Kan Inneih champha Sept 25 ah tak Beirual kan thleng, kan nihlawh hle.

 

Ni 25th September, 2017 hi kan Inneih champha vawi 3-na a ni a. Hemi zan hian Tuikhuahtlang Presbyterian Kohhran Upa Bial 2-na Beirual inkhawm kan dawng hlauh mai a. Kan chhungkaw ni pawimawh tak mai, kan Nu nena Chhungkua kan din ni champha ah tak mai, Pathian Kohhran hote hun pawimawh Beirual dawng tura tih kan ni hi a lawmawmin, ngaihtuah chian phei chuan amak zawk hial a, nihlawh ka inti tak zet a ni.

Theih ang tawkin kan In te singsain kan inpuahchah ve a. Programme leh chanvo chelhtu tura ruatte chu –

A hmun       :   Pu Lalbuatsaiha In (H.No 35/A)
Hruaitu       :   Pi Lalthangzauvi
Tantu           :   Nl Lalthanpari
Thupui        :   CHHUNGKUA (Gen 2:18-25)
Hawngtu     :  Pi Lallawmzuali

Inkhawm tan hma, hma deuh takah Thupui hawngtu tur Pi Lawmi a lo kal a, thutna rem dante kan tih fuh loh hlauvin a rawn enfiah a, min ngaihvenpui hle tih a hriat a, a lawmawm ngawt mai.

Inkhawm tan hmain tui taka zaiho a ni a, hla pali – KHB No 294 “Ka chenna ram thlaler a ni Lalpa”  tih hlate, KHB No 163 “Sualin bo mah ila, tu dang ka thlang chuang lo” tihte, KHB 270 “Chhandamtu, chatuan nun nan” tih hlate, KHB No 324 “Lalpa, i aw nema” tihte, KHB No. 2016 “Ka sual atan, ka Tlantuin” tih hlate an ni.

Dar 7:00 PM ah tan a ni a, inkhawm hruaituin Bible chang – Josua 24: 14-20 “Tin, Lalpa rawngbawl hi tha lo awm anga in hriat chuan vawiinah hian tu rawng nge inbawl dawn thlang mai rawh u; in thlahtuten luirala arawng anbawl thin pathian te kha nge, inluah ram Amor-hote pathian te kha? Kei leh ka chhungte erawh hi zawngin Lalpa rawng ania kan bawl dawn ni,” tih chu chhiar chhuakin, tawngtaina a hman zawh hnuah, Upa Bial 2-na Secretary Tv Lalthankima Colney chu hun hmandan tur tlangpui leh hriat tur pawimawhte a puang a. Inkhawm tantui Nl Lalthanpari chuan Thupui innghahna Bible chang – Gen 2:18-25 chu a chhiar a, a tawngtai zawh hnuin, inkhawm hruaituin Thupui hawngtu a sawm a.

Thupui hawngtu Pi Lawmzuali hian uluk tak leh thiam takin, muang fan raihin Thupui zirho tur a chhiar chhuak a, sawi zawm chakawm takin a sawi hawng a. Tichuan inkhawm hoten sawihona neih zui nghal a ni.

 

 

 

 

Advertisements

Ei leh in lam chungchang – Titi mai mai.

Ka vanneihna deuh pakhat chu, ei theih loh leh ei duh loh em em ka nei lo hi a ni😂. Kan la ei than lem loh thil, chaw a rin a ngaih chang pawh hian, ka ti thei fu zel mai.

Hman deuh khan, kan zinpui pakhat (Kohhran Upa) chuan, chawlhkar khat zet kan châm hnuah, a chhungte a phone a, zawi sap a tawngin “chaw mumal kan la ei lo a” a tih lai ka hre ru pek a, kei lah ka lo puar viau zel mai si, ka nuih a za deuh si, ka khawngaih angreng bawk si. Ka hre lo der zui ta a.😀

Trum khat , thianpa Zahawma Kawlkulh te Lawmsiama Hlawndo te ho nen, Assam Riffle tirhin, a changa VIP hmel tak, Governor te chibai ve zak zak chung a, chhuata kan mut leh ang lawp lawpna thung si naah, nikhat chu hmun kan tlawh na a kan chawchhun tura an sem, a tui viau lo a niang, ei duh lo an awm nual a, ei hlei thei lo thiante ei ai kan ei kêp ngei bawk ah. Tui hi ka ti viau zel mai a.😂

Engkum ber kha nge ni, Rza Renthlei Chalrel, Marina Lalrinzuala te nen, thianhova zin a, Marina Nu leh pa (Missionary) te tlawh ve ngei kha kan duh tlat a. Tleirawl ta chu, pawisa nei hek lo i; hawna man tur chu sawi loh, kal lam man kan nei daih meuh lo a. Haw lam man chu inhlawh chawp mai turin kan chhuak ta a. Pawisa ren nan Polythene in chaw kan fun a, Silchar atanga Rel te chi a chhuakin, tlaiah kan chawfun chu kan kil ve mam mam a, kan puar ve viau a, mi chuan min nuihzat deuh.😂

Vawikhat chu thianpa Jerry Lalngaihzuala nen, chaw ei lova kan Bazar chu kan rei hle mai a. Zan rei lamah kan riltam chu, chaw eina kan melh ta a. Sa ei lohna hmun a châm reng tawh ta chu Sa rawp a na a, mahse Sa siam lohna dawrah kan lut teh tlat a. Kan chah hnem deuh an ti nge ni, mak min tih hmel viau a. Kan ei zo trep, kan puar an ring ve a nih hmel, min en hu a; kan hmel danglam vang zawk nge ni! Bill an rawn dah hnuah thianpa #Jerry-a a la puar mar tha tawk tlat lo pek a..! min viltute nen kan nui tlang thre thraw kha a nia.! A nuam ve angreng thin.

Trum khat chu Denny Z Chhehlawn te nen, mipawimawh ho zarah khualtha thlenin min lo thleng ve a. Eitur a tlar tam ve ngang a, min viltute lah an tuihnai. Sa ei chi leh sa ei lo chite ei duh turte, ei hma leh ei hnu thil behbawm a tam fu. Hetiangah hian ka khawr ru thei riau a, mahse mi tihdan entawn zel theih a. Thianpa #Denny te mi ei hnuah eina hmun an rawn lut, an hawi vut vut a, eitur an chhawp te chu suah kim vek an tum emaw tihturin Plate leh bowl engemaw zat chu an kuah khawm trun ai a. A viltute nuihza lutuk, nui lang ngam chiah si lo insum kha ka mitthlaah a la fiah hle.

Vawikhat chu Pu Zion a hnung zuiin ka kal ve a. Kan chuanna a min viltu fel tak hnenah Coffee thlum lo a chah a, keiin a thlum ka chah a. A lo thleng hmasa kha #Pu Ziona chuan a in a, a ngawi reng sia, keiin a hnuhnung chu ka in ve mai a, tui ka ti loh mai piah lamah, ka in dawnin kan chuanna a che hluk a, ka hmui a rawn chiah ta hlup a, a sa bawk si, ka hmui chu a kang titih ta! Zinna ah chuan thla kan la ve sek thin bawk si a, a fuh lo ngei..hahaa. Kan chah loh zawk ve ve kan lo in a lo ni a.

Vawikhat leh chu thianpa Rla John Platonic te nen kan zin chhuak a, kan zinkawng kar chawlhna thingpui siamtu hnenah, “ani saw chuan tuilum chi al a duh a” a lo ti niin, thiante Thingpui in laiin Tuilum chial min lo pe bik a, ka in ta tho a. Hahaa.

Hman deuh khan kan zinnaah chaw ei min lo siam sak ve a, chu khaw thlen hma khuaah chuan kan zinpui chhungte inah kan chawl a, ril a tram si, vawksa tuihmel deuh kha an chhum hluah bawk si, “tlem tal ei ula, sawtah in ei nawn leh mai ang a” an tia. Kan insum zo lo, kan ei ta, riltram tan tlemte ei a harsa si, a tui si. Tichuan kan tumramah chuan kan thleng leh a, chaw an siam ta. Kan ei thei ta lo, min lo siamsaktute ngaih a tha thei lo, kan eitawh tih sawi ngam a ni si lo….. “Mut a chhuak em a ni” kan ti kan ti ringawt a. Hahaa.

Ka Pianna Phullen

Thu hma:
Phullen hi Vanphunga Sailo in a din a ni a. A tirah chuan Khandaih khua tih thin a ni. Tun hma chuan lalram pakhat chhungah pawh khaw hmun an thlak sek thin a. Hei hi an lo neihna tur ram tha lai an zuan duh vangte leh chhan dang vangte a ni thin. Vanphunga khua pawh hi a tirah Khandaih hmunah an awm avangin Khandaih khua tih a ni a, chu chu Tuna Bethel lungdawh awmna Khandaih khaw hmun hlui hi a ni. A hnu deuh ah Phullen hmunah an awm a, Phullen hming a pu leh ta a ni.

Khandaih lo pian dan leh a hunlai dinhmun:
Kum 1901 khan Sailo lal ropui Pawibawia fate zinga upa ber Vanphunga chu Sihfa atangin Khandaih ah hian a kai a. Vanphunga hi a fingin a fel bawk a, Khandaih hi khaw ropui leh nuam takah a siam a. Rev Liangkhaia sawi dan chuan In 550 zet an ni a ti a. Dr Lalzama Ex Minister chuan In 400 chuang zet, khaw nuam tak a ni e a ti bawk a, Upa Dohmingthanga vethung chuan In 500 chuang an ni a, Mizorama khaw lian ber a ni a, Biate in a dawt a ti bawk a, tin Upa Khuangchhana chuan In 700 an ni a, Mizoram hmar lama khaw lian ber an ni a ti a, chutiang bawkin Pu Vanthuampuia chuan In 700 zet an ni a ti bawk. Heti taka Khandaih a len na chhan chu Saitual lalnu Rohlupuii, Vanphunga nupui a thih avanga a khua ten Vanphunga Khandaih an rawh belh vang a ni ve bawk a. Engpawhnise, Khandaih kha Mizoramah pawh khaw lar leh pawimawh tak a ni tih chu a chan chin hrang hrang atang hian a hriat theih a, Zawlbuk pawh pahnih an nei a ni.

Khandaih hming a put chhan:
Khandaih hming a put chhan hi ziaka chhinchhiah awm lo mahse, pi leh pute atanga tawngka a an inhlan chhawn dan chu hetiang hi a ni. Hmanlaiin mizo palsaltha ten helai hmunah hian ral an that a, an ral thah chu a pang a lum rein, a dai lawk lo va. Thing an kham a, thangte an dawh a, an ral thah ruang chu an khang kang ta a, tichuan chu ruang chu a daih thleng chuan an khang ta a, chuvang chuan chulai hmun chu Khandaih an ti zui ta a ni.

Thingtlang Sikul hmasa ber Khandaih Sikul din a ni:
Khandaihah hian Mizoram chanchina chhinchhiah tlak tak tak tam tak a awm a. Thingtlanga Sikul hmasa ber ni turin Zosap te leh Sorkar te ruahmannain August ni 1, 1903 khan Khandaih ah hian Sikul nghet din a ni a. Hei hi hmun danga thla thum sikul an tihte nen a inang lo a, Khandaih hi chu Sikul nghet, a hnu atana ruahman sa a ni. He Khandaih Sikul a zirtirtu hmasa ber leh a din tira sulsutu chu Pu Hrangsaipuia, Vanphunga khawnbawl upa Vawma fapa a ni. Hrangsaipuia hi Zosap kiangah lehkha zira awm a ni a. Sikul din a nih dawn hian zosap ten Khandaih ah hian an tir haw a ni. Sikul hi tun a Bethel lung an phunna hmunah hian an sa a, a tirah chuan a chanve lei, a chanve a kangin an sa a. Sikul a inziak lut pawh an tam hle a, naupang aiin tlangval an tam a, mi 116 zet an inziak lut niin Pu Hranga Diary ah a lan thu Kohhran chin chanchin ziahnaah a awm a, tin Upa Dohmingthanga pawhin mi 116 an inziah luh thu a sawi bawk. Ziaktu dang Upa Khuangchhana leh Pu Vanthuampuiate chuan Khandaih sikul hmingziak hi mi 160 an ni e an ti bawk a. A dik zawk hre mai lo mah ila, kan hriat theih chu mi 100 chuang zetin hming an ziak tihna a ni a, an tam hle a ni.

Khandaiah ah Kristianna leh Hripui a lo thleng:
Khandaih lal Vanphunga hi intodelh loh hlau a ni a. Sikul din a nih khan Pathian thu an sawi a, Pathianthu awih an lo pung zel a. Pathian thuawih hmasate chu November ni 2, 1904 Nilaini khan Zosaphluia khan Khandaihah hian kalin Baptisma a chan tir nghe nghe a. Mi engemaw zat a Baptis a, hei hi Khandaih a Kristian Baptisma chang hmasa berte an ni a. Zosaphluia (Rev. DE Jones) hi Kohhran hruaitu hmasaten Aizawl atangin an tawiawm a ni. Baptisma chang zingah hian Mizo Kristian Martar hmasa ber Tv Chalbuanga Chhangte kum 1906 a Martar ta pawh a tel ve a ni.

Kum 1905 kum tawp lam khan Khandaihah hripui a lo thleng thut mai a. Tumkhat chu December ni 3, 1905 khan Lal Vanphunga khawnbawl upa pakhat chu Lal ina Zu an in laiin a kua a khawh a, puak haw ngai hial khawpin a chau nghal a, a ni la la chuan a thi ta mai a. Tichuan hri chu a darh ta a, mipuite chu hri hlauin ram lamahte an tlan darh a, khaw dangahte pawh an pem bawk a. Chu hri leng chu Pathian thu awih hovin Ramhuai lal Sahmula an tihthinrim vanga lo thlengah an ngai a. Sorkar mi tirh compounder in Tuikhurah te tuihri damdawi a phul te pawh chu, an mahni tih hlumna tura dawi an phulah an ngai tlat a, a buaithlak hle a ni awm e. He Khandaih hripui vang hian puitling pawh mi 50 chuang zet an thi hman a, an inphum seng lo thelh a ni an ti.

 
Khandaih Harhna leh Kristian tihduhdahna:
Kum 1906 April thla ah Khandaih chuan, khawtlang huapin zan thum riak Sangha tlangvuak Tuivaiah an nei a. Chu an Sangha tlang vuaknaah chuan April ni 8, 1906 Pathianni ah Hnuneka Pawihte atanga intanin Harhna a lo thleng a. Pathian thuawihte chu an zai a, kutbengin an lamkual a, chuchuan midang a kai chhawng zel a. Luuidungah chuan hlim takin an zai a, haw kawngah te pawh zai zelin, In thlengin an zai zawm zat a. Pu Neihruma chuan hla chang a sawi a, hla hi vawi 30 te an la nawn thin a ni. Hei hi mipui vantlang hmuh leh hriat theih a Mizorama harhna hmasa ber a ni. Mak deuh chu Khandaih a harhna a thlen tuk April ni 9, 1906 ah Aizawl ah a thleng ve chiah a ni.

Khandaihah Kristian an pung ta hluai mai chu Lal leh upate chuan an ngaithiam lo hle a. Kristian ten Chawlhni an serh te chu intodelh lohna kawng niin an ngai a. Nitin kawl a nichhuak chhiara fehchhuah pawhin hawp khawp thar a har nen, engtin nge Kham an thar ang le? tiin Chawlhni serh te chu an duh lo hle a. Tichuan kawng hrang hrangin Kristiante chu an ti duhdah ta a. Heta tihduhdahna a hluar tan hi May 1906 a ni. Hemi kal zelah hian Khandaih tlangval fel leh fing tak, taima bawk si Chalbuanga Chhangte, Thilluta fapa chu, Kristian a nih avanga a kut tuar chu a thihpui a, 1906 khan a martar ta a ni. Ani hi Mizo zinga Kristian martar hmasa ber a ni.

 
Khaw hmun sawn kual a ni:
Khandaihah Hripui a lo thleng chu Kristian ten ramhuai lal Sahmula an ti thinrim nia an ngaih avang chuan khaw hmun sawn a tul an ti a, Changzawl kai an rilruk a. Kum 1906 pawltlakah Changzawl kai turin Kawnpuiah bawk an khawh a. A tirah lal leh upate chu an kai hmasa a, a hnuah mipui tan zawi muangin an zui leh a ni. Kawnpui ah pawh hian Kristiante chu an tiduhdah zui zel a. Heta an awm lai hian a ram a hrisel lo nge ni, mi tam tak an thi a, Kristiante tihduhdahna a nasa bawk nen, pemchhuak pawh an awm nual a. Tichuan kum 1907 ah chuan Changzawlah chuan an kai ta a. Kristiante erawh chu kai ve an phal lo a. Kristiante chu an zualko ta a, Bawrhsap thu angin Changzawlah chuan an kai ve an phal tlaikhaw hnu chauh a ni.

Kum 1909 ah Vanphunga chuan a khawnbawl upa Lalbawnga chu Luangpawnah tlang hran neiin a thut tir ve a. Mahse a hnuah Lalbawnga chuan Sailo ni ve lo, lal a awm chu nuam a ti lo va, Vanphunga fapa Lalbuaia Sailo chu Luangpawn lal a dah turin Vanphunga hnenah chuan a dil a. Tih tak zeta a dil avang leh pemsan hial a a vau avangin kum 1912 khan Lalbuaia chu Luangpawnah lalin a awm ta a. Kum 1910 ah Changzawl atangin Thanglailungah an kai leh. Heta tang hian Vanphunga chuan Vanbawng hmunah khaw thar a din a. A khaw pangngai, Thanglailunga mi chu a fapa Awksarala chu a awp tir a. Hripui vanga thihna leh khawdanga tlanchhiatsan te, Kristian tihduhdahna vanga pem tate an awm bawk nen, a hma a khaw lian tak ni thin kha, in 200 awrh chauh an ni ta a ni. Thanglailungah hmuna an awm lai hian Biak In leh Sikul inkawp thin pawh a hrangin in an nei tawh a ni.

Kum 1914 ah lal Awksarala hovin Thirhlumah an kai a, kai ve lo tam tak chu Phullenah hmunah an kai bawk a. Kum 5 vel chauh an awm hman tihah, chutia lal pakhat awpna hnuaia awm si, a hranga awm chu tha an ti lo va, kum 1920 khan Thirhlum leh Phullen hmuna awmte chu Changzawlah an kai leh a. Changzawlah hian kum 6 vel an awm tihah Bawrhsap chuan thupek a chhuah ta a. Lal ten an duh duhin khaw thar an kai mai mai tur a ni lo va, an khua te theuh chu mumal tak leh falfai takin an awp theuh tur a ni a, Thlanmual te pawh hmun bik mumal tak siam tur a ni tih thu chhuah a ni a. Chuvang chuan khaw hmun rem leh an ram chhung khaikhawm tha lai Phullen hmunah chuan kum 1926 khan lal Awksarala hovin an kai ta a. Tichuan Phullen ah chuan khaw hmun nghet an din ta a. A hmaa Khandaih ni thin kha 1926 atang a Sorkar lamin mumal zawka khua a chhinchhiah leh khawthar kai a phal tak loh atang khan, Phullen hming a pu ta a ni.

 
Phullen chu hmun rem lamah sawn a ni:
Ramin hma a sawn zel a, tlangchhipa awm chu thil a harsat avangin Phullen khawhlui atangin chuan Sorkar ruahmannain khaw chuan hnuai lam, tuna Phullen khaw awmna lamah hian zawi zawin an insawn leh ta a. Hetih lai hian Sorkar hmalakna thovin chhungkaw engemaw zat chu Thanglailung lamah an insuan bawk a. Tichuan kum 1990 vel khan Phullen hming put chhan tak hmun chu rauhsanin, tuna Phullen awmnaah hian an insuan ta hlawm a ni.

(Chhunzawm leh tum a ni- Buata Bawihtlung)

Ka Site dang thenkhat

       A hnuaia tarlan hrang hrang ah hian ka hman chang changin ka lut thin a, ka thu leh hla, ka rilru a awm te leh thlalak te ka dah khawm ve thin.

http://b-buata.blogspot.in/

https://about.me/Buata_Bawihtlung

https://www.facebook.com/b.buata

https://twitter.com/buata_bawitlung

https://buatabawihtlung.wordpress.com/

http://en.netlog.com/buata_bawitlung

KEIMAH PAWIHTE

Kei hi Mizoram hmar lam pang atanga lo chawrchhuak ka ni a.. Mizo chhungkua, kuthnathawk a eizawng chhungkua, Thingtlang a piang leh seilian ka ni.

Naupan laia khawlaiah Chi leh CHAWTHING  TLANG  keng chhuak a, Arpui in a um tawh hnu  ka nia. Kan rualpui hmeichhia te TUITHAK siam ka tem ve tawh a. SEPHUNG laih nawmzia ka tem tawh bawk a, Helicopter thlawk ka bye bye ve fo tawh a. Zanah phuahchawp Carol service, miin ah kan nei ve tawh a, Tualzawla INHNAWK leh thian te nena INHAWNGBI te, INRAL-LEM-CHAN naah thianten min kap hlum fo tawh bawk.Rual U deuh ten an fuihpawrhna avangin KHAWIFUNG bu(thlar) te chu kut leh hmai vung ul khawpin, kut lawng ngat in ka zut tla tawh bawk.. Class III ka nih laiin kan class ah Fail ah pakhatna ka ni a, khatih laia kan Headteacher khan AWARD (fiamthu deuhin) min pe ve ngat..

Mahni chi leh kuang lamah i han hrut leh teh ang.. Kan historian ten Pawih ral hlauhawm zia an sawi leh an ziak han hmuh ve te hian “Pawih ho chu le??” te ka lo ti ve mai mai thin a. Tute nge Pawi/Pawih ho chu tih lam pawh ka lo ngaihtuah vak ngai lem lo.

Mahni hnamah hian a lo bo ve theih khawp mai a; mahse Mizo ka nihna ah chuan bo chu ka la inti bik chuang hlei lova. Pawi/Lai, paihte, hmar, lusei, kuki, ralte, mara, etc. a enga pawh hi ni ila, Mizo kan ni vek tihah hian ka lo chiang tawk ve em em thin a. Keimah pawh chu Pawih/ Pawi ka ni tih ka inhre ve tawp a, hmanlaia ‘Pawih/Pawi ral lian’ an tih te chu midang daih ah ka lo ruat ve ngawt zel a. Mahse, kan pu te an lo ni reng sia..

Mizo chanchin hlui (history) ziak tu thenkhat fimkhur lo deuh te phei chuan ‘Mizo leh Pawih an indo” ti tein an ziak ve bawk a. Mizo ka ni a, Pawih ka ni bawk si a, a bo theih thin khawp mai.. Ka pu (Pawih/Pawi) te khan Mizo ho an runa, tichuan ka Pu(Mizo) te vek chuan Pawih ho an run ve bawk dawn tihna emmawni le? te ka lo ti thin..? Mahse, Mizo leh Pawih/Pawi te kha indo lovin, Zo hnahthlak hnam hrang hrang Lusei leh Pawih te, Ralte, Hmar, etc te chu an lo indo thin zawk a lo ni awm a.

Engpawh chu nise, Mizo leh Pawih pawh chu lo indo pawh ni se(Pawih/Lai hi Mizo a ni a, an in do thei lo) Bawihtlung/bawitlung pa (Pawihte) ni reng chungin, Mizo diktak ka la ni ve reng tho. Pawihte ka nia, Mizo ka ni reng bawk ang.  A dik tlat a. Thankhat Mizoram an pelh hnu a MIZO ta lo riau te pawh hi a lo awm theih khawp mai. Mizoramah chuan Mizo tak, Mahse ramdanga Mizo a inchhal chiah lo te pawh kan lo awm ve zel ni awm tak a nia. Tlem tawh nak a lai hian a hahtlak thin khawp mai. Hnamdang thian thenkhat inti Mizo hre ve tak tak te hian ‘Mizo nge?, Hmar nge?, Sailo nge?, Lusei nge?, Lai nge?, Kuki nge?, Mara nge?, i nih te min ti leh zauh thin.. Chung hunah chuan “MIZO” ka ni ka ti fo thin.. Mizo vek kan ni tlat a.

Kan chanchin ziaktu thenkhat te hian Pawih leh Mizo an indo pawh ti se, huat thamah ka lo ruat lem lo va. Pawih ral leh pasaltha te huaisen zia leh rawva zia te pawh sawi thin mahse, buaipui tham ah ka ruat lem lo.. A chhanchu an hunlai kha chuan Lal hrang hrang te kha chakzawk an awm ve kha a ngaih chang a awm thin tlat a.

PAWIH tih pawh hi LAI tih tur, LAI hi kan hming dik leh hmasa zawk a ni an ti.. a dik ngei pawh ka ring. Kei ve hi chu PAWIH a ni emaw LAI a ni emaw, ka buai hran lo, ka buaina tak zawk a chu PAWIH tih ah hian ‘H’ a tel tur nge tur lo? tih hi a ni ta. Han chhui zau a, tawng thiam deuh te han rawn turin taimak a har phian bawk si. Mahni awmhmunah ka lo ngaihtuah ve mai mai thin a.

Ka buaina ti zual tu leh chu BAWIHTLUNG tihah hian ‘H’ hi a tel tur a ni em? tih hi a ni leh bawk.. Thlahtu bul lamah chuan ka buailo, Mizo leh Pawih tih lamah lah ka buailo, Lai emaw Pawih emaw pawh min ti se, ka la buai chuang lo. Mahse ka PAWIH/PAWI pui thenkhat te hian ‘H’ an telh a, thenkhat te hian an telh leh bawk silo a, ka “H” telh leh telh lohah chuan ka buai ta. Hnambo chu ka inti phal chiah lo nangin, “HNAM HMING BO” chu ka ni ve ta deuh chuan ka hria.

He lamah lah hian han chhuizauna kan nei lo mai mai khawp lehnghal a! Ka hnam hming ka ziah dawn a piang a ka rilru a “H” dah tur nge, dahloh tur tih ka ngaihtuah hi ka chhui zauna deuh ber chu a ni awm e. A sawi thui thei deuh te chuan “BAWIHTLUNG / BAWITLUNG ziahdan ah hian, kei aia hre ril zawk tur te chuan “H” dah loh tur, BAWIH  a nih chuan SAL/Chhiahhlawh lam a kawk daih a..”BAWI” hi kan tawng a nia, BAWI tih awmzia chu LAL tihna a ni a. Hman laia kan LAL kha a fingin a fel viau a, Lal tha tak a nih avang khan BAWITLUNG (Lal tha leh fel tihna a ni an tiin ka hria) an ti ta a ni..”    tih lam pang hian an sawi ka hre ta a.. ka pawm viau tho mai.. Tun hnu ah eng teh vak ang phah dawn chuang lo mah ila,, SAL/BAWIH nih ngawt ai chuan LAL nih chu ka thlang zawk ve hrim hrim a. Heta tang hian “H” telh fo thin khan “H” telh loh lam chu ka awn tran..

Ka pu te zinga pakhat chuan ‘H’ tel lo hian a hmang ngei a.. Mahse Thenkhat ‘H’ dah tel ka hmuh hian a dik ve tho lo maw aw?? te ka ti bawk si. Thutlukna ber leh dik tih ber nei fumfe lo chuan ka hnam hming chu tun hmaa ka lo ziah fo tawh angin  – PAWIH BAWIHTLUNG tiin kei Pawihte hian ka la ziak ta fo mai.. H hi chu paih mai ka duh ta riau mai.. Bo rau rau ah SAL nih ai chuan LAL nih ka duh tawh zawk..  Dik tak maw???

(He thu hi ka site http://b-buata.blotgspot.com a ka ziah ka lakchhuah, tih danglam hret hret a ni e..)

Tu nge Ka nih

Sailo lal ropui Pawihbawiha fapa Vanphunga Sailo khaw din, Khandaih khua, a hnua Phullen ni ta a piang leh seilian ka ni. He khuaah hian Vanphunga hnuah a fapa Awksarala chu lalah a thu.

Khandaih khua hi kum 1926 aṭangin Phullen tih a ni a. Khaw hmun te sawn a nih thin avangin, khandaih hmun chu Phullen veng pakhat a lo ni ta zawk a, chulai hmun Khandaih veng, Phullen a piang leh seilian ka ni.

Phullen khua hi Aizawl district a awm, Aizawl via Saitual 125 kms a hlaah, Aizawl atanga hmar chhak lam a awm a ni.Thingtlang atanga piang leh seilian tih takah Mizo kuthnathawh leh lo neihna kawnga hna hrang hrang – Lovah, Hlothlawh, Buh seng etc. thiam loh ka nei lo.

Kuthnathawh leh kutthemthiamna ngaisang mi ka ni a, Ar-awt tah, Arbawm tah, Paikawng tah, Kho tah te pawh ka thiam ve thin a, eizawnn nen a inngheng hnai lutuk ta lo a, ka thiam ka ti ngam ta lo lek lek.

Thingtlang hmasawnna leh thingtlang miten kan chanvo kan neih theih ka duh a, kan ramin nasa taka hma a sawn hi ka duh tak zet a ni.

Hlemhletna ka hua a, duham leh eiruk ching ka ngaina lo va, dikna leh rinawmna a tlo tih ka hria. Pawisa hmang chauha hausakna hi teh chi a ni lo tih ka hria.

Ka tha ber lo a, ka thiam ber lo a, ka famkim ber lo tih ka hria, mahse thil kan tihna apiangah a tha thei ang ber zel a tih a, kan thiam leh theihna sang ber hlan zel a, dik tak leh rinawm taka, taima taka tih hian lukhawng a nei tih ka hria.

Mitin hian midangte aia chungnun bikna lai kan nei theuh tih pawmtu ka ni.Eizawnna avangin chhungkuain Aizawl ah kan awm mek. Tlangval laia lengchhuak ve fo thin kha, nupui fel neih vang nge, in lam ka ngaina ta riau.

Haa.