PU P LALUPAN A JAIL TANPUI VAI, KHAIHLUM TURA DAH HRAN TAWH CHHANCHHUAH DAN

MIZO PA IN A JAIL TANPUI VAI TLANGVAL, KHAIHLUM TURA KHUNG HRAN TAWH A CHHAN CHHUAH DAN
Buata Bawihtlung 22.2.2018, 7:30 PM

Mizoram buai vanglai, kum 1970 khan SILCHAR Tanin (Jail) ah hnamdang (Manipuri) tlangval pakhat chu khaihlum mai hmabakin, lungngai takin a indawm kun reng mai a.

Chu Tanin ah chuan Mizo ṭhenkhat rambuai (politics) vanga man tawk Pu V.Lalchhawna te, Pu P.Lalupa etc te an tâng ve a. Anni ho chuan chu vai tlangval, thihhlum mai hma bak chu an lainat hle mai a. A chanchin, a tân chhan leh a chungthu an rel dan zawng zawng chu an zawt chhuak ta vek a.

Chu tlangval chu a pa leh a nuhrawn kiangah awmin, a nuhrawn leh a pa chuan fa an nei bawk a. A nuhrawn chuan a fa chu a duat em em a, chu tlangval erawh  chu sal ang maiin hrehawm taka chhawrin a ti duhdah ṭhin a, engmah a sawisel ngam si lo. Ṭum khat an thu inhmu lo, thinrim puak keh chuan, a Nuhrawn leh a nuhrawn fa chu a that ta mai a.

Chu tualthah (double murder case) thu ah chuan thiam loh changin. Session Court chuan Khaihlum turin a rel tlu a, khaihlum ni puan hmabakin Condemn Cell ah an khung hrang ran tawh a lo ni a. Mahse, a duh chuan ni 90 chhungin High Court ah appeal a siam phal sak a ni a, chubakah a aiawhin Dan hre mi ten an duh chuan Appeal an siam sak thei bawk a. Mahse, fahrah rethei a ni a, ngaihsaktu a nei lem lo a. Pu P. Lalupa chuan a khawngaih a, Appeal sak a tum ta a.

Jail Superintendent in Appeal a remtih takah chuan a duh hun hunah Manipuri tlangval chu Pu P. Lalupa chuan a kawm thei ta a. Engkim uluk takin a zawt chhuak a. A chanchin a sawi leh a chunga thuneitute thiltih dan aṭang chuan, thil fel tawk lo a awm bakah, roreltute leh thuneitute chuan dan an palzam deuh niin Pu P. Lalupa chuan a hre tlat a. India dan (min hrilhtu hian India dan a ti deuh kher) hmanga chhanchhuah theih a inring ta tlat mai a. Kawng a dap ta a.

Dan lam a lo hriat ve ang angte bakah, thubuai rem dan kalhmang ziahna bu (Criminal Procedure) leh IPC bu, Jail chhung a mi, hawh phal loh, chhiar chauh phal chu, Pu P. Lalupa chuan kalchilhin a chhiar ṭhin a. A mamawh lai ni a a hriat chu a chhinchhiah zel a. An inpeih thawkhata a in hriat hnuah chuan, Court rorelna chu, a dik lo tiin High Court ah Appeal a siam ta a. India dan a hriat ang angte chu tlawhchhanah hmangin Pu P Lalupa chuan ziah dan tur a sawi (dictate) a, Pu V Lalchhawna  chuan a lo ziak zel a, an peih fel hnuah High Court ah an thawn ta a.

A tawi zawngin sawi ta ila. Hun rei pawh a rial lo, Pu P. Lalupa lehkha thehluh chu High Court chuan a chhui chiang a, thu tlingah a ngai a. Court hniam zawk thurel fel diam tawh, ‘Khaihlumna tur’ tih chu ngaihtuah ṭhat turin a titawp lailawk ta der mai a. Tichuan, Vai tlangval pawh chu Bail-a chhuah lailawk thei a ni ta a. Thawven khatin a veng deuh huai a; hmabak erawh a la ko hle a.

High Court hnenah chuan Pu P Lalupa chuan, Court hniam zawkin chu vai tlangval thiam loh a chantirna leh a chunga an rorel dan dik tawk lo lai, roreltu ten dan an hman fuh loh lai nia a hriat te chu a tarlang zel a. Mi pakhatin a rualin hmun hran a mi awlsam takin a that thei dawn em ni? tiin chu thubuai remtu hmasa ten a hun leh hmun an lo record dan inmil tawk lo laite chu ṭan chhanah a hmang hlauh zel a.

Tin, he thil a thlen lai hian, an thenawm hnaite pawhin an thawm pawh an hre miah lo te hi a mak a. Naupang a thah lai hian, a Nu emaw a pa emaw te hi lo au tuarh tuarh awm tak? A nih loh leh Nu a thah lai hian a chenpui Pa ber emaw midang emawte pawh lo au tuarh tuarh awm tak. Mahse thenawm hnai, bang dan maia awm te pawhin engti nge an thawm pawh an hriat loh theih.

Chuvangin, he tualthahna hi ani mi pakhat mai thiltih a ni thei dawn em ni? Tuna roreltu Judge ngei pawh hian amahin tih tum chhin se, a thei dawn em ni? Chuvangin, mi pakhat thil tih ni lovin, tute emaw inthurual thiltih a ni ngei a rin thu chu Pu P Lalupa chuan thiam takin ṭanchhan ah a hmang a.

Tin, Tualthat a puh chu, amah puitu Dan hremi pawh pe lo a khaihlum tura a chungthu an rel ringawt maite chu thil dik a nih loh thute pawh chu ṭanchhanah hmangin, roreltu lamin dan an bawhchhiatna lai leh an dan bawhchhiat bung leh changte chu an thur chhuak zung zung zel a. Lehlam ṭang tan hnial thlak theih lohin ṭanhmun ṭha tak tak a siam zel a.

A tawpah chuan chu hnamdang tlangval, mi 2, a nuhrawn leh naupang thattu a an puh, khaihlum mai tura Court-in a lo rel tawh chu, Mizo pa Pu P Lalupa zarah High Court chuan a chhuah ta ringawt mai a ni. He Manipuri tlangval hi Silchar a awm a ni a, a lawm em em a, a hnu ah Kristian ah a in pe ve ta nghe nghe a ni awm e.

Hetianga Jail tang mekin Jail tang ve bawk, khaihlum tura Condem Cell a dah hran tawh chhan chhuak theitu Mizo pa ngei Pu P.Lalupa hi Dan lam zirmi pawh a ni lo a. Chutih rualin Session Court in a rel tluk tawh a leh thal thei hi a ngaihsanawm ngei mai.

(He thu hi, hetih laia an Jail tanpui, High Court a an thu thlen tur, Pu P. Lalupa sawi (dictate) anga lo ziak zeltu Pu V.Lalchhawna Ex MDC, Siaha min hrilh, ka hriat ang anga ziah chhuah a ni a. Pu Upa hian ziakin a dah em ka hre lo a, amah dil lova hetia mi chhiar tura dah hi pawi a ni em lo turah ka ngai- Buata)

Advertisements

ALEXANDER THE GREAT A THU ROCHHIAH MAKTAK MAI KHA!

A hunlai khawvel hnehtu Thu Rochhiah mak leh awmze nei chu!

Lal tam tak tukdawl a ram zau tak awptu  Alexander ropui-a (Alexander the Great 356 BC – 323 BC) chanchin hi kan hre vek awm e. Mithiam hmingthang Aristotle a zirtir chhuak, kum 20 mi lek a nih laia, a pa Phillip II thlak a lalṭhutthleng luah tu a ni a. Kum 30 a tlin chuan a hunlai khawvel pum tih theih hneh tu a ni a. Kum 323 BC khan Babylon lal In ah kum 32 mi niin indonaa tlawm nei miah lovin a thi ta thut a nih kha.

A thih dawna a nat vak khan, a natna chu tawrhchhuah chi a ni lo a, a chenna hmun ber (homeland) pawh a thleng hman dawn lo tih a hre thiam mai a. A sipai general te a ko khawm a, an hnenah chuan “Thu rochhiah pathum ka nei a, ka thih hnu ah in lo ti hlawhtling ngei dawn nia” tiin a hrilh a.

Chu a Thu rochhiah maktak pathum te chu:

1.Pakhatna- Ka Kuang chu damdawi thiam te chauhin an zawn tur a ni ang.

2.Pahnihna – Rangkachak leh lungmantam hrang hrang, ka ro bawm a ka lo chhekkhawmte kha Thlanmual panna kawngah chappharh vek tur a ni ang.

3.Pathumna – Ka kut khinghnih chu, engmah ken nei lovin Kuang aṭangin pawnah a uai chhuakin dah tur a ni ang.

Heng a sawi zawh hian Alexander ropuia chu a chau hle a. General ho chuan an lal thu rochhiah hnuhnung mak tak chu an hrethiam lo hle a. Mahse tuman zawhna an zawt ngam lo a.

Tichuan, general zinga amah hnaih deuh ber chuan pan hnaiin a kut a fawh sak a, “I thu rochhiah te hi tihhlawhtlin a ni ngei ang tih ka tiam a che, mahse hetiang thu rochhiah mak tak i siam chhan hi min hrilh thei ang em??” a ti a.

Alexander ropuia chuan, thawk a la halh a, “Khawvel hian ka thil zirchhuah pathumte hi hre ve se ka duh a ni…

Ka thu rochhiah pakhatna aṭang hian, tu Doctor mah hian thihna ata tute mah an tidam thei tak tak lo. Thihna kotlangah chuan tumah an chhan thei lo a, engmah tih theih an nei lo a ni tih hi miten hria se ka duh a ni.

Ka thu rochhiah pahnihna aṭang hian, Ka nun pum pui kha hausakna um a, tam tak chhekkhawl tum reng rengin ka hmang ral a. Mahse, engmah hi thih hnuah kan chhawm thei si lo. Hausakna um reng renga hun hman hi hun khawhralna mai a ni tih hi miten hria se ka duh a ni.

Ka thu rochhiah pathumna aṭang hian, he khawvelah hian kut ruakin ka lut a, kut ruak bawkin ka chhuahsan dawn a ni tih hi miten hria se ka duh a ni.” a ti a.

Alexander ropuia ṭawngkam hnuhnung ber chu, “Ka ruang in phum hunah, hriatrengna lungphun engmah siam lo ula. Ka kut khinghnihte chu pawn lamah lang theiin min phum dawn nia. Tichuan, khawvel hnehtu chuan thihna ruamah chuan engmah a nei lo tih khawvelin a hre dawn nia…”  

Lal tam tak a hneh a, ram zau tak a lak vang mai a Alexander the Great tih a ni ngawt lo a, a ram lak zau tak a awpna kawnga a finna te chuan he hming ropui hi a hlawh chhuak a ni. Mahse chu ropuina chuan Thihna ruamah engmah hlutna a neih loh zia Alexander ropuia hian hrechiang ngei mai.  

TURA HRAIHLUM TUMNA ATA MAHATMA GANDHI CHHANHIMTU BATAK MIAN, SORKARIN NGAIHSAK LO

Tur a hrai hlum tumna ata
MAHATMA GANDHI CHHANHIMTU BATAK MIAN, SORKARIN NGAIHSAK LO
A lawmman tura India President tiam ala hlawhtling lo.

Kum 1917 khan Bihar a Motihari District khaw pakhata eisiamtu Batak Mian chuan hruaitu ropui tak Mahatma Gandhi chu, tur (poison) a hrai hlum tumna ata a chhan chhuak hlauh mai a. He chanchin hi hre lo tam tak kan awm mai thei.

Kum 1917 April ni 15 khan, Motihari station ah mipui sang tam takte chu, an manganna ata hruai chhuak thei tura an beisei MK Gandhi leh Dr Rajendra Prasad te hmuakin an pung khawm a.

Mahatma Gandi te hi Muzaffarpur atanga kalin tlai dar 3 ah Motihari chu an thleng a. Anni hi, chulai ram a Indigo (rawng siamna hnim chikhat) chinna hmuna, Mingo hovin hmuh hrehawm khawpa rim taka Loneitute an chhawr dan en thlithlai tura kal an ni a.

He an fehchhuahna hian British laka nawrhna (satyagraha) a hring chhuak dawn tih a hun lai khan tuman an hre lawk lo. Gandhi hova British laka nawrhna hmasa ber chu huaihawtin, India zalenna tura beihna kawngah bung thar an kai ta a ni.

Hemi tum hian Indigo huan Manager, British mi Erwin chuan Gandhi chu chaw ei ah a lo sawm a. Loneitute a chhawr dan chungchanga Gandhi lo inrawlh ve avanga thinur Erwin chuan Gandhi chu chaw ei na a hraihlum chu a tum ru ran a.

Erwin-a chuan a eisiamtu Batak Mian hnenah, Gandhi chu Bawnghnute, tur (poison) nena pawlh chu pe a, hraihlum turin a hrilh a. A tih hlawhtlin ngei theih nan, nasa taka thlemin, a vau bawk a.

A hun a lo thleng a, Batak Mian chuan Gandhi chu Bawnghnute, tur pawlh chu a pe ta ngei a. Mahse, Gandhi hraihlum chu a duh lo a, chu Bawnghnute chu tur (poison) pawlh a nih thu leh hraihlum tuma phiar ruk a nih dante Gandhi chu a hrilh ta vek a. Chu chu an kianga awm ve Dr Rajendra Prasad, a hnu a India President hmasa ber ni ta pawh chuan a hriatpui ve vek a.

Chu tualthah tumna chuan British laka nawrhna “Satyagraha” an huaihawt chu a ti hlawhtling leh zual a. Mahse, Batak Mian erawh chu Lungin ah khungin, nasa taka nghaisak a ni a. A In chu ruang halna atan hman luih sak a ni a, a chhungte pawh Motihari daifem a an khua Siswa Ajgari atangin hnawh chhuah an nih phah ta a ni.

He mihuaisen thil tih hi, rei tak mite hriat zui lohin a awm a. Kum 1950 a Dr Rajendra Prasad, India President hmasa ber a nih laia Motihari a tlawh khan, mipui tam takin an lo hmuak a. Kawngka bulah chuan putar mitkhur thuk deuh tak chuan amah rawn pan a tum tih a hmu a. India President Dr Prasad  chuan Batak Mian kha a ni tih a hriat chuan a ding a, a kuah a, dawhsan ah chuan hruaiin a kiangah a thut tir ve ta a.

Mipui kalkhawm chuan chu chu mak an tiin a chhan hriat an chak em em mai a. President chuan a kianga thu chu Mahatma Gandhi nunna chhanhimtu a nih thu a sawi ta a. Tichuan, inpuahchah lawkna pawh awm hman lova Eisiamtuin Gandhi hraihlum tura thlemna nasa tak a hnar dan leh chumi avanga hremna nasa tak a tawh zui dan chanchin chu, mipuite chu a hrilh a. Batak Mian chu ni lo se, Gandhi kha a thi hial ngei ang, tiin runthlak takin a sawi a.

Eisiamtu Batak Mian te chhungkuain harsatna an tawh dan zawng zawngte a hriat hnu chuan, ram tana a thil tih ropui tak ngaihhlutzia entirnan, chulai bialtu DC hnenah Batak Mian leh a fapa 3 te chu ram zau tak, tin 24 hmun a zau pe turin a hrilh a.

Mahse, vanduaithlak takin, kum za dawn a liam hnuah pawh India President Dr Rajendra Prasad thu pek chu tihhlawhtlin a awm lovin, Batak Mian a tute chuan Sorkar thu tiam chu a hlawhtlin hun an nghak ta ngar ngar a ni.

Kum 2010 khan, Hindustan Times in Batak te chhungkaw chanchin a ziah atang chuan India President Dr Pratibha Patil chuan a lo hre ve a. District Magistrates hnenah Dr Rajendra Prasad thu tiam tihlawhtling tura hmalak a nih dan sawi (reports)  turin a ti a. Khatihlai khan CM Nitish Kumar pawhin ngaipawimawhin DC Tirhut SM Raju hnenah tanpui dan dap turin a ti a. Mahse, sorkar chuan a bawihzui ta chuang lo.!

Tunah chuan, Batak Mian leh a nupui thlan chu Siswa Ajgari ah, khua a ni tih pawh hriat meuh loh ah tlawhtu leh tuiahnumtu pawh nei lovin a awm ve reng a. A tute chu Valmiki Tiger Reserve forest kiangah inhlawhfa chawpin an khawsa ve hram hram a ni.

India hian, zalenna sual chhuaktu, hruaitu ropui Mahatma Gandhi nunna chhanhimtu Batak Mian a laka a leiba hi a tlak a hun tawh tak zet a. Fakhlawh loh Pasaltha Batak Mian hi, a phu ang ngei a, zahna lantir a, a thiltih ropui tak hi hriatsak a hun tawh tak zet a ni.  

Batak Mian kha lo ni lo ta se chuan, India chanchin hi a danglam daih mai thei.

 

Zoram Tluana Mi riangvai Thangteeka

 

Thangteeka Phullen

Thangteeka hi rualban lo, chhungkhat laina sawi tur pawh nei lo, ringvai a ni a. A nu leh pa hming takngial pawh a hre lo a. A pian kum chu Thli chhe tleh kum a ni.

 Amah hi Piangsual, ke lek lam deuh a nih avangin a thatlai deuh pawhin kal pangngaiin a kal hlei thei lova. A kawng kal hi tlan deuh reuhin a petek euh euh thin a ni. Tum khat chu Aizawl ah miin Pheikhawk an lo pe a, a Pheikhawk thar bun chuan Durtlang lamah a kal ta a. Durtlang a thlen chuan a Pheikhawk thar chu a chhip a pawp hman tawh a ni.  Ratu lam tlangdung a zin tum pawhin, kawng lakah Sakei nen an in tawk hlauh mai a. Sakei chu kawrah a zuang lut ta daih a, Thangteeka chuan a hlau lutuk petek chuan Sakei zuan luhnaah tak a petek lut ve a ni awm a, tun thlengin Thangteeka leh Sakei zuan thlakna tiin an la sawi a ni.  Chutianga ke dik lo chu a ni a, a lainatawm hle.

Chutiang a ni chunga kawng mumal lo leh fur khaw chhe karah pawh, khaw hrang hrang a tlawh kual reng tho a. Mi ten mak an ti hle thin a, Sapuiin a hruai thin a nihte an ring hial thin. Hmun thenkhatah chuan naupang ten an lo chhaih nawmnah chang a tam a, chutih rualin, amah lainata, duhsaktu pawh a tawng ve zel bawk. Phullen pawh a lo tlawh ve tawh thin a ni ngei ang Khawnbawl Upa Pu Hrangphunga, Pu Tlanhnuna pa te nen an in hre tha hle a, tin Pu Khuanghnuna pi (a nu nu)  Pi Tlingzovi te nen pawh an in hre hle a ni.

 Chutianga khaw hrang hranga a awm kual hnu chuan Phullen chu nuam a ti hle a ni ang, Phullen a thih a, Phullen a lunghah a duh thu a sawi a. Phullen tlangval leh pa ho chuan Chhawrtui atangin Changzawl lamah kalpuiin, Phullen ah an zawn haw ta a. A pualin Lailak veng, Pu Hmingthanga In bulah a In tur an sak sak a. Tah chuan awm ve in, khawtlang mipui ten Buhfai te an khawn khawm sak a, eitur an pe thin a. Chhawrtui khua ah hian miin coat an lo pe a. Chu coat chu a buang, fual lam deuh a ni nghe nghe a.  Chu a coat dawn chu ama mamawh lei nan pawisa a chantir kha tha zawkin an hriatsak a, Hmun hlui veng a mi Pu Chawngkhuma (Pu Kaphlira patea) chuan Rs 20 (sawmhnih) laiin an lei chhawn sak ta a ni.

 A pian dik tawk lo vang hian a mu te hi thawh a harsat a.  A upat deuh hnu phei chuan kal a harsat zual a, tlangval hovin an riahpui thin a ni. Vawikhat chu, Pu Ralzinga leh Pu Lalbuanga (Rammawii pasal) ten an riahpui a. Zan ah a zun a chhuak ta, a tho mai thei si lo, “Tlangval te u, ka zun a chhuak e” a ti a. A riahpuitute kha an lo mutui deuh a ni ang, an hre thei si lo. Kawmchhak pa Pu Awrhchunga (Pu Hmingthanga pa) chuan a lo hria a, a zuk kai tho ta a ni awm e. Chutiang chuan thenawm khawveng nula tlangval ten an ngaihsak hle a ni.

 Thangteeka hian Kohhran a belbul hle a. Kohhran mi tak a nih vangin Kohhranin a ngaihsak em em a, chaw petu turte, riahpui turte Kohhran inkhawm a thulh ngai lo a ni. Mahse a ke dik loh deuh vangin a kal tha thei vak lo va. Tlangval hovin a inkhawm turte hi an zak zeh a, an kalpui nawl nawl thin. Biak In ah pawh Pulpit hnung lam deuh ah chuan thutna chuam bik a nei a, a thlen tlai pawhin chulai chu a pan vang vang thin. Khawi ah leh lehkha a zir hriat a ni lo va, mahse lehkha a chhiar thiam a. Bible hi a kawl reng thin a, a Bible chhiar erawh a awmzia hriat fiah hleih theih a ni lo.

 Chutianga hun a hman hnu chuan, kum 1947 October ni 23, Nilaithawhtan khan chatuan ram a pan ta a. Thangteeka thih ni hian, mak tak maiin, khua a chhe nasa hle a. Thli a tleh hum hum a, nasa taka ruah surin, khua a cheng a, a hrehawm hle a. A thlan hi hmunhlui thlanmual ah, tuna Bung lianpui chhak lawk, Zangchhiaa (Lalbeli pa) thlan bulah an laih sak a. Tlangval thlan lai tan pawh Thlan khur pawna awm kha a hrehawmin taimak leh tlawmngaihna zawkah ngaih hial khawpin khua a chhia a ni. He a thih ni a thli tleh hi Tualbung velah a na zual a, Kawlthei hnah leh thing hnah dangte, phaitual hnim chenin a chhem fi thulh nghe nghe.

 Hmunhlui thlanmuala phum a nih bakah, Phullen tlangval leh pahote chuan Thangteeka pual hian Lungdawh tha tak siam sak an tum a. Nula leh tlangval ten Thangteeka lung dawh tur hi Hmunhlui lam Khiangkarkah thlen hma Tuitai mawng ami an la a, phur tak leh hlim takin an zawn haw a, an haw haw hulh hulh a ni awm e. A thlan lunga thu ziak dah tur pawh tha tak a siam an duh a. Upa Zalawra (Sande Sikul lama mi lar tak) Mission veng chuan  “in duh angin a thu rawn ziak ula, phai ah ka lo thawn ang e” a ti a. YMA in Thlana ziak tur thu a thawn chu Pu Zalawra khan kimchang deuh hret turin a lo tidanglam hret a.  Tichuan Culcutta ah a thawn ta a, a thu ziak chu thir phekah reh thei lo turin thil var phum hmangin tha takin an ziak a ni.

 Tichuan a thih atanga kum khat hnu, kum 1948 khan Phullen YMA chuan nalh leh mawi takin, Phullen Kawn atanga Aizawl lam panna kawngpui kam, hnai te ah chuan Thangteeka Hriatrengna Lungdawh tha tak chu an siam ta a. He lungdawh hi lal Awksarala thlan tih loh ah chuan a hun laia Phullen lung dawh tha ber a chhal theih a ni ang.  Thangteeka Lungdawh ah chuan a hnuaia thu ang hian ziah a ni a, a laiah Kros lem mawi tak ziah lan a ni bawk –

 

ZORAM TLUANA MI RIANGVAI
THANGTEEKA
KUM 76, THIH NI : 23.10.’47

 Kuta sak loh chatuan In chu
A tan buatsaih a ni.

 LUNG PHUNSAKTU:-
PHULLEN
YOUNG MIZO ASSOCIATION
(Y.M.A 1948)

 Khaw hlui atangin khaw hnuai lamah, motor kawngpui kal awlsamna lamah insawn a nih takah khan khaw hlui chu ramngaw a lo nit a a. Thangteek Lungdawh pawh chu Motor kawngpui kam Serzawl-Kawn, tuna YMA Ram an tih tak ah sawn a nit a a. (Thangteeka Lungdawh sawn a ni hi ka ui tak zet – Buata)

A pian kum hi Thlichhe tleh kum tih a ni a. Thli chhe tleh kum chu 1876 a ni a. Mahse a Lungdawh ah chuan kum 76 mi niin ni 23.10.1947 ah a thi tih ziah a ni a.  Thli chhe tleh kum a piang a nih chuan kum 72 mi ni awm tak a ni. Thlan lung phuntu Phullen Branch YMA te hian Thli chhe tleh kum hi an hai nge a kum zat hi an chhut sual palh zawk tih chu hriat mai a harsa deuh.

 

Buata Bawihtlung
Dt. 6th July, 2017

*******************

Mawmrang Tlang huai lal Sahmula

Kan pi leh pu te atangin Ramhuai chi hrang hrang an sawi kan hre awm e. Ramhuai zingah hian mihringte tina thin leh nunna hial laksak thin an awm laiin, Ramhuai fel tak tak, mihringte malsawmna pe thinte pawh an awm bawk.

Mizo pi leh pu ten Ramhuai an sawi thin hrang hrangte chu, a vai chuan kan sawi seng lo vang a. Ramhuai tam tak zingah Lasi, Khuavang, Maimi, Tau, Khawhring, Phung, Chawm leh Huai te hi hriat an hlawh viau. Huai kan tihte pawh hi Tui huai, Tlang huai, Sih huai, Bung huai te an awm ve leh bawk a.

Tlang huai zawng zawng zingah Mawmrang tlang huai lalpa Sahmula chu lal ber, thu ber leh huai ber ah kan pi leh put e khan an ngai a. Ramhuai lal in a thut ni a sawi Tlang te chu – Mawmrang tlang te, Reiek tlang te, Chhawrpial tlang te, Khawbawn tlang te, Pukzing tlang te niin an sawi.  

Mawmrang tlang hi Aizawl atanga hmar chhak lam 150 kms velah a awm a. Mawmrang chhim lam tlang chhip ah hian Lungpui tohlawt lianpui, fai vuk mai hi a a awm a. Chumi chung zawl chu thing leh mau te to lovin phul te a awm a, a fai nuam hle a. Chulai chu Mawmrang tlang huai lal Sahmula tualchaina niin an ngai a, Sahmula Tual tih a ni.

Sahmula pa hi Sabereka a ni a, Sabereka pa chu Beilebuta a ni a, Belebuta pa chu Tuanlehmanga ni a sawi a ni. Sahmula hian fanu hmeltha em em mai, sawisel bo khawp a tha a nei a, a hming chu Lengthuampuii a ni awm e. Sahmula hi a lal hle a, ramhuai dangten an zahin an hlau hle a ni.

Sahmula hi Mihringte hnenah malsawmna pe theitu ah ngaih a ni a, chuvangin tihlungawi loh an hlau hle thin a, lal leh Upate, Sadawt te, Thirdeng te leh Upamin ten khua atanga chhuakin khun khan takin an be thin. Sahmula an biak dawn hian Mawmrang lan theihnaah Maicham an siam a, Mawmrang tlang lan theih lohna ah pawh, a lam hawi talin an be thin. Mawmrang tlang lal Sahmula an biakna a Sadawtin Thiam Hla an chham thin chu –

Hm…Hm…Hm..
Chibai, Chibai, Chibai..
Kan hlan e, kan hlan e, kan pu Sahmula kan hlan e.
Kan Ar hluingo kan hlan e
Lengthuampuii kan hlan e, Kelchal hmai tluak kan hlan e.
Kan dil e, kan dil e, Mal sawm mal za kan dil e
Sawmfang mal za kan dil e.
Sa tin mal za kan dil e, a lian tha tha kan dil e
Mi lu, sa lu lawi nan kan dil e.
Chhang ang, chhang ang, kan pu Sahmulan chhang ang.
Lengthuampuiin chhang ang, Maltin sawmin chhang ang.
Sawmfang malzain chhang ang,
Mi lu sa lu tamin chhang a,Thing dam chenin chhang ang,
Ngalfim khup bihin chhang ang.
Pi biakin lo chhang ang che, Pu biakin lo chhang ang che.
A chhang ngaiin lo chhang ang che…..

Hetianga Sahmula an biak naah hian, chaw fun nen kalin, hlum a an siam – Milim te, Darbu thum te, Se lem (sawm) te, Darkhuangte, Bing leh Haite ten en, Ar ngo leh Tui te paiin an kal a. Maichamah chuan Milim, Darkhuang, Darbu, Se lem te chu Mawmrang lam hawiin an dah tlar thin a ni. Tin, Sahmula fanu Lengthuampuii pualin Kel chal lim an hlan tel thin bawk. Sahmula an biak lai hian, khaw mipuite pawh pawn chhuak lovin an lo inkharkhip tlat thin. Vanbawng khaw ram a Tlang pakhat pawh, tun thlengin “Sahmula biakna tlang” an la ti a ni.

Sahmula hi a lalin chanchin a ngah hle a. Hmanlai hian Reiek tlang huai hote chu, an lalnu Khawluahlali hovin Tlawng huai nena an  indo zo, hnehna lawmin chawng an chen a, an lam mup mup a. Chutih lai tak chuan thlang lam atangin Chhawrpial  Tlang huai ho chuan Reiek huai ho chu run an tum a. Reiek thuai ho awmna lungpui lian tak takte chu tih chim vek tumin a rukin an bei ta tluk tluk a. Chu chu Belkhai Tlang huai chuan a lo hre khiau a, Reiek Tlang huaite chu a khawngaih a, a hrilh ta a.

Chutia an chawngchen hlim laia an awmna Lungpui kar chim vek tuma Chhawrpial tlang huai ten an lo bei chu an thin a rim a, Reiek huai ho chu Sialsir ah changing an thlawk chhuak a. Chhawrpial huai ho nen chuan vansang indona rapthlak tak mai chu an nei ta a. Thisen nasa takin a far a, Lu bung leh thla tliakin an tla a, an let rem rum a. Reiek Tlang huai lalfanu Darthaikawii pawhin nunna a chan phah a. An sal mante hnanga an phuar theih loh nan tiin Belkhai huai ho chuan chu lai Mau ho chu a chang vet chhuak chiatin mit a neih tir vek a. Hei hi tun thlengin a la ni zui zel a ni awm e.

Chu indona rapthlak tak chu tlang huai lal ber Mawmrang tlang huai Sahmula chuan a lo hre ta a, tha a ti lo hle a, tawp turin a ti a. Mahse an indo nasa mai si a, an tawp mai thei lo va. Chutah Samula ngaihdan a ni ta lo va, Reiek tlang leh Chhawrpial tlang te chu a sai ta dum dum a, a hek huai nghe nghe a ni awm e. Chutia Sahmula a thinrim tih an hriat chuan, Reiek tlang huai leh Chhawrpial tlang huaite chu an indo chhunzawm ngam ta lo va, an tawp san ta a ni an ti.

Mawmrang tlang atanga hla vak lo Phullen leh Buhban inrina bul ah hian Lungleng kham a awm a, a bulah Tuivawl lui a luang bawk a. Zawngin ram ah hian Puk huai lalpa Melmula a awm a, Zawngin nula hmeltha Siami chu neih tumin a rim thin a ni awm e.  Tumkhat chu, Lungleng kham Huai ten Tuivawl tiau pho a an fate Ni lum ai tira an pho chu, Zawngin khaw pasaltha ramvak ten an rah hlum sak hlauh mai a. Lungleng kham huai te chu an thin a rim ta em em a. Phuba lak ngei duhin, mihringte chu tihlum ve ngei an tum a.

Lungleng kham huai te chuan Puk huai lalpa Melmula chu an berawn hmasa ta a. Melmula chuan, “e Mihringte thih leh dam thu te chu, keia rel theih rual a ni lo ve, Mawmrang tlang huai lal Sahmula rawn zawk rawh u” tiin a lo hrilh a. Sahmula chu an pan ta a.

Mawmrang tlang huai Sahmula chuan, Lungleng kham huaiho henah chuan, “mihringte hmuh theih lohin in insiam a, an kalna tur takah infate in pho bawk si a, an rah hlum mail oh nakah. Mihringte thiam loh pawh a ni lo, in fimkhur loh vang zawk a ni” a ti a. Lungleng kham huaite chuan Sahmula chu an hlau hle a, mihringte chungah phuba lak an tum pawh chu ti ngam ta lo a ni awm e.

Hetiang hian ramhuite chanchin hi sawi tur tam tak a awm a. Mawmrang tlang huai lal Sahmula hian chanchin a ngah hle a ni. Sahmula tual bul velah hian Purun a awm a. Chu chu tuna Mizo purun ang hi a ni a, chu chu Sahmula purun an ti thin. Tin, Sahmula tualah hian Zawhte ki nei a awm a, a hmu apiang chu an thi zel thin niin an sawi thin bawk.  

    Mizoram a Kristianna a lo luh hlim deuh 1903-ah Mawmrang Tlang bul Vanphunga khua Khandaih (Tuna Phullen ni ta) ah hian Kristianna a lo lut ve a. Sikul te dinin Kristian an pung zel a. Kum 1906 ah Khandaih khuaah chuan hri a leng ta hlauh mai a. Tui hri a ni awm e. Hei hi Kristian lote chuan Kristian te vanga lo thlengah an ngai tlat a. Kristian ten Ramhuai lal Sahmula an ti thinur niin an ngai a ni. Zosapte leh Sorkar lam ten hrileng tih reh tuma Tuikhura damdawi an phul te chu hre thiam lovin, Kristian te hian min hrai hlum an tum a ni ang tiin khaw thar kai an rel phah hial a ni.

Heng ramhuai te leh an chanchinte  hi a thawnthu viau na a, kan pi leh pute atanga an rindan leh an hriat dan an inhrilh chhawn zel a ni a. Kan awih emaw awih lo emaw, a ngaihnawm bakah a hlu ve riau.

Biakrawn leh Thu laknate:
1. Pu K. Zawla
2. Pu B. Ngurchhawna
3. Pu R. Chaldailova
4. Pu V. Vanthuampuia

Buata Bawihtlung
9862035204, buata.tkt@gmail.com

************