SA LOAH CHUAN TUI BER MAI

SA LOAH CHUAN TUI BER MAI
-Saithangpuia Sailo, Dek Party

Chhang ei tur kan va duh tak em,
Chhang ei lo val kan riang chuang e,
Ei mah ila kan chak leh si;
Zaikung nu I deng dawn lawm ni.

Tuibur chu Tuibur a ni a,
Kurtai pawh kurtai a ni a;
Chhang zawng chhang a ni na ngei e,
Sa loah chuan tui ber mai tui ber mai.

Chhang deng leh deng lo I hriat duh chuan,
An sum kotlang en zel mai rawh;
Chutah a lo pawt phawt chuanin,
Tihdan I hre thiam mai lawm ni.

Chhang dengin in hriatreng tur chu,
In ei hmain ngaihtuah ula;
Mizo Army’n an duh em kha,
Khawnge I ko the ang tiin.

Chhang ei tur kan tawn chang chuanin
Manager in an siam vel a,
Chutah Kurtai an han thet a,
Kan hmeh belhbawm kan chhawk hmawk thin

Chhang ei tura kan khuk ruai hi,
A nuamin ava nuam take m!
Chawlhni a chhang ei loh hi chuan,
Kan chak lutuk kan khusun thin.

Advertisements

UPA LALREMA KUM 90 TLINNA BIRTHDAY PUALIN, A CHANCHIN TLEM

IMG_20180328_224152

(Pathian leh a Kohhran tana mi ṭangkai Upa Lalrema kum 90 tlin (Birthday) puala ni 28.3.2018 a ka ziag, fb leh whatsapp a ka post hi, hetah hian lan dah ve ang e – Buata Bawihtlung)

– 28th March, 2018 –

Vawiin March ni 28 hi Phullen pa lar Upa Lalrema pianchampha a ni a. Amah hi ka ngaisangin ka ngaihlu hle a, a chanchin ka hriat ang angte hi in lo chhiar ve atan ka rawn dah chhuak ve e.

Upa Lalrema hi March 28, 1928 Wednesday, Leap year kum khan Phullen ah a lo piang a. A pa chu Phullen Kohhran Upa hmasa ber zing a mi Upa Ralkaikima a ni a, a nu chu Pi Bawihchhungi a ni. Phullen kai kha 1926 a ni a, Phullen a piang hmasa pawl zing a mi a ni. An unau chu hengte hi an ni –

  1. Upa Lalrema H/o Thanzami (L)
  2. Saihnuna (L) H/o Lalbuangi
  3. Upa R. Laltluanga (L) H/o Lamkungi
  4. Ramthangi W/o Upa Ramzauva
  5. Ngurzami (L) W/o Upa K. Lalrova (L)
  6. Saithangliana (L) H/o Vanlalhumi Pachuau
  7. Ralkapsanga H/o Lalbiaknungi

Upa Lalrema hi lehkhathiam, hmanlai pawl 3 pass a ni. A naupan laiin Zirtirtu Hanga Sikul Phullen ah a kal thin a. Pawl 3 hi a kum khatnaah a hlawh chham a, a beihnawnnaah erawh a thiam hle a, tha takin kum 1939 khan a pass ta a. Khatihlai khan Phullen a zir theih chin chu Pawl 3 a ni a. Fa u a ni bawk nen Pawl 4 a zir chhun zawm thei ta lo a. Mahse, thiamna thuk zawk leh zau zawk nei turin kum 1940 khan Kelzam khua a zirtirtu thiam tak Pu Biakthuama hnenah a nu leh pa ten an kal tir a. Pu Biakthuama hnenah hian English leh Mathematics a zir deuh ber a.  Sorkar lehkha Petition, saptawng un tak takte hi chipchiar takin letchhuak diak diak thei vek lo mahse, a tlangpui chu a hre vek thin a ni.

Upa Lalrema hi Kristian chhungkua, ringtu hmasa leh kohhran hruaitu pawimawh atanga piang leh seilian niin, a pa Ralkaikima kha Khandaih Vanphunga khaw kal zel, tun hnua Phullen Kohhran ni ta a Kohhran Upa hmasa ber a ni. Hetiang a nih vang hian Pathian leh a kohhran ngaipawimawh mi, Kohhran tana theih tawka thawk thin a ni. Kum 1946 February ni 22 (Zirtawpni) khan Pi Thanzami nen inneiin Pathian malsawmna fa mi pa 4 leh hmeichhia 3 an nei a, kohhran leh khawtlangah pawh mi puitling tak tak an ni hlawm.

A pa hnung zuiin, Mizoram buai vanglai, kum 1968 khan Upa Lalrema hi Phullen Kohhran Upa ni turin thlan a ni a. Kum 1968 ah vek hian Suangpuilawn Kohhran Biak Inah Hmarphei Presbytery in Kohhran Upa atan a nemnghet nghal a ni. Tualchhung Kohhran ah nihna pawimawh hrang hrang a chelh bakah, Pastor Bial Chairman te, Bial Secretary hna te leh Presbytery Moderator hial te a lo chelh tawh a, Mizoram Synod ah, committee pawimawh tak- Music committee te, Pastoral Committee ah te member a lo ni tawh thin bawk a ni.

Upa Lalrema sawi hi chuan, amah mai hi duh tawk a har a, a pa Upa Ralkaikima, Vanphunga khua Khandaih Kohhran kal zel, a hnua Phullen Kohhran lo ni ta a Kohhran Upa hmasa ber chanchin hi sawi tel a chakawm thin.

Kan hriat angin, Upa Lalrema pa Upa Ralkaikima kha ringtu hmasa, kohhran hruaitu, Upa a ni a. A pa chu Rokanga a ni a, a nu chu Zaphung huaisena farnu Saihnuaii a ni. Upa Lalrema nu te hi kan lal Pu Awksarala te nen inhnai tak an ni a, Pu Awksarala khan puanthui te a thiam tir a ni.

Kum 1906 vela Pathian thu awih (Kristian) te tihduhdahna chuan zual lam a pan hle a. He tihduhdahna ah hian khawnbawl upa, fing leh thunei em em Darkhuma fapa Saithuama chu a phusa ber zingah a tang a. Saithuama hi lal upa fa a nih baka, a pa lianin a chak hle a, mi ten an zahin an hlau hle a. Tihduhdahna kawngah phei chuan lal ai pawhin an hlau zawk hial a. Hetihlai tihduhdahna vang hian Tv Chalbuanga pawh pawh Martar hmasa ber niin a thih phah hial nghe nghe a. Heta Darkhuma hi tuna PHC tlang ni ta hming hmasa “Darkhuma veng tlang” hming put chhan a ni.  

Ni khat chu, Ralkaikima (Upa nit a) nu Pi Saihnuaii (Upa Lalrema pi) chu chhuat laiah thu thluangin a fapa tleirawh uaih tawh Ralkaikima (Upa) chu a mal a lukham tir a, a lu keivin a hrik a en sak a. Chutih lai tak chuan khawnbawl upa fapa Saithuama, Kristian ten an hlauh em em mai chu an inah chuan a dak lut hlawl mai a. Kristianhote an tiduhdah nasa si a, Kristian an nih avangin Saithuama chuan a rawn nghaisa dawn a nih an ring nghal mai a. Saithuama chuan, “Saitual ah kuli a kal tur a ni a, chuta kal tur chu i ni e. A kal ni tur chu Pathianni a ni ang. Pathianni a kal i duh loh chuan, Inrinni ah nangmahin lo zuk inchhawp rawh”  tiin tleirawl Kaikima chu a rawn hrilh ta mai a.  

Kuli kal ni atan Pathian ni an thlang kher kher hi Kristian a nih vanga tihduhdahna chikhat a ni a. Pathian thu awih Ralkaikima chuan Pathianni chu serh a, inkhawm a duh ngei dawn tih hriain chumi tibuai tur chuan Pathianni a kal turin an ti a ni a. Tleirawl ve uaih tawh mah ni se, mahni a Kuli a kal hmasak chu a huphurh hle a, mahse  Pathianni serh loh a duh si lo, tichuan ram hnuai sa hlauhawm karah hlau chung chungiin amah chuan a kal ta a.

Tunlai angin kawng mumal a la awm si lo. Khandaih atanga Saitual kal chu a namai lo hle a. Thanglailung kaltlangin, Arthladawn mualah kawng sah pawp mumal lo tak, kal harsa tak zawhin Chhirdem ah, chuta tangkin Darkhuang mual an liam a, Tuivawl an kan a. Tuivawl atangin ram vah kawngah Sihfa a pan leh a. Sakei hnu, lian deuh leh te deuhte, hnu hlui deuh leh hnu thar deuh te a bak chuk mai a. Tleirawl mai a la ni bawk si a, a hlau em em mai a. Hlau chung chungin Saitual ah chuan a in dah fel thei ta a. Vanneih asiamin engmah tibuaitu a tawk lo hlauh bawk a. Tluang takin a haw ve leh thei ta hlauh a. Chutiang chuan Pathianni serh duh vangin hrehawm nasa tak a lo tuar tawh a ni.  

Nakinah chuan, Kristiante tiduhdahtu Saithuama bawk chuan ring leh fiah takin “Ralkaikim” tiin a hmin pumin, pawn atang chuan a ko lung lung a.  Pathianni a serh loh phah nan Kuli turin an tir a, mahse, an rin loh deuhin a hma niin a lo dah fel der mai si a. An Kristian ruh hle tih a lang reng si a, chuvangin a rawn nghaisa tawh ngei dawn a nih ringin a lo hlauthawng hle mai a.  Saithuama chuan, Pathian thu I la awih ta reng em?” a rawn ti a. A zawttu chu a pa lianin a chak si, engtin nge a tih ang aw?  Pathian thu a Awih zel thu a hrilh chuan, nasa takin a nghaisa ang tih chu a rinlawk theih a. “Awih reng lo e” a tih chuan Isua a phatsan a ni dawn si. A ngawi vang vang a, a hnu deuhah chuan “Awih e”  tiin a chhang ta a.  Chutah le! Rin loh takin Saithuama chuan, “Lo awih reng rawh u, kei pawh ka la rawn awih duh ve mai thei a ni” a ti a, a kal ta daih mai a! A thinrim hle dawn emaw tih laia, rin loh tak mai a chhan avang chuan Kaikima chu a lawm em em a, a thawveng huai a. Hlau chung chunga Pathian a phatsan lo chu a hlim phah hle a ni.

Pathianthu awihte tihduhdahna hi Kawnpui, Changzawl an insawn hnuah pawh a hluar zual hle a. Mahse Kristiante pawh rinnaah an nghet sauh emaw tih tur a ni a. Kawnpuiah hian kum 1907 khan a hrangin Biak In an sa ta nghe nghe a. Upa Ralkaikima chu Kohhranah inhmang zelin a hruaitu pawimawh zingah a tel a. Changzawl awm lai kum 1907 a  lal Vanphunga leh Zosapte an inhmuh thiam loh khan, lal Vanphunga khan, a fapa Lalbuaia Sailo (Luangpawn lal ni ta) leh Pu Ralkaikima (Upa Lalrema pa) leh Pu Vawma (Khawnbawl upa, Ztr Hranga pa) te chu Aizawl ah Bawrhsap dawr turin a tir zui a. Vanphungan Pathianthu awihte tihduhdah a bansan loh chuan, a lalna ban tir a nih tur thu Bawrhsapin a lo sawi thin chu, mi ten Vanphunga lamkalte hi an hrilh ngam lo a. Mahse Upa Ralkaikima teho hi chuan zep lovin an hrilh ta vek a, Kristiante tihduhdahna pawh a ziaawm phah ta a ni awm e.

Kum 1910 ah Thanglailungah an insawn leh a, lal Awksarala chu lal a ni zui a. Thanglailung awm atang hian Kristiante tihduhdahna a lo reh ta a. Krismas te pawh ruai nen an hmang tan a. Kohhran pawh lo changtlung sawt hle a. Kum 1913 ah Kohhran Upa thlan a ni ta a. Aizawl atangin ringtu hmasa Pu Thanga ten an inthlanpui a. Ralkaikima, Kuaia, Zokung leh Tuaha te an thlang a. Ralkaikima, Kuaiate, Tuahate hi, hemi kum vek hian Aizawl Presbytery chuan Kohhran Upa atan a nemnghet zui nghal a. Tichuan Khandaih Kohhran kal zel, tuna Phullen Kohhran nita a Upa hmasa ber an lo ni ta a ni.

    Upa Lalrema chanchinah let leh tai la. Upa Lalrema hi pa kawm nuam tak, ti ti thiam tak, fiamthu duh bawk si a ni a, a kianga awm chuan nuih inpeih reng a ngai thin a. Fiamthu duh leh hlim thei tak a nihna hi kum 89 a nih tawh pawh khan a la nunpui reng a. Tawngkam bungrua tha tak tak a nei a, Kohhran ah hnatlang tura Kohhran mipuite fuih phur pawh a thiam hle thin. A fiamthu leh a titite hi lakkhawm a, dah that tham a neiin ka hre thin. Kar kalta maia chatuanram min pansan ta Pi Vanlalawii pawh khan, kum 97 a nih tawh khan, Upa Rema titi sawi chhawngin a la nui bawk bawk nia.

Upa Lalrema mizia tilang chiang em em tu, a chanchin ka hriat pakhat chu, hman kum tawh khan Diakkawna dawrkai pakhat chuan, “Upa Rema hi dawrah lo dak lutin, ‘hei, kan tuteho hi, naupang an la ni a, in dawrah hmawmsawm leina ba te an lo nei mial lo maw?’ tiin a kal pahin Ba an neih leh neih loh a rawn zawt leh zauh thin” a ti. Mite tana phurrit siamtu nih chu a duh hauh lo tih a chiang reng mai. Pastor induction service a Pastor a fuihna tawngkam ka la hriat reng pakhat “Kohhran zamna ngul rinawm tak nih tum ang che” a tih hi amah hian a takin a nunpui tlat a. Hei tak hi a ni ropui ka tih em em chu! Thiamna leh theihna, hausakna hmanga neih theih a ni ngawt lo, thuhnuairawlh leh inngaitlawm tak chunga, inpumpekna nena rawngbawl a ngai ṭhin.

Pa kawm nuam leh titi thiam, fiamthu duh tak, mite tihhlim thiam tak, Phullen Kohhran Upa hmasa ber fapa Upa Lalrema hi, vawiin 28.3.2018 a a pianchampha lo thlenga, kum 90 lai a lo ni ta hi, thinlung takin ka lawmpui a. A hriselna te lo tha zel se, Pathian zarah kum 100 chuang dam ngei turin PIAN CHAMPHA PUAL DUHSAKNA CHIBAI KA BUK E.

HAPPY BIRTHDAY

(Hengte hi ka hriat dana ziak ka ni a, a dik tawk lo palh mai thei, a dik lo lai a awm chuan, a dik zawk kan inhrilh dawn nia – Buata Bawihtlung)

 

******************************

Mizo zinga Kohhran dan thianghlima innei hmasa ber fapa Pu C. Nundanga, Khandaih (Phullen) a fam ta.!

PU C. NUNDANGA
(16.03.1925 – 15.04.2018)
–    Buata Bawihtlung

Mizo zinga Kohhran Dan Thianghlima innei hmasa berte fapa Pu C. Nundanga kum 94, Khandaih (Phullen), tuna Aizawl Chhinga veng, Bethany a awm chuan tukin April 15, 2018 zing 7:30 AM khan chatuan ram min pansan ta a, a uiawm tak zet. An chhungkaw chanchin tlem tlem hi kan thai lang ve ang e.

Pu C. Nundanga hi Pu Hrangsaipuia leh Pi Saimanliani te fapa niin, Vanphunga khua Khandaih khaw kal zel Changzawl awm lai March ni 16, 1925 khan a lo piang a. Hetih lai hian an lal chu Vanphunga fapa Awksarala a ni. Kum 1926 khan Changzawl atangin Khandaih khaw ram chhung tho Phullen ah an kai let leh ta a ni.

Pu Nundangate hi chhakchhuak hnam a ni a, an unau hi hmeichhia 4 leh mipa 3 an ni. Pu Nundanga hi, a naupanlai pawhin naupang danglam tak a ni a. Naupang Thingnawifawmrual a nih laiin, Tlangvalho Sakei hualnaah a lo tel ve reng mai a. An lal chuan, “kha, tunge naupang deuh lo tel ve reng kha!” a ti a. Pu C. Nundanga hi a lo ni reng a, a chawimawi nan Lal chuan Thingnawi fawm aṭangin a awl tir a ta a ni. Chutiang chuan naupan lai aṭanga huaisen leh tlawmngai a ni a. Sakei pawh a kap tawh nghe nghe.

Kum 1943 November ni 24 khan Pi Lalthluaii nen Phullen Presbyterian Kohhranah an innei a. Inneihtirtu hi Rev PD Sena a ni a. Pathian malsawmna dawngin fa 8, mipa 6 leh hmeichhia 2 an nei a ni.

Pu Nundanga te chhung hian chanchin chhuanawm tak tak sawi tur an nei ngah hle a. A pu Pu Vawmhmelthaa kha lal ropui Vanphunga Sailo Khawnbawl Upa a ni a. Pu Vawmhmelthaa fapa Pu Hrangsaipuia (Pu C Nundanga pa) kha a hming tak chu Lalruala a ni a.  Kum 1880 khan Sawleng a awm laiin a piang a. A pian ni leh Buhban lal Lalzika Sailo pianni a inrual chiah mai a, chuvang chuan Lalruala tiin a laiah hmingah an phuah a. Lalruala (Hrangsaipuia) chu naupang hmeltha tak, duhawm danglam bik tak a ni a, upaten “He nau zet hi chu, a hmelthain a duhawm danglam e mai, Dawithiam hmingthang Hrangsaipuia ang tur a nih dawn hi le!” an ti a. Tichuan Hrangsaipuia tih chu a pu hlen ta zawk a ni.

Pu C. Nundanga pa PuHrangsaipuia (Hranga) hi Aizawlah Sap missionary Zosaphluia kiangah lehkha zirin a awm thin a. Kum 1900 khan Kristianah a inpe ve a, November Ni 16 1902 khan Zosaphluia kutah Baptisma a chang leh a. Lehkha te a thiam deuh hnuah Zosaphluia chuan Vanphunga khua Khandaihah Sikul din turin kum 1903 khan a tir haw a. Zosap Missionary leh Bawrhsapte ruahmannain Ni 1.8.1903 (Inrinni) chuan Khandaihah Sikul an din ta a. He Sikul hi Aizawl a Boys ME School (Sikulpui) dawt chiah a din niin, Thingtlang khuaa Sikul hmasa ber a ni a.  Zirlaite hi naupang aiin puitling an ni deuh vek a, an tam lai chuan 116 zet an tling a ni.

Mizorama Kristianna lo darhzau theihna kawngah Pu C. Nundanga te chhung hian an thawh hlawk hle a.  Zosap Missionary ten, khatih laia (1901) Mizoram khaw lian ber, Zawlbuk pawh pahnih nei Khandaih khua a Sikul an din khan Pu Nundanga pa Pu Hrangsaipuia kha zirtirtu hmasa ber a ni a. Ani khan Sikulah khan Pathianthu a sawi tel thin a, tichuan Kohhran nghet tak Khandaih kohhran chu a lo ding zui a. April ni 8, 1906 Pathianni a Khandaih paho Sangha tlangvuaknaah Thlarau Thianghlim hnathawh Harhna a lo thleng ta hial a. Hetah hian kutbengin an lam kual a, hlim takin an zaikhawm mup mup a. Hetianga kutbeng leh banphar a lamkual Harhna hi Mizoram ah a thlen vawikhatna a ni nghe nghe.

Tihduhdahna leh thlemna karah pawh Pathian leh Pu Nundanga pate uapna karah Kristiante chu zam hauh lovin an pung zel a. Hriat thiam loh zual lai a, Kristian tihduhdahna thlengte pawh Pathian remruat zawk emaw tih turin, Pathianin a hmang tangkai zel a. Kristian tihduhdah laia pemchhuakte khan Kristianna an pu darh zel a, tichuan hmun dangah pawh Kristianna chu a lo darh zau phah zawk a ni.

Pu Nundanga pa (Pu  Hrangsaipuia) hi tlangval hmeltha leh fel tak a ni a. Pu Zosaphluia khan nupui nei turin a ti a. Zosaphluia chu Khandaih ah kalin Hranga hmel duh Saimanliani chu an be rem ta a. Kum 1904, November ni 6 (Pathianni) khan Saimanliani chu Zosaphluia chuan Baptisma a chan tir a, a tuk ni 7.11.1904 Thawhtanni khan Zosaphluia kutah Kohhran dan thianghlimin an inkutsuih ta a. Anni hi Mizo zinga Kohhran danthianghlima innei hmasa ber an nit a a ni.

Pu Nundanga pawh hi a pa anga pumraw tha tak, hmel tha tak a ni a. Aizawl lamah a awm vang vang hnuah rambuai lai khan Phullen ah a haw let leh a. A hnuah Aizawl Chhinga vengah a awm nghet leh ta a ni. Khawtlang hruaitu niin Village Council ah member te a ni thin a. Kum 1954 a lal ban a nih a *Phullen VC hmasa ber Pu Dengkhuma VCP na hnuaiah khan Secretary niin Phullen VC Secretary hmasa ber a ni.* A hriatna a tha em em a, kum 90 a tlin hnaih tawhte pawh khan, a ti ti a buai lovin a ngaihnawm em em a. Lehkhabu ziak chhiar ang maiin, fiah tak takin a thil hriat a sawi thin.

Hetiang taka mi hlu leh chhuanawm, Phullen khua leh Mizoram tan pawha mi hmasa  vawiina kan chan hi, a uiawm tak zet a ni. Thlamuang taka chawl hahdam turin duhsakna kan hlan e.

#BB150420181125AM

MIZORAMA THLARAU THIANGHLIM HARHNA A THLEN NI KHA:

Hnuneka Pawite, Khandaih

Vawiin April ni 6 hi Khandaih Harhna, Sangha Tlangvuaknaa a thlen ṭuma Sangha Tlangvuak tura an chhuah ni champha kha a ni. Han sawi zau hlek ila.

Mizoram aṭanga Harna chhim leh pawchhuak tura Mairang a kalte lo haw chu, April ni 4, 1906 khan Chaltlang an thleng a, Tuna Bethel hmun an tih takah hian an ṭawngṭaia, Thlarau Thianghlim hnathawh ni ngeia an hriat Mei de van aṭanga lo tla an hmu a. Chu chu Harhna Thlen ni atan kan hman tak hi a ni.

Hemi hnu lawk, April ni 6, 1906 Friday khan Khandaih khaw paho chu Tuivaia Sangha tlakvuak turin an chhuak a. April ni 8, 1906 Pathianniah Sangha vuaknaah Harhna a lo thleng ta a nih kha. Khandaih a Harhna a thlen lai hian Aizawl lamah chuan, Thlarau Thianghlim hnathawh mipui zingah a lang chhuak lem lo a.

Harhna pawchhuak tura Mairang kalte khan, a rukin nuam lo an ti deuh hial nghe nghe a ni awm e (Rev SR Lalkailuaia).

Vanphunga khua Khandaih a Harhna a thlen (April ni 8, 1906) hnu chiah, April ni 9, 1906 Thawhtanni ah khan, Aizawl lamah pawh Harhna hnathawh chu a lo lang ve ta chiah a ni.

Hemi ni (April ni 9, 1906) hian Harhna chhim tura Mizoram atanga Mairanga Khasi Assembly a kal, Chhimlam aiawhte haw tur chu Sikulpui, Aizawlah thlahna hun an hmang a. An zai chu an tawp mai thei ta lo va. Thlarau Thianghlim hnathawh a lo lang ta a.

Sikulpui a an zai hi, zing atanga an zai kha tlai lam 1:30 pm ah an bang chauh (Dr. Lalzama). / Tlai lam 4:00pm ah an bang thei chiah (Rev. SR Lalkailuaia).

Ni 9.4.1906 Thawhtanni a Aizawl a Harhna lo langah hian Thlarau Thianghlim hnathawh- Hlim taka zaiho, lam, mahni Sualna puan chu a lo lang chhuak a. Chumi ni chu Mairang Khawmpui kal lo haw te, Chaltlanga an tawngtai ho atanga ni 4 hnu ah (a ni 5-na) chiah a ni. Tin, he mi ni hi Tuivai lui a KHANDAIH pa ho Sangha Tlangvuak ram riak zinga Harhna a thlen (8.4.1906) Khandaih Harhna inṭan aṭanga ni khatna (a tuk) chiah a ni.

Mairang harhna chhimtute an lo haw a, Chaltlanga an tawngtai a, chuta Thlarau thianghlim Mei eng anga lo lang an hmuh ni April ni 4, 1906 Nilaini kha, MIZORAM HARHNA THLAN NI ah chuan an chhal ta zawk a ni.

Tichuan, mak tak maia MIPUI ZINGA HARHNA HNATHAWH a lo lanchhuah ni chu – Aizawl ah chuan Ni 9.4.1906 (Thawhtan) ah a ni a, KHANDAIH khuaah erawh ah Ni 8.4.1906 (Pathianni) khan a ni thung.

Mipui hmuh leh hriat theiha HARHNA A THLEN CHU Khandaih ah hian ni khatin a hmasa zawk a ni.

Buata Bawihtlung

On 6th April, 2018, Friday

KEIMAH PAWITE BAWK

(Chawngkhum dan tlang huat loh)
Buata Bawihtlung
17th February, 2018

 

Pic: Lai (Pawi) thuam mawi tak, Lai nula hmelṭha ten an inthuam

Kan pi leh pute hunah khan, Mizo hnam peng hrang hrangte khan, a hnam anga indeusawh fiam an uar ve hle a ni awm e. Mizo hnam peng zingah, Pawi (Lai) ho hian deusawh fiam kan hlawh nasa zual niin a lang a (kei hi pawite ka ni..haha). Han huat chi pawh niin a lang lem lo bawk a, chutianga an indeusawh fiamna langsar deuh ṭhenkhat han tarlang ila:

1. Ralte Vahai no la
2. Chhakchhuak chhum hleuh
3. Chhakchhuak Satel vawrh
4. Renthlei ar tial fin
5. Chhangte fanghma vel pan
6. Pawnpui chhe duh, Pawite bawk
7. Chhura biakbum, Pawite bawk
8. Vacha thlawh pui, Pawite bawk
9. Saphu kaih er, Pawite bawk
10. Chhura biakbum, Pawite bawk
11. Leilawta tla, Pawite bawk

Heng bak pawh hi a la awm ngei ang tih a rinawm. Mahni hnam tiin Pawi (Pawite) ho min sawi fiamna nia an sawi leh a ṭo bul ni a an sawi ṭhenkhatte hi han sawi mai mai ila:

1. Pawnpui chhe duh, Pawite bawk:  Tun hmain, khi lam a Pawi ho awm tamna kha tlangsang, ram zo lam deuh a nih vangin La a thar theih meuh loh a, La a vang hle a. Chuvang chuan thlang lama awmte  hman hnu Pawnpui, ṭha vak lo a an ngaih tawhte kha, Pawi ho tan chuan a la hlu hle a, an hawn thin a ni.  Chumai bakah, Pawi ho hian Sakei hliam hual naah Sakeiin a seh nat loh nan Pawnpui chhia chu an Lu leh dar ah te an bat hnuang thin a. Chutiang chuan mi pawnpui chhia a ngaih tawh kha an la ṭhin a, “Pawnpui chhe duh, Pawite bawk” an tih phah ta a ni an ti.

2. Vacha thlawhpui, Pawite bawk: Farkawn chhak, Burma ram chhungah hian Zawngte (Jongte) khua a awm a. Chu khua aṭanga thlang lamah chuan Vacha Dil a awm a.  Zawngte khua a Pawite pakhat Senglawnga chuan, Vacha inbual thla zawp lai kha a man a. Pathum lai an nih avangin a Hnawkhalin a hling a, a pawm hawng ta a. Kalkawngah an thla a lo ro ta, a chawlhpui lai chuan an in thing phur phur a, Senglawnga (Pawite) chu an thlawhpui ta mai a ni awm e. Chhim thlang lamah thlawk zelin Lunglei bul Sairep tlangah an ṭumpui ta daih a ni awm e. Chuta tang chuan “Vacha thlawhpui, Pawite bawk” an tih phah ta a ni an ti. Sairep tlang hi, Vacha in Senglawnga an ṭumpuina hmun a nih avangin “Senglawna Zo /  Senglawn Zo” te an tih phah ta a ni awm e.

3. Saphu kaih er, Pawite bawk: Pawite pakhat hian Saphu kua a lai a. Saphu chu a lang deuh dut dut tawh a, mahse a chhuak mai duh si lo. Tichuan a hren (a puan hren) chuan Saphu chu a hling ta a. Saphu chu leiah a lut thuk zel a, Pawite pa chuan a hren chu a kawngah a hreng nghet ve bawk si, tichuan an inpawt ta a. Saphu chuan a pawtna tial tial a, Pawite pa chu a kawngah a kai er ta reng mai a. Tichuan, “Saphu kaih er, Pawite bawk” an tih phah ta a ni an ti.

4. Chhura biak bum, Pawite bawk:  Hman laiin, Chhura chu Mawngping khaw ho thinrimin Bawmrang lian takah khungin, lipui chung Leilawn hnuai lamah an khai a, a chhuak thei lo a. Nakinah Pawi sumdawng a lo kal a, “Pawia, min phelh rawh, chu ti lo chu ka chemte hian ka vit hlum mai ang che” a ti a. Pawi pa hlau chuan a chhanchhuak a. Chhura chuan, “A nawm zia mai chu, zuk awm ve chhin mah teh” a ti a. Pawi pa chu a awm ve ta a. Chu veleh Chhura chuan Bawmrang khaina chu a sat chat a, pawi pa chu tuiah a tla ta daih a. Pawi sumdawng thil zawrh chu a neihsak ta vek a. Chuta ṭang chuan, “Chhura biak bum, Pawite bawk” an tih phah ta a ni an ti.

Hengte hi a tobul aṭang hian a thawn thu viau a, tunlai mite tan chuan ngaihhuat a hnekin a hlimawm phian zawkin ka hria. Ka hriat dan hi a dik kher lo mai thei. Pawi tih hi Lai sawina ṭhin pakhat a ni awm e. Sawi belh tur hria ten rawn chhunzawm se. Keimah Pawite bawk – Buata Bawihtlung

 

PU P LALUPAN A JAIL TANPUI VAI, KHAIHLUM TURA DAH HRAN TAWH CHHANCHHUAH DAN

MIZO PA IN A JAIL TANPUI VAI TLANGVAL, KHAIHLUM TURA KHUNG HRAN TAWH A CHHAN CHHUAH DAN
Buata Bawihtlung 22.2.2018, 7:30 PM

Mizoram buai vanglai, kum 1970 khan SILCHAR Tanin (Jail) ah hnamdang (Manipuri) tlangval pakhat chu khaihlum mai hmabakin, lungngai takin a indawm kun reng mai a.

Chu Tanin ah chuan Mizo ṭhenkhat rambuai (politics) vanga man tawk Pu V.Lalchhawna te, Pu P.Lalupa etc te an tâng ve a. Anni ho chuan chu vai tlangval, thihhlum mai hma bak chu an lainat hle mai a. A chanchin, a tân chhan leh a chungthu an rel dan zawng zawng chu an zawt chhuak ta vek a.

Chu tlangval chu a pa leh a nuhrawn kiangah awmin, a nuhrawn leh a pa chuan fa an nei bawk a. A nuhrawn chuan a fa chu a duat em em a, chu tlangval erawh  chu sal ang maiin hrehawm taka chhawrin a ti duhdah ṭhin a, engmah a sawisel ngam si lo. Ṭum khat an thu inhmu lo, thinrim puak keh chuan, a Nuhrawn leh a nuhrawn fa chu a that ta mai a.

Chu tualthah (double murder case) thu ah chuan thiam loh changin. Session Court chuan Khaihlum turin a rel tlu a, khaihlum ni puan hmabakin Condemn Cell ah an khung hrang ran tawh a lo ni a. Mahse, a duh chuan ni 90 chhungin High Court ah appeal a siam phal sak a ni a, chubakah a aiawhin Dan hre mi ten an duh chuan Appeal an siam sak thei bawk a. Mahse, fahrah rethei a ni a, ngaihsaktu a nei lem lo a. Pu P. Lalupa chuan a khawngaih a, Appeal sak a tum ta a.

Jail Superintendent in Appeal a remtih takah chuan a duh hun hunah Manipuri tlangval chu Pu P. Lalupa chuan a kawm thei ta a. Engkim uluk takin a zawt chhuak a. A chanchin a sawi leh a chunga thuneitute thiltih dan aṭang chuan, thil fel tawk lo a awm bakah, roreltute leh thuneitute chuan dan an palzam deuh niin Pu P. Lalupa chuan a hre tlat a. India dan (min hrilhtu hian India dan a ti deuh kher) hmanga chhanchhuah theih a inring ta tlat mai a. Kawng a dap ta a.

Dan lam a lo hriat ve ang angte bakah, thubuai rem dan kalhmang ziahna bu (Criminal Procedure) leh IPC bu, Jail chhung a mi, hawh phal loh, chhiar chauh phal chu, Pu P. Lalupa chuan kalchilhin a chhiar ṭhin a. A mamawh lai ni a a hriat chu a chhinchhiah zel a. An inpeih thawkhata a in hriat hnuah chuan, Court rorelna chu, a dik lo tiin High Court ah Appeal a siam ta a. India dan a hriat ang angte chu tlawhchhanah hmangin Pu P Lalupa chuan ziah dan tur a sawi (dictate) a, Pu V Lalchhawna  chuan a lo ziak zel a, an peih fel hnuah High Court ah an thawn ta a.

A tawi zawngin sawi ta ila. Hun rei pawh a rial lo, Pu P. Lalupa lehkha thehluh chu High Court chuan a chhui chiang a, thu tlingah a ngai a. Court hniam zawk thurel fel diam tawh, ‘Khaihlumna tur’ tih chu ngaihtuah ṭhat turin a titawp lailawk ta der mai a. Tichuan, Vai tlangval pawh chu Bail-a chhuah lailawk thei a ni ta a. Thawven khatin a veng deuh huai a; hmabak erawh a la ko hle a.

High Court hnenah chuan Pu P Lalupa chuan, Court hniam zawkin chu vai tlangval thiam loh a chantirna leh a chunga an rorel dan dik tawk lo lai, roreltu ten dan an hman fuh loh lai nia a hriat te chu a tarlang zel a. Mi pakhatin a rualin hmun hran a mi awlsam takin a that thei dawn em ni? tiin chu thubuai remtu hmasa ten a hun leh hmun an lo record dan inmil tawk lo laite chu ṭan chhanah a hmang hlauh zel a.

Tin, he thil a thlen lai hian, an thenawm hnaite pawhin an thawm pawh an hre miah lo te hi a mak a. Naupang a thah lai hian, a Nu emaw a pa emaw te hi lo au tuarh tuarh awm tak? A nih loh leh Nu a thah lai hian a chenpui Pa ber emaw midang emawte pawh lo au tuarh tuarh awm tak. Mahse thenawm hnai, bang dan maia awm te pawhin engti nge an thawm pawh an hriat loh theih.

Chuvangin, he tualthahna hi ani mi pakhat mai thiltih a ni thei dawn em ni? Tuna roreltu Judge ngei pawh hian amahin tih tum chhin se, a thei dawn em ni? Chuvangin, mi pakhat thil tih ni lovin, tute emaw inthurual thiltih a ni ngei a rin thu chu Pu P Lalupa chuan thiam takin ṭanchhan ah a hmang a.

Tin, Tualthat a puh chu, amah puitu Dan hremi pawh pe lo a khaihlum tura a chungthu an rel ringawt maite chu thil dik a nih loh thute pawh chu ṭanchhanah hmangin, roreltu lamin dan an bawhchhiatna lai leh an dan bawhchhiat bung leh changte chu an thur chhuak zung zung zel a. Lehlam ṭang tan hnial thlak theih lohin ṭanhmun ṭha tak tak a siam zel a.

A tawpah chuan chu hnamdang tlangval, mi 2, a nuhrawn leh naupang thattu a an puh, khaihlum mai tura Court-in a lo rel tawh chu, Mizo pa Pu P Lalupa zarah High Court chuan a chhuah ta ringawt mai a ni. He Manipuri tlangval hi Silchar a awm a ni a, a lawm em em a, a hnu ah Kristian ah a in pe ve ta nghe nghe a ni awm e.

Hetianga Jail tang mekin Jail tang ve bawk, khaihlum tura Condem Cell a dah hran tawh chhan chhuak theitu Mizo pa ngei Pu P.Lalupa hi Dan lam zirmi pawh a ni lo a. Chutih rualin Session Court in a rel tluk tawh a leh thal thei hi a ngaihsanawm ngei mai.

(He thu hi, hetih laia an Jail tanpui, High Court a an thu thlen tur, Pu P. Lalupa sawi (dictate) anga lo ziak zeltu Pu V.Lalchhawna Ex MDC, Siaha min hrilh, ka hriat ang anga ziah chhuah a ni a. Pu Upa hian ziakin a dah em ka hre lo a, amah dil lova hetia mi chhiar tura dah hi pawi a ni em lo turah ka ngai- Buata)

ALEXANDER THE GREAT A THU ROCHHIAH MAKTAK MAI KHA!

A hunlai khawvel hnehtu Thu Rochhiah mak leh awmze nei chu!

Lal tam tak tukdawl a ram zau tak awptu  Alexander ropui-a (Alexander the Great 356 BC – 323 BC) chanchin hi kan hre vek awm e. Mithiam hmingthang Aristotle a zirtir chhuak, kum 20 mi lek a nih laia, a pa Phillip II thlak a lalṭhutthleng luah tu a ni a. Kum 30 a tlin chuan a hunlai khawvel pum tih theih hneh tu a ni a. Kum 323 BC khan Babylon lal In ah kum 32 mi niin indonaa tlawm nei miah lovin a thi ta thut a nih kha.

A thih dawna a nat vak khan, a natna chu tawrhchhuah chi a ni lo a, a chenna hmun ber (homeland) pawh a thleng hman dawn lo tih a hre thiam mai a. A sipai general te a ko khawm a, an hnenah chuan “Thu rochhiah pathum ka nei a, ka thih hnu ah in lo ti hlawhtling ngei dawn nia” tiin a hrilh a.

Chu a Thu rochhiah maktak pathum te chu:

1.Pakhatna- Ka Kuang chu damdawi thiam te chauhin an zawn tur a ni ang.

2.Pahnihna – Rangkachak leh lungmantam hrang hrang, ka ro bawm a ka lo chhekkhawmte kha Thlanmual panna kawngah chappharh vek tur a ni ang.

3.Pathumna – Ka kut khinghnih chu, engmah ken nei lovin Kuang aṭangin pawnah a uai chhuakin dah tur a ni ang.

Heng a sawi zawh hian Alexander ropuia chu a chau hle a. General ho chuan an lal thu rochhiah hnuhnung mak tak chu an hrethiam lo hle a. Mahse tuman zawhna an zawt ngam lo a.

Tichuan, general zinga amah hnaih deuh ber chuan pan hnaiin a kut a fawh sak a, “I thu rochhiah te hi tihhlawhtlin a ni ngei ang tih ka tiam a che, mahse hetiang thu rochhiah mak tak i siam chhan hi min hrilh thei ang em??” a ti a.

Alexander ropuia chuan, thawk a la halh a, “Khawvel hian ka thil zirchhuah pathumte hi hre ve se ka duh a ni…

Ka thu rochhiah pakhatna aṭang hian, tu Doctor mah hian thihna ata tute mah an tidam thei tak tak lo. Thihna kotlangah chuan tumah an chhan thei lo a, engmah tih theih an nei lo a ni tih hi miten hria se ka duh a ni.

Ka thu rochhiah pahnihna aṭang hian, Ka nun pum pui kha hausakna um a, tam tak chhekkhawl tum reng rengin ka hmang ral a. Mahse, engmah hi thih hnuah kan chhawm thei si lo. Hausakna um reng renga hun hman hi hun khawhralna mai a ni tih hi miten hria se ka duh a ni.

Ka thu rochhiah pathumna aṭang hian, he khawvelah hian kut ruakin ka lut a, kut ruak bawkin ka chhuahsan dawn a ni tih hi miten hria se ka duh a ni.” a ti a.

Alexander ropuia ṭawngkam hnuhnung ber chu, “Ka ruang in phum hunah, hriatrengna lungphun engmah siam lo ula. Ka kut khinghnihte chu pawn lamah lang theiin min phum dawn nia. Tichuan, khawvel hnehtu chuan thihna ruamah chuan engmah a nei lo tih khawvelin a hre dawn nia…”  

Lal tam tak a hneh a, ram zau tak a lak vang mai a Alexander the Great tih a ni ngawt lo a, a ram lak zau tak a awpna kawnga a finna te chuan he hming ropui hi a hlawh chhuak a ni. Mahse chu ropuina chuan Thihna ruamah engmah hlutna a neih loh zia Alexander ropuia hian hrechiang ngei mai.