Kan Inneih champha Sept 25 ah tak Beirual kan thleng, kan nihlawh hle.

 

Ni 25th September, 2017 hi kan Inneih champha vawi 3-na a ni a. Hemi zan hian Tuikhuahtlang Presbyterian Kohhran Upa Bial 2-na Beirual inkhawm kan dawng hlauh mai a. Kan chhungkaw ni pawimawh tak mai, kan Nu nena Chhungkua kan din ni champha ah tak mai, Pathian Kohhran hote hun pawimawh Beirual dawng tura tih kan ni hi a lawmawmin, ngaihtuah chian phei chuan amak zawk hial a, nihlawh ka inti tak zet a ni.

Theih ang tawkin kan In te singsain kan inpuahchah ve a. Programme leh chanvo chelhtu tura ruatte chu –

A hmun       :   Pu Lalbuatsaiha In (H.No 35/A)
Hruaitu       :   Pi Lalthangzauvi
Tantu           :   Nl Lalthanpari
Thupui        :   CHHUNGKUA (Gen 2:18-25)
Hawngtu     :  Pi Lallawmzuali

Inkhawm tan hma, hma deuh takah Thupui hawngtu tur Pi Lawmi a lo kal a, thutna rem dante kan tih fuh loh hlauvin a rawn enfiah a, min ngaihvenpui hle tih a hriat a, a lawmawm ngawt mai.

Inkhawm tan hmain tui taka zaiho a ni a, hla pali – KHB No 294 “Ka chenna ram thlaler a ni Lalpa”  tih hlate, KHB No 163 “Sualin bo mah ila, tu dang ka thlang chuang lo” tihte, KHB 270 “Chhandamtu, chatuan nun nan” tih hlate, KHB No 324 “Lalpa, i aw nema” tihte, KHB No. 2016 “Ka sual atan, ka Tlantuin” tih hlate an ni.

Dar 7:00 PM ah tan a ni a, inkhawm hruaituin Bible chang – Josua 24: 14-20 “Tin, Lalpa rawngbawl hi tha lo awm anga in hriat chuan vawiinah hian tu rawng nge inbawl dawn thlang mai rawh u; in thlahtuten luirala arawng anbawl thin pathian te kha nge, inluah ram Amor-hote pathian te kha? Kei leh ka chhungte erawh hi zawngin Lalpa rawng ania kan bawl dawn ni,” tih chu chhiar chhuakin, tawngtaina a hman zawh hnuah, Upa Bial 2-na Secretary Tv Lalthankima Colney chu hun hmandan tur tlangpui leh hriat tur pawimawhte a puang a. Inkhawm tantui Nl Lalthanpari chuan Thupui innghahna Bible chang – Gen 2:18-25 chu a chhiar a, a tawngtai zawh hnuin, inkhawm hruaituin Thupui hawngtu a sawm a.

Thupui hawngtu Pi Lawmzuali hian uluk tak leh thiam takin, muang fan raihin Thupui zirho tur a chhiar chhuak a, sawi zawm chakawm takin a sawi hawng a. Tichuan inkhawm hoten sawihona neih zui nghal a ni.

 

 

 

 

Advertisements

MONEITU BERIN FAM A CHAN NI A, MO THAR NIH ZET CHU A RUNTHLAK DAWN MANG E!

I dam loh thu an rawn sawi khan “a va pawi ve aw” tiin dam leh thuai tura beiseina nen kan lo thlir liam deuh mai che a. Mahse April ni 22, 2017 tlaia ICU luh i ngaih thu leh i dinhmun a that loh thu an rawn sawi zet kha chuan, rilru mitthlaah i lo lang a, suangtuahnain thui tak a thlir a. Hospital kan rawn pan nghal chung pawha, i dam lai hmel kan rawn hmu hman ta lo khan mi a ti hrilh hai chiang ngei mai. Eng pawh tawk thei khawpin i na a ni tih hrilhhriat lawk kan ni chung khan, a taka han tawn meuh chuan e, mi a va nghawng na tak em! Sawi thiam a ni lo tih hi ka sawi thiam dan ber chu a ni.

A hma lawk, April ni 20 tlai a Biak In a hlim taka inkutsuih laite, thutiam in lâk lai te kha mitthlaah a lo lang nghal chuaih chuaih a. “A nuam emaw hrehawm emaw, hrisel lai leh bawrhsawm lai pawhin, thihnain min then hma loh chuan…” tia thu in tiam laite kha aw.!!! Phûr takin Inneih Zungbun in inbuntir a, nui sângin Inneihna lehkhate in dawng a nih kha. Inneihna inkhawm hun a zova, mipui thlir thup kara, Inneihna thuam famkim nen a in inzui chhuak dalh dalh laite kha.! Kawngka pawn lamah Thlalakna leh kahmawi chi hrang hrang nen an lo châng che u a, hlim takin thla kan la ho a nih kha ti raw.! Mahse khâng thlalakte pawh kha kan hmuh hma hauhin,  tihian min kalsan leh ta mai si a! A va mak teh thut em!

In Inneihna kha Pathian leh a Kohhran ho hriatpuina a ni ve tho a, in thu tiam te pawh kha e, kum tam tak nupa kawpchawia awm mékte thu tiam nen a danglamna a awm bik lo asin, “eng kan ti bik nge ni?” tih mai a awl mang e!,  Hmalam hunah eng pawh lo thleng se ‘…thihna in min then hmâ loh chuan...’ in tih laite pawh khan, ti teh thut hian he Thihna runthlak hian a hruai mai ang che tih tuman kan ring lo va, kan ring phal hek lo. Nang ngei pawhin i ring bikin kan ring lo. Hrisel lai leh bawrhsawm lai pawhin, in hmangaih tlata, in enkawl a, rawng inbawlsak tawn tura hlim tak leh tih takzeta in intiam laite kha aw! Nimin mai a la ni si. Khâng in intiamnate khan, dar kar 48 lek chauh hi a huam bik lo tih kan hraitpui che u asin le.

Mapui, kan inhriatna la rei lo hle mahse, i mize dam tak mai, mi pawi sawi lo leh inngaitlawm tak i nihnate kha kan hmu ve hman a. Kawng engkimah hre bel hman lo che mah ila, makpa duhawm tak ni turin kan pawm che a, kan tu, kan fanu, kan nau pawh i kutah thlamuang tak leh ngaihngam takin kan dah hmiah a sin. Malsawmna fanau duhawm takte neiin hlim takin chhungkua in din ang a, pi leh pu, u leh naute nen hun duhawm tak tak kan la hmang ho zel ang chu tiin hma thlir thui tak kan lo nei a, kan lo phur ve viau asin.! Mahse hmalam hun man hre lawk mawlh si lo.

Mo lawmna in chu in nuam a ni a, chu chhungkua chuan hlimna leh lawmna nasa tak a dawng thin a ni si a. Mahse nang chu e, natna khirh tak vangin lungngai mangangin i kûn a, mo lawm hlim niah pawh natna khurh tak i lo tuar tlawk tlawk a ni si a, kan va lainat hnuhnawh si tak che em! In Inneihna ruai nawi pawh an la senghawi fel hman meuh lo a, i nupui duh tak man eitu chhungkhat lainate pawhin an man ei an la dawng kim hman lo asin. Hetia Mo lawm hlim nui ri tahnain a rawn luahlan ta mai hi, hrilh a va hai tak em.! Nupa a insiam a, innei thar tam tak ten hun hlimawm tak an hman hun lai tak, hlimna vawr tawpin a tuam hunlai takin, nangni chu Hospital ah hman hmawh taka tlan luh in ngai ta si. Mo lawm tuk a Mo neitu ber Damdawiin pan pui ngaia i awm avanga, i rilru hrehawm dan tur ziate kan ngaihtuah a, i nupui i khawngaihna tawngkamte kan hriatin, lung a va chhe duh tak em! A run thlakna tizual turin hniam lam i pan a, April ni 22 tlai dar 4:20 PM a lo thlen chuan, chelh zawh rual lohin min kalsan ta si. Kan hrilhhai lutuk hi awm dan pawh kan thiam lo a ni ber mai.

Mapui, i natna kha a na em a, Pathian pawhin hah chawl mai turin a duh che a ni ngei ang hetia a hruai tâk mai che ni. Thlamuang takin chawl la tiin duhsakna kan hlan che a. Chutihrualin i kalsan tak i nupui, i chhung leh khatte dinhmun kan thlirin, thlah liam mai che hi harsa kan ti a, khuanu rorel kham theitu nih kan chak a va zual tak em! A bik takin i nupui, ni hnih lek i kianga awm a, in chhungkua a rawn tel thar, i kaihhruai la mamawh ngawih ngawih tu SangSangi dinhmun hi kan va lainat tak em! Mo thar duhawm leh fel, chhungte tana hlimna thlentu ni tur hian i kaihhruai a la mamawh asin le! Tunah chuan, chhungte pawh a la hre kim hman lo va, inchhung khur chet vel pawh a la khawr vanglai tak, mo thar zahzum hun lai, engkim mai pasalte kuta awm hun lai a ni asin le! I duhthlanna ni dawn se, i tel lova chutiang hun a hmang tur leh a hmachhawn tur chu i ngai ngam bikin kan ring lo. Heng Inneih hlim hun hlimawmte hi, natna vangtein lo chân ta pawh ni se, a duh ber Nang tal chu la dam ni la, atan hmachhawn a nuam deuh tur.

Mo thar ni ve siin, a duh ber, kum khua a akianga awm tawh tura a pan Nang ber chu, thlanmual lamah a thlah liam i ngai ta si. Ava runthlak tak em! Hun engemaw chen tal chu i kiangah lo awmin, in chhungkaw zingah lo tel tawh tal nise chuan, tawrh dan pawh a zia deuh mahna! Heti teh thut hi chuan e, awm dan thiam a har e mai. Chhungte nen pawh innel tak takna hun a la awm lova, inchhungah pawh neitu chan chang taka chet bawrh bawrh theihna hun a la awm lo te hian, i nupui dinhmun harsatzia a ti lang a, chu chuan i thihna hi a ti runthlak leh zual tak zet a ni.

Dik tak chuan, nang nen pawh la dam dun ni ta ula e, mo thar tan chuan, inneih hlim chhawn hi chu, hun hlimawm tak a nih rualin, hun harsa tak a nihna lai a awm a. Chhungte nena inpawhna leh tlangnelna nei tura pasal ten nupuite an kaihhruai a ngaih zual hun lai, mo tharin chhungkaw nunphung an zir tan hun lai, engkim mai pasalte atanga an zir hunlai, pasalte kuta innghah nasat vanglai tak a ni a. Chu hunah tak chuan i kalsan a lo ngai ta si a, i nupui – Mo thar mai la ni mek dinhmun hi suangtuah chian ngam a harsa mang e.

Hringnunah hian thu kan lo va nei lo chiang tak em! Makpa fel leh tangkai, chhungkaw tihlimtu leh malsawmna tam tak thlentu ni tura kan lo suangtuah ve mek chu he lei atan chuan a tham ral ta mai si. Kan suangtuah na hi he leiah chuan a takin tawng hman hrih lo mah ila, nakinah Van hmunah hlim takin kan la inhmu anga, nang ngaia kan tah leh rumna, kan khawharna thu zawng zawngte hi, lungmuang taka inhrilhna hun kan neih ngei kan beisei a ni.

Mapui, Mo neitu Nang berin famkhua i lawi ni a, i nupui tana mo thar nih hrehawm dan tur ziate, a khawhar dan tur zia leh awm dan thiam a harsat tur ziate hi kan suangtuah tha ngam lo va. Nakinah nangmah ngeiin, i nupui duh tak hi i la zawt ang a, lungrual ten in la inhrilh vek dawn nia aw.

Zoram buai leh ka Pi Titi

Vawiin hi MNF ten India laka Mizoram Independence an puan ni champha a lo ni a. A hun lai hre ve pha lo mah ila, a hriate sawi atangin kan lo mitthla ve a. Khatih hunlaia kan nu leh pa, pi leh pu ten ram leh hnam tana an lo tawrh nasat zia kha thangtharte hian kan hriat thiam pui lo hial mai thei a ni.

Hemi chungchang hi zirbingna ka nei lem lo va, ka Pi Solfathangi w/o Lalzuiliana titi atanga rambuai tantirh an hmachhawn dan a sawi ka hriat ang angte hi kan sawi chhawng ve ang e. A ngaihnawm zawng leh a runthlak zawng a ziak pawh ni lem lovin, ka Pi ti ti kan hriat zui reng nana ka lo chhin chhiah ve mai a ni zawk mah. Heta ka pi ka tih Pi Solfathangi hi ka Pu Siamliana nau (Ka pa Ni) a ni a, a pa chu Pu Thanghrima a ni a, a pasal Lalzuiliana (L) a ni a, Pastor Chhawna fapa a ni bawk.

Mizoram a buai:
Ni 28.2.1966 Pathianni zanah MNF hmalaknain Mizoramin zalenna a neih theih nan beihpui thlak runpui chu urhsun takin a bul an tan a, chu chu Operation Jeriko an ti a ni awm e. Tichuan ni 1.3.1966 ah Independence an puang zui ta a. India sorkar laipui beng a thleng rang hle a. India sipai leh MNF an inkap nghal a, Mizoram a buai ta a, Independence puangtu zinga a phusa deuhte pawh a theih theih an man nghal bawk a.

Kum 1966 March ni 2 zanah Aizawl Chanmari, tuna Veraz dawr kawtah sipai duty an lo ambush a, an thi nual a. A tuk ni 3 ah vai sipai ho thinrim chu an ralthuam nen mipui  rikrap nan an inlar ta chiam mai a. Tichuan, a tuk March ni 4 zanah chuan sipai leh MNF te zankhuain an inkap leh a. March ni 5, 1966, a lo thlen chuan Jet Fighter paliin Aizawl leh Zoram hmun dang thenkhat Hnahlan te, Khawzawl te, Sangau te, Tlabung te a bomb a. Kan khawpui Aizawl chu meivapah a chang a. Bomb a thlak lohna ahte pawh fighter chu hniam te te ah thlawkin Mizo mipuite a tih thaih a, mipuite hlau leh thlabarin an khur a. Hmun him lam nia an hriat, ramhnuaiah te an tlan darh ta chum chum a ni. (Source: Prof JV Hluna)

Ka Pi (Solfathangi) titi:
Khatia India Fighter ten Aizawl an Bomb a, an kah alh puat puat tum khan ka Pi te In, Tuikhuahtlang, Aizawl a mi pawh a kang ral ve vek a. Hetih hunlai hi ka Pi te chhangchhiat vanglai tak a ni lehnghal  a. A fate pali an piang tawh a, a u ber pawh kum 8 a la pum lo a. Chutiang taka chhangchhe bakberh chung chuan India Jet fighter ten Aizawl an bomb alh puat puat kha an hmachhawn a ni.

Nikhat chu “MNF ten Aizawl a India sipai an la dawn a, mipuite hmun him lamah lo riak ang che u” tih thu chu an hre ta a. Tichuan hmun him lam ni a an hriatah chhungkuain an riakchhuak ta a, mahse chu pawh chu a la him tawk lo an tih leh zel takah chuan mipui tam tak chuan hmun him zawk lam an pan leh a. Chhungkaw pa tân a mangan thlak a, nu nau tan a thla bar thlak em em bawk a.

Chutia Aizawl khawpui an buai mup mup karah chuan ka Pi te pawh an buai ve hle a. Khawi lam nge hmun him tih pawh hriat lawk tak tak a ni lo chungin, hmun him lam pan tur mipui an phi buai nuk nuk lai chuan,  ka pi te chu an pa te nen an in hloh palh hlauh mai lehnghal a. Minute rei lote in hloh palh pawh manganthlak tak a ni a. Midang ten hmun him lam an pan sup sup laiin, mangang leh thlabar takin kalna lam tur hre lovin an awm hnufual deuh reng nghe nghe a.

Nakinah chuan ka pi te pawh chu an inhmu kim leh ta hlauh mai a. MNF leh India sipaite inkah rik \uk \uk na karah hmun him deuh zawk lam panin an in zui chhuak ta hlak hlak hlawm a. Ka Pi chuan a fa naupang ber a pua a, a nau ber dawt a pawm a, a u te pahnih chu  a kai a, Pa berin mamawh dang a pu bawr lûk bawk a. Tichuan naunawi nen Sikulpui lam chu an pan ve ta ngawt mai a ni. Sikulpui an thlen chuan mi thahnem tak an lo awm tawh a.

Sikulpui ah chuan chu ti zât zât chu awm reng theih a ni lo tih chu an hretlang vek a. Chutia kal chhuah leh a ngaih tâkah chuan Mission vengthlang lam chu an pan leh ta a, Pu Khûma te Inah chuan an lût leh ta rawih a, chhungkaw dangte pawh an lo lut ve nual bawk a. Pu Khuma te chhungkua hi an lo fel em em a, an In a lutkhawm zawng zawngte eiturin Chaw leh Dailuah an chhum teuh a, an zavai chuan an ei tlâng zel a, an ina lútte tân chutiang chuan eitur an lo hlui thin a ni. Nakin deuhah chuan an awmna pawh chu a him lo an ti leh ta a! Mission veng ho leh an luhna In neitu Pu Khuma te chhungkua ngei pawh chu Reiek lamah an tlan chhe leh ta hlawm a. Chutia Pu Khuma te ngei pawh an tlanchhiat leh tawh hnuah pawh, Pi te chhungkua erawh chu an chhangchhiat em avangin hlau chung chungin Pu Khuma te inah chuan an la awm ngar ngar a.

Jet Fighter ten Aizawl leh a chhehvel an rawn kah rik dum dum lai chuan, Pu Khuma ten bihrukna tura an khur laih (Trench), la laih zawh mumal loh ah chuan naupang ho nen chuan an tawm khawm chawih chawih thin a. Puitling mah thlabar taka an awm chuan, naupang tân chuan hlauh loh chi zia zang a ni lo, tap chul chungin khurah chuan an lût a, Fighter chuan bomb a rawn thlak a, a ri tuk tuk a, tichuan a rawn thlawk ri rum rum reng mai a. Chumi hlau chuan nu ber hovin kut lukhupin “awi ah, awi ah..” tiin an au chul a, naupang naupang ho hlau thlabar chuan lah chuan nu ber chu an bawh rawn chuk chuk reng lo thei si lo a, a mangan thlak tak zet a ni. Jet Fighter a kal kiang deuh tihah Khur atang chuan an chhuak leh thin a, chutiang reng reng chuan chhangchhe tak chungin hun an hmang a ni.

Mission veng mipui leh an luhna In neitute ngei pawh an tlanchhiat tawh avang leh a hlauhawm em avâng chuan ka Pi te chhûng pawh chuan, chhang chhe hle mah se Pu Khuma te In chu awm reng na chi ah an ngai lo va, Tlungvel lam pan an rilruk ve ta a. Chutia Jet Fighter ten Aizawl an rawn kah zan chuan, thim thamah Pu Khuma te huan mawng Mau hmun ah chuan chhangchhe bawr tak chungin an tawlh chhuk a, huan mawng a kawngpui chu an zuk pawh ta a. A thimin an mangang bawk nen,  chu kawng chu eng kawng nge pawh an hre mai lo a, an zawh deuh hnuah chuan, Ngaizel lam panna kawng a lo ni a. Chutih lai chuan Tuikhuahtlang lam chu a kâng nasain a khu dum ngûk ngûk mai a. Ngaizelah hian khua a var zui mai a, chuta tang chuan zingkarah an chhuak leh a, Kelsih ah Sangkhumi pa Inah an lut leh ta rawih a.

Kelsih khua a an va luhna pa (Sangkhumi pa) chu a lo tha em em mai a. Chutia nunau nena hlau thlabar a an hnen thleng ta chu a lo lainat em em mai a, “Ar ka talh ang che u, chaw ei lo chuan in kaltlang ka phal lo” a ti a, tichuan duhsak takin Ar a talh sak a, ka pi te chuan tui ti takin an ei ho ta a ni. Hemi tum hian ka Pi te chu Pu Liankhuma te chhung nen an inzui a, anni pawh hi naupang nen an bawr ve hle bawk a. Kelsih atanga an chhuah leh hnu hian Phaibawk kawnah chhuakin chutah chuan zan an riak a, tlan chhe ve dang pawh an lo awm nual a. Mi tam tak In chhung luma riahna neilo an awm laiin, ka pi te erawh hi chu, chhangchhe ngang an ni bawk nen, mi ten an kian a, inchhung lumah riahna an nei thei hlauh a.

A tûk khua a lo vâr a, an han thochhuak chu, an naupang tlanchhiat pui, Pu Liankhuma fapa chuan, “E heu.., tute nge In min lo sak sak le! a ti he-haw a,”. India Jet Fighter ten an In te an kah chhiat sak a, a kan ral vek tawh avang leh ramhnuai thimthamahte an kal avang khan, khatia In chhung lum atanga zing an han tho chhuak leh thut kha naupang ta chuan a hrethiam lo va, mak a ti hle a ni awm e. Tichuan engemaw titi in Tlungvel chu an thleng thei ta a ni….

…..duh tawk phawt ang…….

AISANGA CHANCHIN

(Aisanga hi ka Nu nau a ni a, A lung phun ni a a chanchin siam hi kan dah ve ang e – Buata Bawihtlung)

Aisanga hi kum 1953 khan Upa Biaksanga leh Pi Mandaii te fa pangana niin Luangpawnah a lo piang a. A pa hian January ni 21, 1977 khan chatuan ram a pansan a. Kum 1968 khan Phullen-ah an chhungkua in an pem ta a ni.

A PIANPUI UNAUTE:

  1. Upa Lianthunga                H/o Lalringngheti             Phullen
  2. Rotuaki (L)          W/o Ralliandanga (L)      Phullen
  3. Lalributa               H/o Malsawmkimi           Phullen
  4. Chawngkhuma  H/o Rinthangi    Chawnpui, Aizawl
  5. AISANGA                             Phullen
  6. Tluangliani           W/o Lalneihthara             Phullen
  7. Thangrikhumi    W/o Vanlalzara (L)           Chaltlang, Aizawl.
  8. Lalrinkima            H/o  Thanchhumi             Chawnpui, Aizawl
  9. Saihnuni               W/o  Liankhuma               Bawngkawn, Aizawl.

Aisanga hi unau ten nupui pasal an neih vek hnuah, nupui nei lovin a Nu nen inpui an nghak a. A nu hian kum 1999 September ni 16-ah a boral san a, tichuan a mahin inpui a nghak a. Kum 2008 ah a makpa Liankhuma (Lka) an unau naupangber pasal chuan an hnen a awm turin Aizawl-ah a hruai thla a. Lka te chhung hian a thih ni thlengin hmangaih leh duat takin an enkawl a, kan lawm hle a ni.

A NAT DAN:

Ni 27.07.2013 khan a hrawk ah thil bawk a awm tih a hre tan a, a chaw ei a tui lo a. Ni 30.7.2013 ah Civil Hospital OPD ah a in entir a. A tuk ni 31.07.2013-ah Altrasound, Biopsy etc te tih a ni a. Ni 7.8.2013-ah a result a chhuak a, Cancer a ni tih hriat a ni ta a. Doctor ten Zemabawk a Cancer enkawlnaah hem tur a an tih angin Ni 13.08.2013-ah a hrawk chu hem tan a ni a, ni 27.09.2013 thleng hemin vawi 33 lai an hem a ni. Hetia an hem chhung hian chawlhkar tin vawi khat Chemotherapy lak ziah a ni bawk.

Hetianga Zemabawk a a hrawk hem a nih hnu hian vawi thum – Ni 8.11.2013, 14.01.2014, 17.03.2014-te khan Doctor hnenah check-up leh a ni a. A  result pawh Doctor ten a that thu an sawi a, ruahman lawk ang chuan Ni 15.06.2014 hi in check-up leh hun tur a ruat lawk a ni.

A HUN HNUHNUNG:

Kum 2013 October khan Phullen ah Presbytery Inkhawmpui hmangin a haw a. Aizawl a a chhuk leh hnuah Kristmas leh kumthar chu Phullen lamah bawk a hmang leh a. Kum 2014 January thla khan Aizawl lamah in check-up turin a kal leh a ni.

Ni 23 May, 2014 Zirtawp zan hian a hrawk a thak avangin a hiat palh a, a hrawk chu a rawn vung a, a khuate a ti sik a. Ni 26 May, 2014 ah amah enkawltu Doctor hnenah kalpui a ni a, a doctor hian vun lam doctor pan tur a alo tih angin vun (skin) doctor chu entir a. Doctor chuan rannung te pawhin a seh a lo ni ang e an ti a, damdawite a chawh a. Hemi ni tak hian vawk In a thenfai naah a nak a tauh palh hlauh mai a, mahse hei hi a thihni ni 29.5.2014 (Thursday) khan na a tih thu a sawi chhuak chauh a, a khuh zawng ten na a ti a, chu bak na a neih sawi a nei lem lo. Na chhawkna a ei pawhin a chhawk theih loh avangin damdawin panpui tum a ni a, damdawi In panpui tura inpuahchah a nih laiin ni 29.5.2014 (Ninga ) Zan dar 7:00 pm khan chatuan ram min pansan ta a ni.

LAWMTHU:

A dam lo tih kan hriat atangin mipui te khawngaihna leh duhsakna a dawng nasa a. Phullen a awm chhungin thil pek leh tawngtaipuina a dawng nasa em em a. Aizawl lama a chhuk hnuah pawh thil pek leh tawngtaina a dawn chhun zawm zel a.  Heng zawng zawng chungah hian kan lawm em em a ni.

Phullen a a ruang phurh chhoh na turah Aizawl lamah thenrual tha ten nasa takin min pui a. Mi thahnem takin a ruang hi an thlah liam bawk. A ruangin Phullen a thlen hma atanga min lo buaipuitu YMA, Khawtlang nu leh pa, amah lainattu mi thahnem takin tlaivarin a ruang in lo hmuak a. Thil tul leh tih ngai a piang min tih sak vek a, kan lawm tak zet a ni.

Date Phullen, 30.05.2014

PI SOLFATHANGI CHANCHIN

(Pi Solfathangi hi ka pu, Siamliana (L) te unau pakua zinga a parukna a ni a. A chanchin ka hriat theih tlangpui ka han talang ang e. – Buata Bawihtlung)

  • Pasal hming  : Lalzuiliana
  • Pa Hming       : Upa Thanghrima
  • Nu hming       : Dohleii
  • Pianni              : Ni 04.09.1935 Nilaini
  • Pianna khua   : Luangpawn
  • Hnam hming  : Bawihtlung

Pian leh murna:
Pi Solfathangi hi Upa Thanghrima leh Pi Dohleii te fanu niin kum 1935 September ni 4 khan Luangpawn khuaah a lo piang a. Chi leh kuang lamah chuan Bawihtlung hnam a ni. Luangpawn hi Mawmrang tlan chunga awm, Khandaih (Phullen) lal Vanphunga Sailo fapa Lalbuaia Sailo khua, Phullen bul lawk, Aizawl District a awm a ni. Pi Solfathangi pu Lalbawnga hi Vanphunga Sailo upa min a ni a, kum 1909 ah Luangpawnah Bawk a khawhtir a, lal angin hun engemaw chen a awm a, mahse Sailo fa ngei chu lalah awmse tiin Lalbawnga chuan Vanphunga Sailo chu a ngen a, Lungpher lal Thangkaman upa tura a sawm ve reng tho avangin, lal nih ai chuan pem hialah a vau takah chuan Vanphunga fapa Lalbuaia Sailo chu Luangpawnah lal chuan a awm ta a ni.

A hming sak chhan:
Solfathangi te hi Kristian hmasa chhungkua zing a mi an ni a. Khandaih sikul zirtirtu hmasa, Mizo zinga Kohhran dan thianghlima innei hmasa ber Pu Hrangsaipuia (Hranga) fapa pawh khan, Luangpawnah chuan kan innghahna ber an ni, Kristainte chu kan intiunau hle a ni a ti. A pa Pu Thanghrima hi Solfa a thiam hle a. Kohhran Zaipawl hruaitu hlun tak a ni a. Chumi hmingchawi chuan a hmingah SOLFATHANGI tiin Pu Vanlalliana chuan a phuah a. Pu Vanlalliana hi Pi Solfathangi thiannu, Inneihnaah pawh dinpuitu (best kan tih mai) Pi Chhiari (w/o Vankhama) u a ni.

Pi Solfathangi Pianpui unaute:

  1. Siamliana (L) H/o Chawngliani (L) Bethlehem Vengthlang
  2. Ngurdawla (L) H/o Nunthangi Madanrting, Shillong
  3. Lalthangliani (L)
  4. Lalhliapi H/o V. Thanzuala Salem Veng, Aizawl
  5. Lalrintluangi (L) W/o Lalsavunga Sailo (L) Mission veng
  6. Solfathangi W/o Lalzuiliana (L) Tuikhuahtlang
  7. B. Ngurchhawna W/o Lalthangpuii Phullen
  8. Mangthanga (L)
  9. Thangdaii (L)
  1. Ngurchhawna leh Mangthanga te inkarah hian, thlakim biai (9months) a piang pahnih chhiat a ni a, anni nen hian an unau hi sawm leh pakhat chiah an ni a, hming nei erawh chu pakua an ni.

Aizawl lama awm leh Pasal neih:
Kum 1957 khan Aizawl Salem vengah a u Lalhliapi te kiangah a awm a. Kum 1958 khan inleng neiin Ni 12.02.1958 khan Pastor Chhawna kutah Pu Lalzuiliana nen chuan Luangpawn Kohhranah Biak In hawngin an inkutsuih a. Khatih lai khan kalkawngte a la tha lo a, thil tih a awlai lo hle a. Inneih that, a pasal ina a lawi leh Mo lawi leh lawm chu Ni 15.2.1958 khan a pasalte inpui, Darlawng khuaah neih a ni. Inneihtirtu Pastor Chhawna hi a pasal Lalzuiliana pa a ni. Pu Lalzuilianate hi a pa pastor a nih avangin Aizawl leh hmun hrang hrangah awmin, Darlawngah hian an khawsa lem lo a. Pi Solfathangi leh Pu Zuia te pawh hi an Inneih zawh hnu ni lawk 3.3.1958 khan Aizawl Tuikhuahtlangah an chhuk leh nghal a ni.

Pi Solfathangi fate:

  1. Zohmingliani (L) w/o Lalsangluaia Mission veng
  2. Sangchhingpuii w/o Lalbiakdika Republic
  3. Lallianzuali w/o Kawnga Mission veng
  4. Lalzarliana(L) h/o Marini Tuikhuahtlang
  5. Lalmalsawmi Tuikhuahtlang

Rambuai vangin hmun dangah:
Rambuai vanga India jet fighter ten Aizawl a Bomb an thlak a, Aizawl a kan lai khan Pi Solfathangi te chungkua pawh hi Tuikhuahtlangah an awm ve a. An in chu a him loh avangin Tlungvel lamah an tlanchhiatsan ve a. Tlungvelah thlakhat vel an awm hnu, ram a ralmuan deuh hnuah Aizawlah an let leh a. Tuikhuahtlanga an In chu sipai te kah leh bomb avanga a kanral vek tawh avangin mi in an luah a, a hnuah Tuikhuahtlangah chuan in an sa ve leh ta a.

A pasal Pu Lalzuiliana chu Assembly House ah a thawh ve avangin kum 1984 atanga kum 1993 thleng khan MLA Hostel Quarters ah an cheng a. Hemi hnu hian Tuikhuahtlangah bawk an let leh a. A pasal Pu Lalzuiliana chuan kum 1996 khan chatuanram a pansan a. A pasalin a kalsan hnu pawh hian theihtawp chhuahin, tlin takin a tu leh fate hi a enkawlzui a. A thawkrimin a taima em em a. Kumm 2012 khan tuna an chenna In Tuikhuahtlang a mi hi thiatin Concrete in a sa tha a, tichuan ama sak ngei inah tunah hian a cheng ve mek a ni.

— chhunzawm tur…..

NAIK SABINGA BAWIHTLUNG CHANCHIN

(Sabinga hi ka pa (Ralliandanga) pa (Siamliana) pa (Thanghrima) PATEA a ni a, chu chu ka pu putea tihna a ni a, . Ka pa Ralliandanga, Ralliandanga pa Siamliana, Siamliana pa Thanghrima, Thanghrima pa Lalbawnga a ni a. Lalbawnga nau chu Sabinga, a chanchin kan sawi tur hi a ni. Ka Pu Siamliana Putea a ni. – Buata Bawihtlung)

Aizawl City Bus-ah Treasury square lam a\anga Sikulpuikawn lam pana i chuan a, i chhukna tur hmun an zawh che a ‘Sabinga Lung thleng’ i tih chuan hre lo an awm nual a nih pawhin, in thiam lo lo la, i lo upa ve ta a ni zawk e, te an ti \hin. Sabinga chu tunge a nih chiah a, eng vanga Assam Rifle meuhin mipakhat, Mizopa ngei leh nghal puala Lungdawh siam ta mai nge an nih, engtia tun thlenga a lungdawh chu humhalh tlat la ni ta zel nge tih pawh sawi tur tam tak a awm. Sabinga hian chanchin ngaihnawm tak tak a nei a, chung zinga thenkhat chu chhui kual thuak thuak ang.

Sabinga hi Khandaih khua Thangphunga Bawihtlung fapa a ni a. Khandaih hi tuna Phullen khua ni ta hi a ni. Sabinga hi a tu leh fate tan mai ni lo, Mizo hnam tan pawh a mi chhuanawm nih tling pha, infiamna lamah leh sipai lamah Mizote zinga mi hmasa leh hmingtha, sulsutu chhuanawm tak, Mizo Football Team Captain hmasa ber ni a hriat, Indopui pakhatna laia France ram kal, Indopui zawh tawh hnu pawh a France sorkarin lawmman atan a pawisa fai a pek zui leh hial, Mizo pa chuanawm tak a ni.

Sabinga pian kum hi chiang taka hriat a ni lo a, a kawm ve thin, a pa u fapa, amah aia nau hret Thanghrima, France ram kal ve tho chu kum 1900 a piang a ni a, chuti a nih chuan Sabinga hi kum 1895 vela piang a nih a rinawm. Thlahtute lamah chuan Chalchima Bawihtlung thlah a ni a. Phullen khaw hlui daiah hian Chalchima Tui a awm a, chu chu Sabinga pu pa Chalchima hming chawia phuah a ni. Sabinga thlahtu hriat theihte chu – Chalchima, Chalchima fapa Do\huama, Do\huama fapa Thangphunga, Thangphunga fa chu Sabinga hi a ni a, a unaute chu – Lalbawnga, Hrangkunga te an ni.

Indopui Pakhatna 1914-1918 lai khan India chu Bristish hnuaiah kan la awm a, kum 1915 chawhnu lamah British War Committee, a hnu a ‘War Cabinet’ tih zui tak khan France ram khawthlang lama hnathawktu indaihlohna chuan an ral dona kawngah nasa takin nghawng a nei thei dawn tih an hria a. Raldo mite chu hna dang thawk kawp tura hman a remchang si lo. Chuvang chuan kum 1917 ah Lushai Labour Corps chu din a ni ta a. Aizawl (Aijal) atangin Mizo (Lushai) 2100 zet te chu France ramah hian an kal ta a. Lushai Corps hi Lt. Col. Mayfai an a kaihruai a, kum 1917 June thlaah Marseilles an thleng a, an zingah hian Welsh Mission tirh a Lushai Hills a Missionary hna thawk mek Rev. D.E Jones (Zosaphluia) pawh a tel ve nghe nghe a, ani hian tawng te a let a, a zirtir bawk a, a tangkai hle a ni awm e. Chutianga ral hmatawnga kum khat chuang an awm chhung khan Lushai Corps (Mizo) zingah mi 71 vel zet ten nunna an chan a, hnu May, 1918 ah Mizoram panin an lo let leh a, June 1918 ah Lushai Hills an lo thleng leh a ni.

Labour Corps te hi Sipaite tanpui tu tura din an ni a. Thil tul hrang hrang, eirawngbawl, sipai mamawh thiar kual vel te, indona a sipai thite ruang senghawi te, kawng laihte leh thil tul awm ang angte an thawk thin a ni. Kum 1917 a Indian Labour Corps, France ram kal zingah hian Sabinga pawh hi a tel ve a ni.  Sabinga hi pa lian lam deuh, tlangval fel leh pian tha tak, hmel pawh tha tak a ni a. France ram kal Mizo 2100 zet zingah infiamna lamah leh inbuanah a thei ber (Champion) a ni thin. A rem hriatna leh a felna avang chuan an hotute pawhin an hre hle a, thil tihna hrang hranga a kaihruaitu pawlah a \ang deuh zel \hin. British sorkar pawh chu a chungah a lawm ve hle a ni ang, Indopui pakhatna  zawh hnuah pawh lawmman atan Rs. 850/- lai Sabinga hi a rawn pe leh a ni.

Sabinga hi tlangval chak leh tlawmngai thei tak mai a ni a, an khuaah pawh inbuan chak a sawi a ni. Tum khat chu an khuaah khawchhak lam mikhual a lo zin a, mikhual tlangval nen chuan an inbuan tir ta a. Sabinga chuan a hneh ngei turah an ngai a, mahse an han inbuan chu, Sabinga chuan a hneh ta tlat lo mai a, mak an ti hle mai a. A thian ten, “tinge kha mikhual tlangval kha i hneh loh mai le, i hneh ngei kan lo ring a sin, ava mak ve maw le!,” an ti a. Sabinga chuan, “Khai a, mi chhe fa a nih kha in hre na nge?” a ti a. Kha mikhual kha a rukin lo hre sa a ni awm a, mi chhe fa a ni si a, engtin mah sawi lang chuang si lovin a lo hneh lo der hi a lo ni awm a. Hmanlai deuh chuan inbuan nikhua ah michhe fa te hi an lo hlahthlem thin a lo ni awm a.

Indopui a zawh hnuah Sabinga hi sapram (France) atangin Mizoramah a lo haw leh a. Khandaih khaw nula hmeltha Zazawni chu nupuiah a nei a. Zazawni nen hian fa pakhat an nei a, vanduaithlak takin an fapa chu kum hnih mi lekin a thi ta a. Chutia a fapa a chan ta mai chu a lungleng hle a, Aizawl lamah a kal leh ta a. Chutih lai tak chuan Aizawlah sipai an lo la mek a. Sipai latu Sibudar hnenah chuan “Kei pawh Sipai ah ka \ang ve duh a nia,” a ti a. Sibudar chuan, “i duh chuan \ang la a ni mai a lawm, nang te chu kan hrechiang che a lawm, i \an dawn chuan intlar ve pawh a ngai lo,” a lo ti a.

Kum 1922-ah chuan India rama Paramilitary force upa ber Assam Rifles ah a lut ta a. France rama an awm laia a chet that em avangin Sap ho khan an hre chiang hle a niang, Assam Rifles-ah hian intlar ve ngai lovin a lut a, chumai bakah a luhtirh hian Naik rank an lo pe nghal hial a ni. Sabinga hi Sipai a luh hnu hian infiamna leh thil dang dangah pawh a fel leh hmingtha pawl tak a ni zui zel a.

Heng hun lai hian Mizo zingah sipai tang an awm ve nial tawh a. Mahse Mizo sipai te chuan sipai inkaihhruaina dan an zawm \ha viau lo \hin a ni mai thei. Kha tih laia Lushai Hills District (Mizoram) awptu, Superintendent hmasa ber Major J. Shakespeare-a chuan Assam IGP, Shillong hnenah chuan, “Mizo te chu discipline nei lo lutuk, Sipai a tang tlak pawh an ni lo” tiin kum 1933 khan lehkha a thawn a. Major J. Shakespeare-a lehkhathawn avang chuan Assam IGP chuan a hmunah ngei rawn enfiah a duh ta a.

Kum 1933-ah Assam IGP chu a lo kal ta ngei a, ropui takin an lo dawnsawng a. Mizoram a IGP lo kal lawmna atan tiin Football hmuhnawm tak lo entir an tum a. Mizo Football Team leh Gorkhali Football Team te chu inkhel tura tih an ni a. An inpuahchah nasa bawk a, an inkhel pawh a hmuhnawm hle a ni awm e. He inkhel a Mizo Football Team-ah hian Sabinga, Khandaih chu Team Captain a ni. Inkhelh hmain Mizote hi an infuih lawk nasa hle a, engti zawng pawhin an chak ngei ngei tur a ni a, chak loh ai chuan ball pet mai ni lo, inseh hial pawh huam tur a ni tiin an infuih lawk hial a ni awm e.

Inkhelh a zo ta a, Sabinga kahhruai Mizo Football Team te chu 2-1 in an chak ta nghe nghe a. Inkhelh laia Mizote huaisen zia te, an tumruhna te, chak tura an nawr nasat zia te leh an ralhrat (Aggressive) zia chu Assam IGP chuan a hmu ve vek a. Inkhelh a zawh chuan, Mizote sipaia \ang tlak kan nih leh nih loh enfiah tura rawn kal Assam IGP chuan, “Mizote hi hnam huaisen an ni a, sipai a \ang tlak an ni, tunah hian Mizo atangin Sipai 50 dang kan lak belh leh ang” a ti ta hial mai a. Hei hi a huhova Mizote sipaia an \an hmasak ber \um niin a hriat. Kha inkhelhna kha Mizote tan a danglamin a chhinchhiah tlak hle a. Mizote a huhova sipai a kan \an theih phahna a ni pawh a tih theih a ni. Tin, kha mi \um a Mizo Team te kha, mizo aiawh a Football Team hmasa ber an niin a hriat a, chuvang chuan Sabinga hi Mizo Football Captain hriat theih hmasa ber a nih a rinawm.

Mizo tlangval 50 rual sipai a lut thar te chu hemi kum v>k hian Sadhya-ah leh Kohima ah training tura tih an ni a. Naik Sabinga chu 2nd Assam Rifle buaipui tur hian Sadhya-ah sawn a ni ve nghal a. Sadhya Expedition an tih mai, Mizo sipai tang thar Sadhya a kal ho te chu Naik Sabinga chuan kaihruai ta a, an training-na hmunhma leh thil engkim chu felfai takin a ruahman pui vek a. (Dadhya / Sadhiya hi Lakhimpur district ni thin, a hnu a Dibrugarh districtTinsukia district and Dhemaji district ni ta, Assam a awm a ni )

Vanduaithlak takin kum 1935 khan Sabinga chu a damlo ta vak mai a, February ni 28, 1935 khan Dibrugarh-ah a thi ta a ni. Sabinga hian a unau (a pa u fapa) Thanghrima hnen a a sawi dan chuan, “Mi thenkhatin Holder i kai ve chuang lo ang, min ti ve leh ngawt \hin a, mahse hei  Holder chu ka kai ngei dawn ta si a,” tiin Holder a nih ngei tur thu a sawi a, mahse Holder a kai hmain a thi ta hlauh a ni. A thih chhan hi Malaria a nih a rin thu Prof. JV Hluna chuan a sawi.  Mizo pa lar, sipai chhuanawm leh hming\ha, Mizo sipai rual kaihruaitu Naik Sabinga a’n thi ta thut chu Mizo ten mak an ti em em a,  Aizawl khawpui a fan chhuak rang hle a. Mi ten an ui hle a, an sawi luai luai a ni awm e.

Kan sawi tak ang khan Sabinga hi a dam laiin a remhriain a fel em em a, infiamna lamah leh sipai hna hrang hranga vantlang chunglam a ni a, Sipaiah pawh Naik lai kai pha a ni a. A sulhnu hrang hrangte avangin Mizo mipuite mai ni lo, Assam Rifle pawhin a ui hle a. A ruang chu Assam Rifle chuan an la a. Tichuan a chhungte leh 1st Assam Rifle leh 2ndAssam Rifle te \angkawp chuan ni 26.05.1935 khan Sabinga pualin Khatla, Aizawl-ah lung an dawh ta a. He lung hi Assam Rifle Ex. Association chuan an tuaihnum zel a, Advisory Board, Tribal Art and Culture Mizoram chuan a humhalh zui ta reng a ni. He lungdawh hi tunah hian Upper Khatla, Aizawlah hian hmuh theihin a la ding a ni.

A nupui Zazawni nen hian an rei an innei lo va, an in\hen ve leh mai a. A fapa thi ta bakah khan fanu pakhat a Lalbuati a nei a, ani hian Karen leh Scott thlah pawlh pasalah a nei a, Lalbuati tu leh fate chu Kawnpui leh Aizawl ah te an awm a, Sabinga unaute tu leh fate chu tunah hian Aizawl, Phullen, Luangpawn ah te an la awm a ni. Sabinga hi a hmel\ha hle na a, nupui a \hen takah khan nupui nei lovin a thi zui ta hlauh a ni.

By – Buata Bawihtlung, Phullen: 4th March 2015

# Thu lakna leh biang biakte –

  1. Pu B. Ngurchhawna, Phullen (Khandaih)
  2. Pi Solfathangi, Tuikhuahtlang
  3. Prof.JV Hluna, Sikulpuikawn
  4. Pu B.Rothangpuia, Phullen (Khandaih)
  5. Pu C. Nundanga, Chhinga veng, Aizawl.
  6. The Lushai Brigade (without Lushai!) – by lushai_er 
  7. North East and the First World War – Pratap Chetri 

PU SIAMLIANA BAWIHTLUNG

(Ni 30.11.2016 a ka ziah a ni – Buata Bawihtlung)

Pu Siamliana hi Pu Thanghrima leh Pi Dohleiite fate zinga upa ber a ni a. Luangpawn khua a piang leh seilian a ni. A pianpui unaute chu –

  1. Siamliana                   H/o Chawngliani              Bethlehem vengthlang
  2. B.Ngurdawla            H/o Nunthangi                 Madanrting Shillong
  3. Lalthangliani (9yrs) (L)
  4. Lalhliapi                      W/o V.Thanzuala            Salem veng, Aizawl
  5. Lalrinthangi              W/o Lalsavunga Sailo     Mission veng, Aizawl
  6. Solfathangi               W/o Lalzuiliana                 Tuikhuahtlang, Aizawl
  7. B.Ngurchhawna     H/o Lalthangpuii              Phullen
  8. Mangthanga (24 yrs) (L)
  9. Thangdaii (11yrs) (L)

Vanduaithlak takin a pianpui unau zing ami pahnih (2) thla kim vek a piang chu, an pianhlimin an thi (nau chhiat) hlauh a, mi pakua (9) an dam a ni.

Pu Siamliana hian kum 1942 khan Luangpawn khuaah nupui a nei a, a nupui hming chu Pi Chawngliani (15.6.1922-22.6.2011) a ni a. Pi Chawngliani hi Chawngte hnam niin Pu Hrangzaaithanga leh Chinkhamite fanu a ni. Pu Siamliana leh Pi Chawngliani te hian fanau malsawmna an dawng a, fa sawm leh pakhat (11) an nei a ni.

Pu Siamliana leh Pi Chawngliani fate –

  1. Ralliandanga (L)         h/o Rotuaki               Phullen
  2. Lalsangliani                                                  Bethlehem Vengthlang
  3. Bawihtluanga (L)
  4. Ngurbani (L)               w/o Lalchuailova      Phullen
  5. Lalchuha (L)                h/o Lalzampuii         Bethlehem Vengthlang
  6. Vanlalringa (L)
  7. Lalduhveli                   w/o Lalpana              Phullen
  8. Thangdailovi               w/o Remlalliana       Bethlehem Vengthlang
  9. Thangthiangi                                                 Bethlehem Vengthlang
  10. B. Laldinliani                                                Bethlehem Vengthlang
  11. Zaithanchhungi                                             Bethlehem Vengthlang

Kum 1965 khan Luangpawn atangin Phullenah an pem a, Ramchhan vengahte an awm thin a. A hnu kum 1982 khan Aizawlah an pem leh a. Bethlehem vengthlangah a inbengbel zui ta a ni.

Pu Siamliana hi a pate ang bawkin kutthemthiam tak a ni a. Mizo thil leh hmanraw hrang hrang, thiamhnang chi hrang hrangte a thiam em em a. Phullen a an awm lai chuan Tlangval rualban zan lo, mahse taima leh tlawmngai hmingthang Laltawka, Kapmawia te ho chu Hnangtahte a zirtir thin a. Anni vohbik pawhin tun thlengin hnangtah an thiam phah zui ta a ni.

Aizawl a a awm hnu hian, a kutthemthiamna avang hian KVI Mizoram-ah a thawk a, hnangtah chi hrang hrang, Khumbeu leh thil dang dangte an tah a, a zirtir bawk thin a. He a hna hi a thih thlengin a thawk a ni.

Pu Siamliana hming hi Phullen lal Awksarala Sailo phuah a ni a.  Khandaih lal Vanphunga Sailo te leh Siamliana te hi pute atang tawhin inngheng hnai tak an ni a. Pu Chalchima Bawihtlung kha lal ina seilian a ni a. A hleitlingin, a pumrua leh a hmelte a tha a, a felin a fing viau mai a. Lal chhungkaw zinga tel ve ta chu lal fapa ang maiin a awm zui ta a. Mite pawhin an zah hle a, indo leh ralrun nikhuaah pawh a huaisenin salte a hawn nual avangin lal chuan a chawimawi hle a.

A hnu zelah Pu Chalchima tu leh fate chu lal tan mi tangkai tak an ni zui zel a. Pu Siamliana pu Lalbawnga pawh chu Khandaih lal Vanphunga Sailo khawnbawl upa min a ni leh a. Vanphunga Sailo hian Luangpawn ah khua dinin, Lalbawnga hi a awp tir a, a fapa ang maiin tlang hran a chan tir ve hial a ni. Mahse Lalbawnga ngenna leh remruatan angin Lalbuaia Sailo chu Luangpawnah lal atan Vanphunga Sailo chuan a dah ta zawk a. Luangpawnah hian hun engemaw chen chu Lalbawnga hian ro a rel ve a ni.

Chutiangin Lalbawnga fate Thanghrima te pawh chu taka lal te nen inngheng hnai, lal chhungkaw tana mi tangkai tak an ni a. Lal chhungkua te pawh chuan an dinhmun leh an ropuina chu Chalchimate chhungkaw zar a ni ve tih an hria a. Lal siam liantu pawimawh tak an ni a, chuvangin Pu Thanghrima fapa upa ber lo piang chu a hmingah LALSIAMLIANA tiin Phullen lal Awksarala Sailo chuan a phuah ta a ni.

Pu Siamliana hian a tu leh fa, unaute kawm dan a thiam hle a. Fa u a nih angin a unaute pawhin an zah thiam hle a. Thawhah natna a neih avangin a upat hnu hian pawn pawh a chhuak thei meuh lova, Inah a tawm deuh chawt thin a ni. Tichuan ni 14th January, 1993 khan a chenna in Bethlehem vengthlang Aizawlah chatuanram min pansan ta a. A nupui bakah, a tu leh fa thehnem tak a kalsan a a ni.