Remna Ni titi

Remna Ni champha denchhen a Whatsapp group a ka thu dah, ngaihtuah lawk lem lova ka ziah ve mai mai hi, hetah hian kan dah ve ang e

– Buata

Pi leh pute hun ata tawh, Mizote mahni lal te theuh awpna hnuaiah awmin, tute hnuaiah mah kan kun ngai lo. Keini aia hnam lian leh chakzawkte pawh awm mahse, an hnuaiah kun lovin, kan phak tawkin ro kan in rel ve a, kan ram leh hnam humhalh nan tute pawh kha kan do mai thin a. Kumpinu (British) meuh erawh kan hneh ta lo a nih kha.

 

British lak ata India a indang a, kan hotute duhthlanna ni bawkin India ah kan bet zui a. Mahse India hian keini a mihringate aiin a rama hi a duh zawk a chu a ni mai thei.  Kum 1959 a Mautam a lo thlen leh chumi avanga tam a lo tlak khan Mizo mipuite tawrhna kha an bengkhawn lo hle a ni an ti a. Mi thenkhat ngaihdanah phei chuan, India khan Mizote hi thi ral vek mah ila pawi an ti lo niin an sawi hial thin.

 

India hnuaiah khan kan ram khan hmasawnna te pawh nei mahse, a mihringa te kan la ngelnghet lo hle a. Khawtlang nun pawh a la nghet lo a, sap nunzia ngaihsanna karah Mautam tam chuan min hrut a. India lah chuan kan politics leh khawtlang nun leh eizawnna kawngahte min chim thûk hret hret a. Aizawl khawpui bazar leh hmun laili tak takah Vai hovin sumdawnna an kalpui a, bu an khuar thuk tial tial a ni.

 

Khang lai khan khawpui nun leh thingtlang nun kha a danglam hret hret a. Khawpui mi leh thingtlang mi, mi hausa leh rethei kar pawh a zau hle hman tawh a. Thingtlang atanga khawpuia chakkhai la a zin thinte tan, khawpuiah thlenna a vangin harsatna an tawk nasa tawh hle a.  Tun hmaa mikhual induat hnam Mizote zingah mikhual inhuphurhna leh mikhualte tha um a, chhawr kha sawi tur a awm tan a ni.

 

Khang hun lai taka Mautam tam a lo thleng bawk si. India in min ngaihsak tawk si lo, sarkar inawpna kawngahte, sumdawnna kawngahte leh kawng tam takah Vai ho ten min zuam em em a. Kan ram leh hnam kha dinhmun derthawng takah a ding mek niin a hmuh theih a.  Chung chhan hrang hrang avang chuan Mizo hnam hmangaihtu leh humhim duhtu te kal zel chuan Mizoram chu India laka Zalenna an sual ta ti ila a dik awm e.

 

Mizoramin zalenna a sual chhung khan, hnam sipaite khan an nunna thâp tak meuhin, ram tan tiin an chhuak a. Ram tan mahni inlum leh chhungkhat laina, an thlakhlelh ngawih ngawihte an kalsan a ni. Chutiangin chhuak ve thei lo, mahse in lama theihtawp lo chhuahtu pawh thahnem tak an awm a.

 

Sawi hmaih hauh loh tur chu, Nu leh nulate pawh kha hnam movement ah khan telin, ramhnuaiah pawh hmeichhe tam tak an chhuak ve a ni. Nula te hian mipate chu lo pui bawmin, an thawmhnaw tette an thui a, a then chu damdawi lam hna, hliam leh damlo enkawltuah te an tang a. Thih huamin ram tan an fehchhuak a ni. Tin, ramhnuaia chhuak ve lo Nula te pawhin, hnam sipaite kha chaw an pe thin a. Bawng chaw pe tur angte, lo a feh tur angtein Chawfun nen chhuakin, hnam sipaite kha an lo pui ve thin a ni an ti.

 

Ram an buai tak tak kha chu, kan ram leh hnam tan khan a lungngaihthlak hle a. India sipai ten kan khawtlang hruaitute leh tlangval, pahote an dim lo em em a. Hnam sipai an kaphlum a. A lungchhiatthlakna tizualtu chu dan leh dun, mihring zalennain awmzia a nei lo kha a ni a. India sipai ten kan nulate leh nute an duh duhin an pawngsual a, vuivaina thlenna tur a awm lo a, India sorkarin a beng a chhi duh lo. Nula thenkhatte phei chu, an pate hmuh laite, nu te pawh an pasalte hmuh lai ten an pawngsual mai thin a ni awm e. A runthlakin a manganthlak viau ang le.

 

Khatiang taka kan tawrh mek lai a, Zalenna kan neih mai tak bawk si loah chuan, Mizo mipuite leh tualchhung lama Kohhran hrang hrangte, NGO te, Political Parties etc te khan REMNA siam mai an duh hle a. India leh MNF hotute pawh REMNA zawngin an in be zel a. Tichuan June ni 30,1986 khan Mizo mipuiten theihtawp chhuah a an nawrna vangte, Kohhran hrang hrang leh Pawl hrang hrang ten an nawrna vangte, Party hrang hrangin an ngenna vangte leh chhan hrang hrang vangtein INDIA leh MNF chuan INREMNA THUTHLUNG an ziak ta a nih kha. Kha REMNA THUTHLUNG ziah avanga Mizo mipuite hlimzia leh lawmzia kha, a hunlai hrechiang pha ve lote pawhin kan hre zui thei awm e.

 

MNF in India laka Zalenna a sual avang khan mimal leh hnam anga tawrhna tam tak pawh a awm ngei ang. Nunna chan hial pawh mi tam tak an awm a. Thichhawnga awm leh ramtui lei lova awm ta pawh an awm nual ngei ang tih a rin theih. Kha Zalenna sual chungchang te kha, tun hnuah Party politics avang tein sawi nepna tam tak a awm thin a. Kha Zalenna sual kha Mizo hnam hian hlawkna tam tak a neih phah bawk tih hi kan chhut fo a tha awm e.

 

Hnam sipai ten Zalenna an sual takah chuan min awp chak em emtu India pawhin min ngaihsak ta deuh tih a hriat a. Kum 1872 ah India chuan Mizoram chu UT ah min hlangkai nghal ta mai a. MNF leh India INREMNA thu angin 1987 February ni 20 khan State puitlingah min dah ta a ni. India hnuaia kan la awm hrih miau takah chuan State puitling nih kha a lo tha ve viau mai. Zalenna sual lovin INREMNA nei lo ila chuan State puitling kan la ni lo mai thei.

 

Zalenna sual hma lawka Aizawl khawpuia vai sumdawng inbengbel tan mekte kha, rambuai avang khan an let leh deuh vek hlawm niin an sawi. Mizoramah hnamdang sumdawng an awm tam loh phah hle a ni. Hengte ngawt pawh hi MNF movement hlawkna pakhat ah a ngaih theih awm e

 

Kha zalenna sual avang khan Mizo mipui ten impumkhatna kan neih that phah a. Aizawl khawpui mite chu Thingtlangah an tlanchhia a. Thingtlang mite an lo mikhual thin angin khawpui mite chu Thingtlangah mikhual an ni ve ta a. Mikhual dinhmun an hrefiah tawn a. Mizo nun ze mawi Mikhual chunga thatchhuah pawh a lo nung thar leh a. Thingtlang leh khawpui mite inkar khi pawh he rambuai boruak hian a rawn siam tha a ni. Chutiang bawkin khaw sawi khawm khan, khaw thenawm te inkarah inunauna tha tak a hring chhuak a ni.

 

Hnam sipai ten zalenna an sual khan, hmun hrang hrangah an kal kual a. Mizo hnam peng hrang hrangte zingah inunauna a hringchhuak a. Kan hnam bil tawng hmang uar hle thin kha, kan tawng intawm  Mizo tawng a lo lar phah bawk a, chuchuan inpawhna tha a siam bawkin a lang. He MNF movement hian Mizoram micheng Zofate zingah hnam hmangaihna a hring chhuak thar hle a, pi leh pute hun lai angin, mahni ram.leh hnam tana thih hial pawh huama inpumpekna rilru kha a rawn chhawm nung thar leh a ni.

 

Mizoram in REMNA kan neih theihna kawngah hian, mi tam tak chuan an awmna Party emaw Party a an pute emaw, tutute emaw chu tha thawh hnem bik leh chawimawi phu bik ni ten an sawi a. Kan pu khan chutin ti lo se, kan hotute khan chutin ti lo se chu remna a awm lo mai thei, te an ti a. Mahse, a hun lai leh tun hun hi a inang tawh lo tih kan hriat a tha. Khatih lai kha chuan mitinin INREMNA kha an duh hle a, chuvangin hruaitute tan pawh remna zawn kha an tihtur awmchhun a ngaih theih a ni.

 

REMNA leh MUANNA hlawhtling kan neih theihna chungchang ah hi chuan kan mi chhuan vawr *Prof JV Hluna sawi dan hi a dik berin ka hria.* Prof JV Hluna chuan, *“MNF leh India sorkar inremna chu khawvela inremna hlawhtling berte zinga mi a ni”* a ti a, *”Mizote hi India ram leh khawvel tan pawh entawntlak kan tling a ni”* a ti. *”Kum 20 chhung Mizoram buai chu mipuiin hrehawm an ti a, MI TININ REMNA AN DUH VANGIN INREMNA A AWM THEI TA  a, a lawmawm hle. REMNA PUITLING kan neih theih chhan pakhat chu MNF Rammu zawng zawngte kim taka an lo chhuah vang a ni”* a ti bawk.

 

He REMNA hi tute thawh rah bik vak pawh ni lovin, Mizo mipuite Remna leh Muanna kan duh ngawih ngawih vang a ni ber mai. Chuvangn he Remna Ni ah hian, tute mahin pumbilh bik tum lo ila. Kan zawn theuh ah Mizoram leh hnam pum tana beitute vek kan nih angin he REMNA NI pawh hian kan zavaiin min huap se, kan rilru leh chet zia pawhin REMNA thu keng zel teh se.

 

*He REMNA NI a ka rilrua lian berte erawh chu HNAM SIPAI mahni Nunna thâp a Mizoram leh hnam tana fehchhuakte kha an ni*. Eng party ah leh eng pawlah pawh awm ila, kan Hnam Sipaite khan Independence rawn hawn lo mahse, kan ram leh hnam tana an inpekna avang khan, kan Hnam Sipaite kha kan zah a, kan chawimawi an phu hle in ka hria.

 

_30th June 2017, 10:00 PM_

*BB300620171000PM*

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s