Lawng Kehchhia

LAWNG KEHCHHIA

(He thawnthu tawi hian mihring rilru inan loh zia a tifiah tak zet – BB)

Țum khat chu, khualzin phur Lawng pakhat hi tuifinriat a zinkawng a zawh laiin, Thlipui leh ruah nasa tak chuan a nuai a. Lawng chu a keh chhe ta a. A chhûnga chuang tam tak zingah mi pahnih – Sam-a leh Jose-a te chauh chuan chulai tuifinriat a thliarkar te tak te, thlaler ang maia ruak chu an hleuh kai thei a.

Mi pahnihte chuan chu thliarkar chu hleuh kaiin an nunna chhanhim mahse, thliarkar ruak ringawtah chuan ei tur emaw hmanrua emaw engmah han rin zui tur leh mamawh phuhrukna tur chhe te takngial pawh a awm si lo. Țawngțai ngawt mai loh chu engmah tihtur dang reng an hre lo.

Chutia an țawngțai an țawngțai kar lakah chuan, ngaihtuahna thar an nei ta a. An pahnih chuan, tu țawngțaina nge thiltithei zawk tih infiahna atan, chu an awmna thliarkar chu a zahve ve ve a insem a, awm hran an rawt ta a.

Mahni chan lam ve veah chuan an awm a, an țawngțai leh ta a. An țawngțaina a an thil dil hmasak ber chu eitur – chaw a ni. Ni a liam a, a tûk khua a lo var chuan, Sam-a ram chinah chuan Thei kung chu lo awmin, a lo rah tup mai a. Chu theirah chu eiin chaw atan a ring a. Chutih lai chuan Jose-a ram erawh a ngai tein a la ruak vek mai a.

Chawlhkar khat hnuah chuan, ei tur nei zawk Sam-a chuan, a khawhar hnêm tu tur Nupui dila țawngțai a tum ta a. Ni a liam a, a tuk khua a lo var chuan, chu an awmna bul tuifinriatah chuan Lawng a rawn chesual ve leh ta a. Chu Lawng chesual ațanga damkhawchhuak awmchhun, nu pakhat chuan engmaw ti tiin Sam-a awmna lam thliarkar chu a rawn hleuh kai thei hlauh mai a. Tichuan khawhar inhnem tawnin an awm dun ta a. Chutih lai chuan Jose-a chuang engmah a la neih belh ve lo a.

Ei tur leh nupui a neih hnu chuan, Sam-a chu chenna tur In leh thawmhnaw bakah ei tur tam zawk dilin a țawngțai leh ta a. Mak tak maiin, a thil dil ang angte chu a hnu lawkah a nei thei ta vek mai a. Mahse, a țhianpa Jose-a erawh chuan engmah a la nei ve ta chuang lo.

Sam-a chuan malsawmna tam tak dawngin, a dil ang chu a nei ta zel a. Nakinah chuan,  a nupui nena chu thliarkar khawhar tak ata an haw leh na tur Lawng dilin zankhuain a țawngțai leh ta a. Zing khua a lo var a, mak tak maiin a awmnaah chuan Lawng a lo awm ringawt mai a. A lawm hle a.

Chu Lawngah chuan Sam-a leh a nupui chu chuangin chu thliarkar chu chhuahsan a, Jose-a chu kalsan an tum ta a. Chutia a țawngțainate chhân a a awm zel lai a, Jose-a țawngțaina erawh pakhatmah chhân a ni ve ta lo chu, Sam-a chuan, rilru te tein, Jose-a chu Pathian malsawmna dawng tlak lo ah a ngai a.

Sam-a chuan a nupui nen chu thliarkar an chhuahsan dawn lai tak chuan, van ațangin aw an hre ta. “Engvangin nge i kawppui Jose-a kha, kha thliarkar atanga kalsan i tum tak mai le?” a rawn ti a.

Sam-a chuan, “Heng Malsawmna ka dawnte hi ka țawngțaina rah liau liau a ni a, chuvangin hengte hi keima ta chauh a ni. Ani țawngțaina leh a thil dil zawng zawngte erawh chu chhanin a awm ve lo a, chuvangin engmah hi a phù ve lo a ni” tiin a chhang a.

Van ațangin Aw chuan, “I hre sual hle a nih chu, Jose-a khan thil pakhat chiah dil a nei a, chu chu ka chãn sak asin. Chuti ni lo se chuan, heng malsawmna i dawn zawng zawngte hi ka pe hauh lo ang che” a rawn ti ta mai a.

Sam-a chu mak ti takin a ngawi vang vang a. Nakinah chuan, “A nih leh, engnge Jose-a țawngțaina leh a thil dil, ka tana chuti fakaua awmze nei chu ni a?” tiin Van lam ațanga Aw lo chhuak chu a zawt let a.

Van lam ațanga Aw bawk chuan, “Jose-a țawngțaina chu i hriat duh chuan, ngun takin lo ngaithla rawh, ‘I țawngțaina chhan a nih a, i thil dilte pek i nih theih nan țawngțaiin a rawn dil a” tiin a rawn chhang ta a ni.

Mihringte hi kan inang loin, kan rilru puthmangte hi a inang lo thei tak zet. Dinhmun inang, harsatna tawh inang reng pawh, kan hmachhawn dan a inang lo țhin hle. Mite tana malsawmna ni tur pawh hian neih tam leh tam loh lam pawh a lo ni lo. A pawimawh ber chu kan rilru puthmang zawk hi a lo ni.

Midangte chunga kan rilru puthmang hi Pathian hian a lo hre vek si a.
(Lehlin paha a ngaihnawm tura phuah rem – Buata Bawihtlung – BB150720170130PM)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s