FIFA 1994 WORLD CUP PHULLEN-AH ROPUI TAKA HMAN A NI

FIFA World Cup vawi 15-na 1994 World Cup kha June ni 17 aṭanga July ni 17, 1994 chhung khan khawvela Football thiam zual ram 24 ten an khel a nih kha. Kha ‘94 World Cup khan, a hma a World cup lo awm tawhte chu kawng hrang hrangin a rawn khum a, World Cup Record tam tak a siam a nih kha. Mahse, chu lam chu sawi tam vak lovin, Phullen in kan lo dawn dan lam kan thlur deuh zawk ang.

Kum 1994 World Cup kha Phullen in kan khuaah ngei FIFA World Cup kan hmachhawn hmasak ber a nih laiin, kan ngaihsan Maradona hun hnuhnung a nih tlat thute, Germany – East leh West in zawm hnua World Cup an khelh leh hmasak a nih thute, USSR keh darh hnua Russia anga an tel leh vawikhatna a nih thute, Colombia player nungchang ṭha “the Gentleman” tia an koh fiam, anmahni lama a tih goal vanga an kah hlum tak Andrés Escobar chanchinte, Bebeto nau awih dan zir velte kha.., sawi tur a tam a, sawi zui lo mai ang.

Kha 1994 World Cup thleng tur khan FIFA chuan khawvel ram ropui USA kha Ni 4 July 1988 daih tawh khan a thlang fel diam tawh a. Chutihlaiin, World Cup Committee Phullen erawh chuan chawpchilh takin, 1994 World Cup thleng turin a Upa J.Ngurchhawna Kawt (Pu Ngura Stadium), Diakkawn, Phullen chu a thlang ve hmiah thung. USA ah chuan khawpui 9 ah khelin World Cup history ah a vawikhat nan Indoor stadium (Pontiac Silverdome Stadium) ah te khelh a ni a. Kan khua Phullen ah erawh Pu Ngura Stadium ah Opening atanga Closing thlengin nghah tluan parh a ni thung. A thlengtu Upa J. Ngura te hian an tlin hle a, an inpekna a chhuanawm ngei mai.

Opening Ceremony te kha aw! June ni 17 a Chicago’s Soldier Field, USA ah President Bill Clinton-a hovin, Germany Chancellor Helmut Kohl te, Oprah Winfrey te nen ropui taka hman a ni a. Diana Ross-in zai paha field dung zuia tlanin, goal ruakah ball pet luh ṭhelhin, Goal ban a rawn tlu der vel a, chumi hnuah Opening Ceremony Dawhsan (Dais) mawi eltiang mai chu a rawn hawng a nih kha. Khatih lai khan Phullen lamah pawh VCP thar (June ni 3, 1994 khan VC Election result puan a ni) Pu R. Lalchhanhima te, Pu C Lalfamkima (RIP) te nen World Cup kha phur takin kan lo dawngsawng ve a nih kha.

Han sawi zau hret ila. Khatia, World Cup khel tura Football thiam zual ram 24 te an inzir tluk tluk lai leh a thleng tur leh a en tura Khawvel a inpuahchah mup mup lai khan, keini khua Phullen pawh kha nasa takin kan inpuahchah ve a. Hlo thlawh lai, hna tul lai a ni a, a hmuna USA a en tura kalchilh hman lo kan tam bawk si avangin Phullen chuan kan pualin World Cup Committee din a, Upa J. Ngurchhawna Stadium a World Cup nghah mai kha a rel ta kha a ni a. Khami ṭuma World Cup Committee Phullen te chu hengte hi an ni-

1. Chairman : Pu C. Lalfamkima (VC Member)
2. Vice Chairman : Pu Zahruaia
3. Secretary : Pu J. Pachhunga
4. Asst Secy : Pu KC Zahmingthanga
5. Treasurer : Pi Lalramliani
6. Fin. Secy : Pu YS Singh

World Cup hi thlen mai mai a harsa a. Chubakah kan dawn vawikhatna a ni bawk nen, World Cup Committee Phullen pawh a ṭang hle a, ropui tak leh tlin taka kan dawn theih nan nasa takin World Cup Committee chu a inpuahchah a. He 1994 World Cup Phullen, main Sponsor tur atan hian Food & Civil Supply Deptt, Aizawl chu, anmahni dil leh hriattir lawkna pawh awm lem lovin, thlan an ni tawp a.

Main sponsor hnenah hian, Phullenin tluang taka World Cup kan thlen theih nan leh inkhel en a khaihlak loh nan Generator a hman tur Petrol dil a ni a. F&CS Deptt lam pawh, World Cup Committee meuhin phungbawma a sawm chu an lawm thiamin an hlimpui hle a ni awm e. 1994 World Cup atan hian Petrol Litre 20 zet a thlengtu Phullen min rawn pek bakah, World Cup Committee te Thingpui lumna vel senso turin pawisafai Rs 200 (za hnih) zet an rawn pe bawk a ni. Main sponsor chungah hian World Cup Committee a lawm hle a ni.

Khawvel huap thil a ni bawka, main sponsor bakah sponsor tu dang pawh an awm nual a. Kohhran pawh an bang thei bik lo. Phullen Presbyterian Kohhran chuan 1994 World Cup Phullen atan hian Generator a thawh bakah, World Cup enna TV a chian loh karlaka hman turin kan Bialtu Pastor (Presbyterian) Rev A.K Dawia chuan a TV chu Pu Ngura Stadium ah hian chawi luh a ni bawk a. Tin, Phullen khawtlanga kan officer lian neih, mithiam leh thingtlangmite dawmkan nuam ti em em MCS val Pu K.Lalthawmmawia chuan a Generator a thawh hmiah bawk a. World Cup ropui tak chu tluang taka en a nih theih phah ta a. World Cup Committee Phullen in 1994 World Cup dawng tura inpuahchahna hi a ropui bawk a, Mizoram chanchinbu lian Vanglaini meuh pawhin Chanchinbuah a chhuah chhawng hial a nih kha.

World Cup lai kha Fur lai a ni na a, World Cup Committee Phullen chuan a hmun (Pu Ngura Stadium) ngei a World Cup entute chu ruah do tir lo a, hul phianga inkhel entir ngei a tum tlat a. Pu Ngura Stadium, Diakkawn chu cheiṭhain, Hulhliap (Pandal) zau zet mai a zar hluap mai a. Stadium a diak lutuk loh nan Thingphek in a dawh kang bawk a. VIP te leh a thlengtu te ṭhutna tur bikte siam vek a ni a. USA lama Pasadena hmuna Rose Bowl stadium chu tiat lo mahse, entu engemaw zatte chu berh lo leh hul phianga awm thei tura duan a ni a. Mahse the Greatest Show on Earth an tih hial chu entu mipui an pungkhawm tam em a, USA ang bawkin Pu Ngura Stadium hulhliap hian a daih seng bik meuh lo a ni.

World Cup huaihawttu FiFA leh World Cup Committee Phullen te hi an ṭang em em mai a. Mahni tawkah an buai em avangin mahni seh seh mual hranah tiin, an inrawn tawn lutuk lem lo a. Ruahmanna engkim peih a nih hnuah FIFA hnenah chuan Phullen in World Cup kan thlen dan chungchang chu World Cup commttee Phullen hmingin ziaka thawn a ni a. English leh French ṭawng a thehluh tum a ni na a, Phullenah French ṭawng thiam kan awm mai loh avangin English chauh a thawn a ni ta a. Hei pawh hi Dak a thawn a ni a, a thleng chiah em tih hriat zui a ni ta lo.

World Cup Committee Phullen khan ruahmanna siam leh mipui han chawh phur kha an thiam em em mai a. TV lama Commentator aimaha zei leh ngaihthlak nuam zawkin 1994 World Cup kha Mizo ṭawng ngeiin Pu Ngura Stadium aṭang khan Commentator ten hnehsawh takin an comment ṭhin a. Khami ṭuma commentator te kha YMA lama kan mi chhuanvawr Pu KC Zahmingthanga leh Pu J Pachhunga te an ni a hriat a ni. Mizo ṭawng ngeia World Cup Live comment pe hmasa ber khua kan ni hial mai thei. Mahni ṭawnga World Cup comment ngaihthlak kha a nuamin a hlimawm tak zet.

Pu Ngura Stadium a Commentator te khan an tlin em em a. Puan tur ṭul an puang zung zung bawk a. FIFA lamin inkhelh dan tur Fixer a siam sa te kha, tunlai angin ziaka hmuh mai mai tur a la tam ve si lo a. FIFA in inkhel tur Team leh inkhelh hun a ruahmante chu, Phullen World Cup Committee in a ruahman angin Commentator te chuan mipui hmaah chuan thiam takin an puang ṭhin a. Zan reiah te khelh a nih avangin mipui kan rim ve hle a. Quarter Final chinah zan zawn zat ni lo va, zan awl a awm ta zeuh zeuhte chu, Mipui kan chauh lutuk loh nana Phullen World Cup Committee in a ruahman a nih thute chu aurinna hmangin an puang zel a. Nu leh pa tam tak chuan kha ruahmanna kha ṭha an tih thu an sawi sap sap a, Phullen World Cup Committee te an fak hle a nih kha.

Tin, July ni 6 kha MHIP Day a ni a. MHIP members ten hlim taka Day an hman theih nan, World Cup lai ni mahse, inkhel awm tir lovin World Cup chu chawlh lai lawkpui a ni anga, Ni 8 zanah chum zawm leh a nih tur thu Phullen World Cup Committee Secretary in Pu Ngura Stadium mipuite hriat tura an puang chiah mai phei kha chu MHIP member te pawh an lawm hle. Group Match a zo a, Round of 16 khelh hma chawlh lailawk awm, MHIP Day nen a lo in nang kha, Phullen World Cup Committee ten thiam takin MHIP Day vanga awl tir angin an puang a. MHIP member tam takin World Cup Committee te ruahmanna that zia leh MHIP te an ngaihpawimawh zia hahipin an sawi zui a nih kha.

Kum 1994 FIFA World Cup ti hmuhnawm em emtu chu Players ropui leh lar tak tak an tam kha a ni. Match khata Goal 5 khung thei Oleg Slanko te, top scorer a nih pui Bulgaria thiampuipa Hristov Stoichkov te bakah Top Scorer ni pha lo chunga Best Player ni thei Romario te, Silver ball dawngtu Italian striker hmingthang Roberto Baggio te, Best Young Player Marck Overmars te leh Champion Team captain Dunga te, football thiam chungchuang Maradona te an awm a.

Tin, Carlos Valderrama, Bebeto, Cafu, Claudio Caniggia, Gabriel Batistuta, Jürgen Klinsmann, Lothar Matthäus, Rudi Völler, Oliver Kahn, Josep Guardiola (Coach lar ni ta), Luis Enrique (coarch lar ni ta), Paolo Maldini, Roberto Baggio, Antonio Conte (coach lar ni ta), Gianfranco Zola, Roy Keane, Ronald Koeman, Frank Rijkaard, Dennis Bergkamp, Edwin van der Sar leh rawl thar duhawm Ronaldo (Brazil) te kha an ni hlawm a, a nep tak tak thei lo. Maradona kha damdawi vangin hnawhchhuah a ni ta mai pawh a.

Kha World Cup kha a mak ve riau na chu, Champion team Brazil kha World Cup khel turin an tling lo teuh hle a, Qualifying round khelh hnuhnungah Uruguay chu hnehin an in pet tling hram a. Finalist Italy lah kha, Group Stage an paltlang lo teuh ther ther hle a, Norway (?) nen point inang, mahse Goal khat lek an khung tam hmangin Knockout stage an inhlangkai hram a nih kha.

Ni 17.7.1994 zan mawlh kha a ni. Final zan a ni a, mipui kan phawk lek a ni ber. Brazil leh Italy ten Final an han khel zet mai kha chu aw!!! An thiam dun bawk si, an thiam tih inhre tawn fimkhur lutuk khan a ti hmuhnawm loh lek lek zawk hial. World Cup final a hun pangngai leh hun pek belh thleng, Minute 120 chhunga Goal luh miah loh vawi khatna a ni a, a vawi khat nan Penalty hmangin World Cup Final chakzawk zawn a ngaih phah ta a nih kha.

Kha Penalty kha chu Champion leh champion leh hriltu a ni leh zual a, a boruak sang ngei mai! Kan khaw nu leh pa, Hnuhpui thlo zo tawh ten thlamuang tak si, boruak rit tak siin Pu Ngura Stadium ah kan thlir ṭhap a nih kha. World Cup Silver ball dawngtu, World cup super star Roberto Baggio an Italy tan Penalty a’n pet over tlat mai kha a va pawi tak em! Italy ṭantu leh Banbun a Biggio hming lo phiar a, lo bun ve far tute mittui a hnam sawk hlawm a, kan khaw pa valai ṭhenkhat pawh an in dawm kun ngawih ngawih hlawm a nih kha. Brazil erawh an thiampuipa Romario ten an khung zat zat mai si a, 3-2 a chakin World Cup vawi 4 Champion thei awm chhun an nih phah ta a nih kha.

Kha World Cup zet kha chu, FIFA World Cup history ah leh Phullen History ah World Cup ropui ber ti a chhal a ni reng tawhin a rinawm.

Thulakna:
Pu J.Pachhunga (FIFA 94 World Cup Commentator) leh World Cup entute titi…

– Buata Bawihtlung

 

Advertisements

Ka Pu kha Zaithiam a ni.

Ka Pu pa kha zai thiam!
(A hlimawm zawngin – Buata)

Hman lai deuh te kha chuan Zaithiam te kha an aw a fawn ve thei viau a ni mai thei.

Ka pu Thanghrima (Upa) pawh kha mahni tawkah, khaw khat zai thei leh aw ṭha kha a ni ve awm asin. A fapa Pu Chhawna te pawh an aw a ṭha hle hlawm.

Pu Thanghrima chu zai ngaina, Zaipawl hruaitu a lo ni bawk nen, a tu leh fate ah pawh zai leh solfa lam chawia hming phuah te pawh an awm phah ve hial.

An hun lai khan Zai fawn hlarh hlarh / hlawrh hlawrh / hlurh hlurh … kha zai thiam tehna pakhat pawh a ni ve a ni mai thei, zai thiam kha chu an zai fawn viau deuh vek hlawm a ni awm e.

Ka pu kha chu a zai thiam hle a niang, midang aiin a la zai fawn leh zual a ni awm e. (Feren ram kal ngat kha a ni reng reng a, a zai thiam hle a niang) Biak In chhunga inkhawmho an zai te hian, pawn aṭang pawhin ka Pu Thanghrima aw kha chu a hriat theih hle a ni awm e.

A zai fawn thei bawk nen. Ṭum khat chu *Pu Lalmuana* chuan, *”Chhawna pa zai em em hi chu, a fawn leh lutuk a, ka awih em em lo e a!”* a ti hial a ni awm asin. 😂😂😂

He thu hi ka Pu (Pu Thanghrima fapa) ten nui bawk bawkin an sawi ka la hre reng.

A fawn ve viau bawk a ni ngei ang

😂😂😂😂

LUANGPAWN KHAWHAR INRIAKTE CHUNGA THIL THLENG MAK KHA!!!!

Luangpawn khua hi Mawmrang tlang chung zawl, chuan hnuai deuh lai, kham rang rei ruaiin a chawi vel a awm a ni a. Kan pi leh pute aṭanga an lo tawn leh sawi fo ṭhi Ramhuai, Ṭaumeichherchhi, Lasi, Phung leh Thlahrang chanchinte pawh an hre tam ve em em a. Luangpawn chhim lamah hian Tlang huai lal Sahmula tual a awma, Hmar lamah Ramhuaiben a awm bawk a. Dik tak chuan, finfiah harsa tak tak thil thleng, hlauh tur pawh a tam ve viau thei awm e.

Eng kum nge ka hre chiah lo, ka Pu Thanzaua (Pu C. Lalfamkima, Pu Lt Col Hminga, etc te pa a ni a, ka Nu Putea a ni – Buata)  te tlangval lai khan a ni awm e. Rambuai hma fe chu a ni phawt mai a. Luangpawn ah mitthi an awm a, tlangvalho chu Khawhar In ah an riak a.

Kum 50 liam taahte kha chuan, tun aiin khua ala changkang lo leh zual a, an In bang te kha Dâp tah, ruahin a nan mawih tawh tak lehnghal, awng deuh pher phuarte kha a ni hlawm a. Hemi ṭuma Khawhar In pawh kha, Bang kil lam dâp chu a mawihin a tlabal awng deuh suar a. Inriak tlangval tan, a kil lama mut pawh kha, bang awng an hnaih ting mai si a, thil chakawm a ni lo.

Tlangvalho chuan mutna an siam sang sang a, Dawihzep deuh tan phei chuan a kil kha midang ken mai awl tak tur a ni reng a. Ka Pu Thanzaua chu a kil ber, dâp mawih chhe deuh hnuang avanga bang pawh awng deuh huau bulah chuan a mu ta a. A ruk tak chuan midangte  khan awng bula mut kha an hrehin an hlau deuh a ni mai thei. 

Zan an mu ta; an reh ta ṭhap mai a. Kawt zawl vela Bawng awmte pawh chuan an Thlanvawng rah ei ṭhial nawn nuau nuau pahin an meiin an dul a hlap rik deuh hlup hlup a. Perhpawng chiri leh eng rannung nge tih hriat lem loh hram ri cherh cherh thawm vel bak thawm hriat tur a awm lem lo. Electric current lah chu, Kumpinu in a nei nge nei lo pawh an la hre lo awm e; pawn lam chu a thim hian a thim mup ringawt mai a. 

Zan a rei zual hret a, tlangvalho an muhil kim tawh ang a tihah chuan, thil mak tak an chungah a lo thleng ta. Pu Thanzaua, a kil bang awng bul a mu chu, ṭe deuh ṭhawt pahin a mutna bula mu mi pathum vel chu a zuan khum zawk mai a. Chu veh tlangvalho chu an harh ta vek a. Dik tak chuan mi kan in ang lo. Sapui leh râl laka zam ngai hauh lote pawh hian, thihdan danglam leh thlahrangte leh ramhuai etc lam thil hi chu, an tilui hlei thei vak bik lo fo.

Chutia Pu Thanzaua a zuang tho ta zawk mai chu, mak an ti a. Tlangvalho pawh an phawk hru hlawm a. Tleirawl deuhte phei chu an ralkhel tak meuh a ni. *”Enga tinge, enngnge thleng ta!”* tiin an zawt a. Pu Thanzaua chuan engdanga chhang lovin, *”Puan chu a la ta.. a la ta!”* a ti a. A puan sin lai chu tunge hriat loh hian a rawn la daih mai a lo ni awm a.

Kan nu leh pa, pi leh pu hunah khan thilmak tak tak an hre fo a. Mitthi awm zan phei hi chuan thil thleng danglam tak tak ngaihbel tur, finfiah tak si loh thilte kha an hre fo ṭhin reng a. Dik tak chuan, an awm dan aṭangin an hlau ru ve deuh vek tih a hriat a. Sa leh ral lam chu an rilruah a awm loh hmel viau bawk a.

Mahse, chutia khawhar Inriak, tlangvalho ve lêm, hlaua tawm reng chu an tum bik hauh lo a. Pu Thanzaua Puan rawn latu chu Tunge niang? Engnge niang? tiin chu puan la daih tu chu hriat ngei an tum a. An rilru tak chuan, ‘tunge ni ang?’ tih aimahin ‘Engin nge la ang?’ tih chu a suangtuah zawk mah a. Huaisen a har duh viau awm e.

Tlangvalho chu, inring tak si, engnge an tawn dawn tih beisei thiam chiah si lo, beisei nei bawk si chuan Puan zawng tur chuan pawnah an chhuak ta a. Mitthi vuiliam zan a ni a, tleirawl deuh tan phei chuan a ṭitawm ru ve viau ngei ang. Mahse, huaisen tak tak an awm ve zel a.

Chutia pawna an han chhuak, In leh a vel an han dap chu, an rin loh tak mai an hmu ta tlat mai.! Chu puan, Pu Thanzaua sin lai ngei mai chu Khawhar In bula Bawng chuan a lo ṭhial nuau nuau mai a. Bawng chuan bang awng aṭang khan Puan chu a lo pet a, a lo kalpui daih chu niin!

Khawhar inriak Tlangvalho, hlau ru deuh, tlawmngai bawk si a Puan zawng tura zanlaia pawna chhuakho khan, Puan latu chu Bawng a ni tih an han hriat tâkah chuan, an nuih a za leh ta em em mai a. Khawhar inriak e tilovin zanlai laiah an nui dir ta char char a ni awm asin.

He thil thleng hi kum tam tak liamhnuah, Bethlehem veng (Aizawl) ah ka pu te khan an sawi ka hria a. Ka pu te, patling meuh pawh kha an la nui dir ngar ngar thei nia. Hahaa

Ka hriatna a rei deuh tawh a, ka hriat dan hi za a za chuan a dik vek lo mai thei.

 

Buata Bawihtlung
BB060620181231AM

 

 

Mobile Phone bih sek hi!

FB_IMG_1527920360966
Khawvel a changkang zel a, thil a danglam ve zel bawk a. Hmasawnna pawh a chak fe tih a hriat a. Hna thawh nan hun kan hmang tam tial tial a, hmaichhanah thian kan inkawm tlem telh telh a, social media kan hmang uar tulh tulh bawk.

Social media hi chu a lo nuam ve bawk lah tak a. Mobile Phone pakhat atangin thil tam tak kan ti thei ta bawk nen, phone kan hmet neuh neuh reng chu a nih tâk hi. Social Media ah hi chuan, rethei leh hauasa kan danglam tam lo a, tumah inngaihnep ngawt theih a ni lo angin, tumah in zah viau hleih theih pawh a ni hek lo. Hmai chhanah kan inhmu miau lo a. Zakzum deuh tan pawh ṭanhmun a ṭha tlat.

Keini ve teh lul pawh hi, Phone kaltlangin, milar, mi thiam, mi hmingthate leh ropui tak takte kiangah telin, kan ngaihdante kan sawi tlang a, kan ti ti ve bawrh bawrh thin a nih hi. Chu Phone kaltlang chuan mi thiam leh mi ropui tak tak, IAS val leh IAY dawngtute, Ni za inhlawhna semtu leh a dawngtute, IPS val leh Zel tang chhuak hlimte nen, chanchinbu mi leh a semtute, Sakhaw rawngbawltu leh Sakawlh hlaute,  Pastor leh policital party hruaitute thlengin kan nui ho bawk bawk thei miau a. Chutiang atana hmanraw tangkai Phone chu, ngainat awl tak a ni.

Han sawi ta zel ila. Phone leh a chhunga awm, Social media kaltlanga kan thian chhar tam takte hi chuan, kan pawisa pai bawm wallet/purse panzia leh kan bank statement a pawisa tlemte rawn intarlang thinte an rawn hmu tel lo a.  Kan vhak loh rukna hrang hrangte min hmuhpui lo mai ni lovin, kan chawhmeh neih chhun, chawtha pai lo zet  zette pawh min rawn hmuh sak ve lem lo. Social media ah chuan kan rank a inang deuh vek mai a nih hi.

Mi tam takten min hmuh leh hriat dan hmasa chu kan lan that ve deuhna Thlalak Social Media a kan phochhuah kha a ni miau a, keini takngial pawh kan lang mam than zel chu a nih hi. Kan nunpui theih bik loh thu ṭha ve zet zet te status ah kan hmang a, mifing leh ril tak ang maia kan lan ve chakte a awm nia. Nuam ve deuh asin!. Heng zawng zawng phen a kan nihna tak, hmel tlabal ve tak hi an rawn hmu lo a. Kan kekawr tlang phuai fuap te, kan tawnzau vang leh da tawh takte, kekawrte mawng pawp lek lekte bakah, kan pheikhawk chhip kau tuarte chu an rawn hmu tel miau lo a! Tumah inkawmserh bik lovin kan ngaihdan kan sawi tlang dial dial thin chu a nih hi.

Dik tak chuan, kan rualpui leh kan kawm phâk tawk, ro nawi ve fe fe, ngaihdan fahrah ve te nei a, sawhsawn harsat ve tak tak si hote pawh Phone kaltlang lo chuan kan kawm hman ta meuh lo leh zel a. Mobile phone hian kan inzawmna chat tur hi min la phuar khawm hram hram ni te hian a  hriat ta rum rum mai. Chuvang chuan keini ang tan hian chuan Mobile Phone hi a va hluin a va tangkai si em!

Chumai a ni lo… Social media a kan thian ropui leh hlu tak takte hian, keini thu leh hla fahrah te te te leh, ngaihdan mawlmang ve tak takte chu min lo LIKE sak thin asin. Hmaichhan a kan biak phak loh leh min be tui lo tur tak tak te pawhin kan thu leh hla mawlmang tak takte chu an ngaihdan fing leh tha tak takin an lo tuihnih ve thin bawk a. Chhura umpuimuhriat a kan lo hriat ve chhunte min han zawh ve khauh chângte hian, keini veng mawng daikilkara a rawntlak loh ber leh nghal te hi chu Thla a in kapkai tluk zetin kan lo hawi pir ve ngawt zel a.

Heng zawng zawngte ka thlir hian, Mobile phone hi a lo tangkai em a, bih sek loh theih pawh a ni lo….!
🤗😂🤗

(Kum 2017 June ni 2 a ka Facebook Wall a ka dah hi hetah hian ka suan lut ve mai mai – Buata Bawihtlung)

MIZO NULA MAN TAM BER – SAINGURI SAILO ?

Pi Lalsainguri Sailo, Phullen lalfanu

Phullen lal fanu Sainguri Sailo

Mizote hian nupui pasal kan inneih dawnin, a hmeichhia zawk hian man an nei thin a. Hei hi hnam dangten an ching ve vak lo a ni mai thei a. Mizote erawh chuan, hma sang atang tawha kan inrochun, tihdan phung a ni a. Chin dan ṭha a ni nge ni lo tih chu, mithiam ten an la chhui fiah turah ngai ila.

Mipa in Hmeichhiate kan lei a ni em:
Hetianga man in hlan hi, a lan dan chuan, mipa ten hmeichhiate hi kan lei a ni ber mai a. Hmeichhia te chu bungrua emaw ang maia ngaih theih lek lekin man an nei a, an man pek hnuah chuan, a leitu mipa ta a ni tawh thin. Man leh  mual sawifel hnuah ringawt pawh mipa lam ten hmeichhia (nula) chungah chuan an inti neitu hle ṭhin a, Man inhlan hnu ah ngat phei chuan, hmeichhia zawk kha mipa ta a ni fel hle a ngaih a ni. Chutiang a nih rual chuan, hmeichhe man kan inpek dan leh kan sawngbawl dan vel hi chu thil dang kan lei dan nen chuan a inang chiah lo deuh chuan a hriat bawk si.

Hmeichhe man a in ang vek lo:
Hmeichhe man hi, kan pi leh pute atanga kan rochhun, tihdan thin a ni a, chuvang chuan tun thlengin man kan la inhlan zel a. Tun hma chuan lal fanu man chu Rs 300 te pawh an lo ti ṭhin a ni awm e. Chutiangin Mizo hnam peng hrang hrangte zingah pawh, hmeichhe man kan inchhiar dan hi a inang vek lem lo a, Pachuau te pawhin an inchhiar to deuh ṭhin a ni awm e. Mizo hnam hrang hrang zingah hmeichhe man atan  Rs 420 hi tun thlenga hman tlang lawn tak a la ni. Tun hma kan nu leh pa, pi leh pute hunah chuan Hmeichhe man hi an in bat sak fo ṭhin a, tun laiah erawh kan in batsak ngai lo ti ila a dik awm e.

Mizo hmeichhe man tam ber Pi Sainguri Sailo:
Ka hriat ve theih chin a, Mizo hmeichhiate zinga man tam ber chu Phullen lal Pu Awksarala fanu upa ber Pi Sainguri Sailo a ni. Tumkhat chu Pi Sainguri hian inleng a nei a, a pa lal Awksarala chu an rawn bia a. Lal fanu Sainguri chuan pasal la neih rih loh chu a duh deuh a. A pa pawh chuan pasal la nei hrih lo se a duh a, mawihnai taka hnar dan tur a ngaihtuah rauh ruah a. A fanu man chu tam tham tak, a rawn be tute neihin a tlin loh tur khawpa tam chhiar chu lo hnarna atan a ruahman a ni awm e. Tichuan Pu Awksarala chuan a fanu Sainguri Sailo man atan chuan Rs 1500/- (Sangkhat zanga) a chhiar ta a.

Pi Sainguri Sailo pasal neih kum hi 1940/41 bawr vel ni a ngaih a ni a. Cheng sangkhat zanga hi  kum 1940-41 vel khan Rs 244000 /- (nuaih hnih sing li sang li) vel zet a ni. (Hei hi infogram.com in pawisa hlutna a chhut dan behchhan a chhut a ni a. Infogram.com in a chhut dan chuan kum 1940-41 vela Re 1 chu kum 2013-14 khan Rs 162.6666 a ni a. Tichuan khatih lai (1940-41) vela Rs 1500 chu kum 2013 angah khan Rs 244000 /- vel zet a ni. Chutiang zat zat chu  nei harsa tak a ni a, Pu Awsarala pawh chuan, an inlengte chu an reh zui mai a ring a ni awm e.

Pi Sainguri man atan a bûk zât hu Pawisa seng ngam:
Tichuan inleng Palaite chuan anmahni tirtu Pu Henkaia hnenah chuan an indawrna thu chu an hawn ta a. Pu Awksarala chuan a fanu man atan Rs 1500 /- a lo chhiar thu chu an thlen a. Pu Henkaia chu a lo lawm em em zawk mai a. Pi Sainguri man atan chuan, a bûk zât (Pi Saingur rih zawng ang pawisa) pawh chhiar se ka ngam ang chu” a lo la ti ta deuh deuh zawk a. Khatih lai khan pawisa thir an hmang ṭhin a, Pi Sainguri bûk tâwk ang vel tura an chhut chu Rs 3200 (Sang thum zahnih) a ni a. Khatih laia Rs 3200 kha, kum 2013-14 vel khan Rs 520533.12 (Nuaih nga, singhnih leh zanga sawm thum pathum) lai a ni.

A man pangngai bakah thil hlu dang pawh:
Tichuan, Pu Awksarala chuan a fanu man atana a chhiar chu a inleng Pu Henkaia chuan a ngam a ni tih a hriat chuan mak a ti hle a. Khatih lai khan Sailo lal an la ropui hle a, Pu Henkaia kha Paihte hnam ṭha a ni na a, Sailo lalfanu Pi Sainguri chu khaw mipuite pawhin an ui ve deuh a ni awm e. Mahse, lal Awksarala chuan, “Thu ka lo tiam tawh a, mahni thutiam ngei bawhchhiat chu a dik lo e” tiin a insawirempui ta a. Pu Henkaia hian pawisa Rs 1500 /- mai bakah thil dang hlu tak tak – Silai leh thil dangte pawh a la pe tel hial niin an sawi nghe nghe a ni.

Pu Henkaia hi Burma rama Sipai bungrua vel supply a sumdawng a ni a, a taimain a hausa hle mai a. Chuvang chuan Rs 1500/- chu a lo nei hle a lo ni awm a. Tichuan Pi Sainguri pawh, a pa thu awihin pasal chu a nei ta a. Hlim taka awmin chhungkua an din a, Shillong-ah te an awm hnuah, tunah chuan USA ah an inbengbel tawh a ni.

Pi Sainguri man to zia chu a hun lai mite sawi leh titi a tling a. Hriat theih chinah Mizo nula man tam ber niin a thang nasa hle a ni. Pi Sainguri hi nu leh pa thu awih tak, nula fel tak, hriselna ngaipawimawh mi a ni a. Tunah hian kum 93 mi niin USA ah a awm a, a hmel pawh a la tha hle a ni. Tun thlenga damna leh hriselna a la neih theihna chhan pawh, a pa thu a awih a, zuk leh hmuan a tih loh vangte niin a sawi ṭhin a ni awm e.

Mizo hmeichhe man tam ber Pi Sainguri Sailo, Phullen lalfanu hi, dam reng turin duhsakna ka hlan e.

 

Buata Bawihtlung
BB220520180545PM

Awksarala – Phullen lal

Chief Awksarala, buata album JPG

Phullen lal Awksarala hi a hming a danglam hle a. Amah pawh hi pa danglam tak a ni a. Lal fing leh huaisen tak, pasaltha, rorel thiam, thatchhiat ngai thei lo leh taima tak, kuthemthiam tak, hriselna ngaipawimawh em em mi, fiamthu ngaina, Kohhran duhdan kalha rorel ngai lo mi, a hunlaia lal ho zingah pawh a hotu zinga tel pha a ni a. A chanchin sawi tur a tam hle.

Khandaih lal Vanphunga fapa a ni:
Awksarala hi Khandaih lal Vanphunga Sailo leh lalnu Lalkaichhungi te fapa niin, kum 1894 March ni 21 (Nilaini) khan a lo piang a. A pa Vanphunga Sailo kha lal ropui tak a ni a. Kum 1901 chhiarpui ah khan Vanphunga khua Khandaih kha Mizoram khaw lian ber a ni a, Zawlbuk pawh pahnih an nei a ni.

A hming phuah chhan:
Awksarala hming hi a danglam hle a, a hming phuah chhan chu hetiang hi a ni. Awksarala pian lai tak March ni 21, 1894 khan Awkin Thla a lem a, khua chu a thim mup mai a. A pian lai tak kher kher a Awkin Thla a lem chu mak an ti hle a. Chuvang chuan a hmingah AWKSARALA tiin an phuah ta a ni.

He Thla Awklem hi March ni 21, 1894 Nilaini dar 7:50:33 PM vela thleng kha a nih a rinawm a. Kha Thlaawklem khan dar kar 1 chuang a awh a, Mizoram atang pawhin a langchiang hle a ni awm e.

Kum 18 a nihin lal a ni ṭan:
Awksarala hi kum 18 a tling chang chang tihin lal a ni a. Kum 1911 khan a pa Vanphunga lalram chhung Thanglailungah khua a din a.  In 270 zet an ni nghal a, chutah chuan lal a ni zui nghal a. Hemi hma hian Changzawl hmunah Vanphunga hoin an awm a, Thanglailungah Awksarala lalah a thut tir a. Vanphunga chuan lalram zauh zelin Bawrhsapin a pek Vanbawng ram lamah khaw thar din san leh ta a ni.

Pu Awksarala hi lal a nih hian la nau hle mahse a felin lal nih chu a thiam hle a. Amah a lianin a chak tha a, ramvah leh hnathawhte a taima a, thatchhiat a ngai thei lo bawk a, a khua leh tuite pawh an intodelh phah hle a ni an ti.

Kutthemthiam tak a ni:
Pu Awksarala kha a kut a themthiam hle a, kum 1930 hmalamah daih tawhah khan Phullen Kohhran Pulpit tur hi amah ngeiin a siam a, a thain a mawi hle nghe nghe. Tin, thildang, Thingrem, Thutthleng etc te pawh amah ngeiin nalh tak takin a siam thin a. Silai kawm te pawh, a chhiat chuan a siam tha mai thin an ti. Tun thleng pawh hian a kuthnute hi hmuh theihin a la awm nual a ni.

Zaipawl Conductor a ni:
A pa Vanphunga kha Kristian dotu nimahse, Thlarauthianghlim zarah piantharna a chang a, Kristian tana tangkai tak a ni zui ang khan Awksarala pawh hi Kristian a ni a. Kohhran Zaipawlahte pawh phur takin a tel ve a, Zaipawl kaihruaitu (Conductor) a ni ve nghe nghe a. Zaipawl kaihruaia Solfa an vai phei chu, khawdang ten an awt thin hle a ni awm e.

Kohhran kalhin ro a rel ngai lo:
Kum 60 a dam a, kum 40 zet ro a rel hman a. Rorel thiam tak a ni a, khawtlang thiltih tur hnatlang emawte an rel reng rengin “He kan hun ruata Kohhranin hnatlang emaw thilpawimawh emaw a nei dawn a nih chuan, keini chu nidangah ti mai ila” tiin Kohhran a ngaichang zel thin a. A thlanlungah pawh “Kohhran kalhin ro a rel ngai lo” tih an chhu kai hial a ni.

Khaw chin a chhut lawk thiam:
A fin dan leh thil a chik dan kha mak tak a ni a. An in bul dam lamah leh nikang lamah lei a lai khuar a. Chutah chuan lung a dah a, lung phekin a chhin phui leh thlap thin a. Chu a lung dah chu zingkarah a en thin a, a chang chuan a fapa Lalngura te a entir thin bawk a ni awm e. Chu lunga tuihu a lo beh emaw a lo ro hak emaw atangin ruah sur tur leh tur loh kha a sawi lawk thin a. Chuvang chuan Phullen chuan lo an hal sual ngai meuh lo a, khaw thenawmte pawhin Phullen lo hal hun hi an ngaichang thap thin an ti.

Hriselna ngaipawimawh mi a ni:
Hriselna ngaipawimawh mi tak a ni a. A khua leh tuite damlohna emaw harsatna dang emaw an neihin, puih ngei ngei a duh thin a. Natna tlanglawn takte phei hi chu a enkawl dam ve mai thin a ni awm e. Khawmhma thur takte hi kaw thuah nan te a lo hmang ve thin a ni awm e. Tin, a fate hnenah zu leh meiziakte ti lo turin a fuih ngar ngar a. Amah pawh khan zu a in ngai lo niin an sawi.

Thatchhiat a ngaithei lo:
Pu Awka kha a taima a, thil siamte a peih em em a. A In ralah hian huan zau deuh a nei bawk a. Chutah chuan Thingpuite, Ser te a ching thin a. Intodelh loh kha a hlau hle thin. Aizawla a kal tum pawhin Thingpui chi a ak haw teuh a, aman a kui tiak a, chu chu a khua ten an duh duh a an chin turin a pe a. Thingpui pawh an intodelh phah hle a ni. Thatchhiat a ngai thei lo hle a, a khua te loah upate nen an kal kual thin a. An lo a lo hnim deuh chuan, “E khai, in taimak vei nen, in dam lo a niang maw? Kaichhante sawm ula” te a ti a. Mi thenkhatte erawh chu a kamkhat na viau thin bawk a ni awm e.  Lal in a kamkhat nih kha an hlau hle thin an ti.

Fiamthu ngaina leh inphahhniam theitak a ni:
Pa fiamthu duh tak a ni a, a khua leh tuite pawhin an ngaina hle a. Tumkhat chu an fiamthu a lo sang deuh nge ni, lal leh a upateho kianga tal tam ve tak Pu Rualhmima chu an khaw hmeithai unau hmeltha deuh chu zen turin, fiamthu titak deuhin an lo sawi phurpui fiam a. Chu hmeithai chuan amah Pu Awksarala hnenah thlenin, “Lei i chawi tur a ni” a ti a. Pu Awksarala pawh chuan, “A ni maw, kan lo thiam lo a ni, Lei chu kan chawi ang e” a lo ti dam duai mai a. Amah leh a upate chuan Vawk an chawi ta a ni awm e. A tul hunah chuan hmeithai lakah pawh a tlawm mai theite hi a fakawm hle.

Lalho zingah hruaitu a ni:
British in India a awp lai a ni a, Mizoram pawh min awp tel a. Khatih lai khan Mizoram chu Lushai Hills tih a ni a. Mizo lal ho Chief Council ah khan Pu Awksarala kha Vice President a ni a. Ziak leh chhiar a thiam bawk nen, a fingin a fel hle a, rorel pawh a thiam hle a ni awm e.

A hun hnuhnung:
Ram kalphung inthlak khan a nangching a, kum 1954 a Mizorama lalte ban an nih khan Pu Awksarala pawh hi a tel ve a. Khawtlang rorelna chu Village Council kutah a lut ta a. Awksarala hi a hrisel hle na a, thawhhah natna a nei a. Tichuan, Phullen lal Awsarala pawh chu March ni 30, 1954 chhun dar 11:00 ah Thawhhah (Astma) natna vangin Thlamuang leh hlim takin a chawl ta a ni.

Amah hi Pathian chhandamnaah a chiang em em a, a lawm hle a. A thih dawn hnaih, natna khuma a mut tawh hnuah pawh Pathianah a lawm a, chhandamna thu hi hlim takin Pu Neihruma kha a hrilh nghe nghe a ni.