhumpui kara leng zofaten” a tih atang hian a hriat theih a. Tin, he hla phuahtu rilru, ram leh hnam veitu a nih zia leh, Mizo ten hma kan sawn a duhzia a thunawn atang hian a hriat theih a ni.

Ni e, Damchhung tawite thih hnu sei tur dawn lo a, chhûngte leh thenrualte hmaa talhfung nen a hrâng a, raupui phuar vel anga, meng phuai a min siam theitu leh, Kawngpui ngilah pawh kal ngil hlei thei lo a, vai ruai a min kal her luai luai tir thin tu “Turtui Ningzu” hi, chintawk neih a harsa si a, hmatiang sawnna daltu a nih bawk avangin hnawl ngam ila, lungdamte’n laitual I leng za ang u.

(Hla thu hi sak dan leh sawi dan a dang hret hret hlawm a, a phuahtu phuah dan, dik zawk hria chuan min hrilh ula ka lawm hle ang.)

***BB140820171100PM***

Alphons Kannanthanam, Kristian, MP ni sa lo chunga Union Minister thar atana lakluh.

alphons_759

 

ALPHONS KANNANTHANAM

Sunday liam ta, September ni 3, 2017 a Union Cabinet siksawi tum a Minister thar pakua zingah khan, Alphons Kannanthanam, kum 64 mi, MP ni bawk si lo kha Minister atan ruat a ni ve tlat mai a. BJP chu Hindu deuh ngun leh Kristian nekcheptu deuha kan ngaih lai a, BJP awm mumal lohna state Kerala mi, Kristian ni bawk si Minister a lakluh a ni ta mai khan ngaihven a hlawh phah ve viau. Prime Minister Narendra Modi hian a ring tawk hle a nih a rinawm awm e.

Alphons hi IAS chawl ta, Advocate leh Politician ni bawk a ni. Kerala a Kottayam district, electric luh lohna khua Manimala ah August 8, 1953 khan lo piangin, unau pianpui pakua, fahrah enkawlna atanga an adopt 2 nen unau 11 an ni a. A naupan lai chuan tawng mawh tak a ni awm e. Electric luh lohna atanga sikul kal chhuakin MA economics a zo a. Mi tumruh leh tum sang tak a ni a. A collage kal laiin, Debate a inelnaah a chhuak ve a, a thiam lo hle a niang Pheikhawkin an vawm sup sup a, stage ah pheikhawk 250 vel zet a tlingkhawm hial an ti. Mahse a beidawng mai lo, University an kal leh chiah chu Inter University Debate-ah a chhuak leh a, India ram pum inter University Best Debater kum 3 zet a ni leh thei a ni.

Kum 26 val a nih lai, kum 1979 a UPSC exam result chhuak a a ti tha zual te, chanchinbuin a chhuah zingah a hming a tel ve te khan a phili phah lem lo hle a ni awm e. Chanchinbu chu lukham hnuaiah dahin a mutsan leh mai a ni awm e. A sawi dan chuan, Result list a tlar hmasa lamah a hming a lang dawn tih kha a lo rin sa ve reng a nih vangin a danglam phah vak a lo ni awm e.

IAS a ni a, Minister leh politicians te hnuaiah awm mah se, politicians ten a dik a dawk pawh thlu lova an duh duh a an rah hrual mai mai theih mi nih a tum lo bur.  Tanpuitu nei ve lote tana dinsaktu leh tanpuitu nih chu a tum leh a intiamna a ni. A tiam angin mi pawh a tanpui nasa hle reng a.

Kum 1988-1991 chhung Kottayam a DC a nih khan Kerala ah a lar tawh hle a. Zirna a ngaipawimawh a. A kaihhruaina hnuaiah Kottayam chu India ram khawpui zinga ziak leh chhiar thiam lo awm lohna khua ni thei hmasa ber a nih tir a, a lar zual phah hle. A felin a fing tel bawk a, corruption lakah a fihlimin mai a ni lo, a do bur bawk a. Kum 1992-2000 chhung khan Delhi Development Authority (DDA) Commissioner a ni a. He mi chhung hian eirukna a bei nasa hle a. A thupek angin dik lo taka sak, (a then te chu misual rual ‘Mafia’ ho ta a ni awm e) In (building) 14310 zet thiah a ni a, ram pawh cheng vaibelchhe 10000 hu zet hman theihin a la let leh an ti.

Heng vang hian a hming lemah Thiattupa (Demolition Man) an vuah a phah a, a lar hle. Mahse a thiltih avang hian eirukna laka fihlim lote huat a hlawh phah a. A nupui pawhin thichhawnga sawisak leh kalsan tawkin, a lu ah nasa taka hliam a tawrh phah tawh a, a fate pawhin kut an lo tuar ve hial bawk. Thah tumtu a nei reng a, a Car te pawh sialaia kah a ni a, mi kut tuara thih hlauhawmah a awm reng a ni ber. Heng avang hian, khatih lai khan englai pawhin silai pahnih a pai ziah phah a ni.

Mahse Alphons hi Delhi mipui ten an thlawp hle a. Times of India in a zirchian naah Alphons Kannanthanam hmalakna hi Delhi mipui 89.6% zetin an thlawp a, hetianga sang mipui thlawpna hi official zingah hmu an la awm ngai lo tih a ni. Kum 1994 khan Time Magazine’s 100 Young Global Leaders ah Alphon hi a tel pha ta hial a. Corruption a do a a beih nasat avang chuan transfer pawh a tawk ve a ni awm e.

Kum 2006 khan IAS atanga chawlin MLA turin Kanjirappally constituency-ah Independent in a ding a, CPI(M) hruai Left Democratic Front ten an thlawp a. Cheng nuaih 10 pawh seng tling lovin hneh takin a tling a. MLA danglam tak nih a tum tlat a. A mah ngieiin a motor chu khalhin khualbuk (resthouse) tetakteah a khawsa ta a. A bial tan cheng vaibelche 350 zet a thawhchhuah sak a, Best MLA award pek hial a ni.

Minister nih theihna kawng pawh a inhawng a a lan laiin, a bial ngaia MLA nih leh chu a duh ta hauh lo mai. A chhan pawh eng dang ninlovin, India ram zahve in eitur mumal an hmuh loh lai leh India naupang zahve zet ten zirna sikul an kai theih loh laia, constituency hausa ber a MLA  nih chu a tihtur niin a hre lo ni. A ngaihpawimawh leh hmalak duhna hlawm lian deuh pathumte chu – mitin ban phaka eitur chhawp sak te, naupang zawng zawng sikul kai tir te leh mitin tana hna thawh tur siam a ni.

IAS a nih chhan ber pawh, IAS chu mite tana rawngbawlsakna tura tha ber nia a hriat vang a ni a. Politics a luh chhan pawh, mite hlim hmel puttir thei tur a thiltihtheihna sang tak pe theitu a nih vang niin a sawi a. Kum 2011 March 24 khan Nitin Gadkari an BJP ah a lawm lut a, kumin 2017 khan National Edn Policy member ah ruat a ni a. Tun 3rd September, 2017 atang khan MP pawh ni sa miah lo kha, Union Minister of State (Independent Charge) – Ministry of Tourism leh MoS – Ministry of Electronics and Information Technology a tan ruat a ni ta hial a ni.

A thil thir dan hi a ropuiin a awhawm ngawt mai. “Khawvel hi suangtuahna leh tum nei sang apiangte ta a ni. Tun lai nu leh pa ten an fate tana an vei ber chu, Exam ah topper ni se, entrance exam ah tling se, hna mawm deuh thawk se, tichuan nupui pasal nei se tih a ni vek ringawt a. Nu leh pa ten an fate, zirlai naupang ten suangtuahna leh duhthusam an neih ve an rem tih sak lo. Hemi chhan bul ber chu, pathian pakhat ‘Sum/Pawisa’ chiah an biak vang a ni” a ti hmiah mai. “Pawisa hi kan ngaihpawimawh ber a nih chhung chuan, Nun hi awmze nei lo a ni ang” a ti.

Mi tam takin mahni inrintawkna an nei lo a, midangte chu fing bik, thiam bik angin an ngai thin, hei hi nu leh pa te bakah zirtirtu ten naupang te enkawl dik tawk loh vangah a ngai. Mi thenkhat chuan mite thlir dan an ngaichang nasa lutuk a, nun hi hlauhnain an hmang ral a ni ber a. Chutianga a awm ve loh nan, Mi ten an thlir dan chu ngaihtuah lo lui tlat turin a rilru siam tlat thin.

Thenkhatin, an hlawhchham chhanah system an mawh puh thin chu a duh lo hle. Ani chuan, “kei hi SYSTEM chu ka ni”, hruaitu lu a dik chuan system chu a dik nghal mai tih chu a ngaihdan a ni. Mi tam takin, system dik loh vangin an duh angin thil an ti thei lo ni a an sawi thin chu a pawm lo. “Chutiang rilru an put vang chiah chuan, he ramah hian thil tam tak a thlen loh phah thin reng a ni” a ti hmiah.

Mi hming tha tak, eirukna do bur, thih leh dam karah pawh dik leh tha a tihah chuan kal zel ngam mi, mithiam leh taima, mite tanpui nuam ti mi Kerala Kristian hi, a namai lo hle a, Modi hian Kerala a vote zawn nan ngawr ngawr Minister dinhmun hi a pe lovang tih a rin theih. Kan la hre zel ang chu.

 

*****BB060920171103PM*****

MAHSE NANG CHUAN NANGMAH KHA

Mi’n an zah lo che a ni thei, mahse nang chuan nangmah kha zah hle ang che.

Mi’n an ring lo che a ni thei, mahse nang chuan nangmah kha ring tlat ang che.

Mi’n an phatsan che a ni thei, mahse nang chuan nangmah kha phatsan ve hauh suh ang che.

Mi’n an rinawm loh san che a ni thei, mahse, nang chu nangma lakah rinawm tlat ang che.

Mi’n i thupek an zawm lo a ni thei, mahse nang chuan nangma thupek kha zawm tlat zel ang che.

M’n anchhia an lawh che a ni thei, mahse nangmah leh nangmah kha anchhia inlawh ngai hauh suh ang che.

Mi’n an zahpui che a ni thei, mahse nang chuan, nangmah leh nangmah kha inzahpui hauh suh ang che.

Mi’n an ngai nep che a ni thei, mahse nang chuan nangmah leh nangmah kha inngai nep ngai hauh suh ang che.

Buata Bawihtlung
BB170720171200AM