Phullen Lal Awksarala Khawnbawl Upate

(WhatsApp Phullen Group ah Pu Biakan Awksarala Upate hming pahnih sawiin, a dang lo thawh belh ru a ti a, tihian ka rawn phuah khawm ve ang e.)

Phullen hi Vanphunga khaw din Khandaih khua kal zel kha a ni a, Vanphunga hnuah a fapa Awksarala chu lalin a awm zui a. Phullen a Awksarala Khawnbawl Upate hming leh chanchin tlem, ka hriat theih ang angte chu hengte hi an ni-

  1. Neihruma – Khawchhiar
  2. Hnundailova
  3. Thangkhuma
  4. Dareka
  5. Zakhuma
  6. Hrangphunga
  7. Tuala
  8. Dolala / Thavapa

Pu NEIHRUMA hi chhakchhuak hnam niin, Pu Neihtawna pa a ni. Kristian hmasa niin, Khandaih Harhna hmasa April ni 8, 1906 ah khan harhna a chang ve a. Kha harhnaah khan tleirawlte niin Hla chang sawitu a ni a, hla pakhat te kha vawi 30 te an la nawn thin a ni. Khatih lai British awpna hnuaiah khan Khawchhiar ah atang a ni. A fapa Neihkhuma hi Phullen khua atanga Missionary chhuak hmasa ber a ni a, kum 1953 September ni 28 khan a chhuak

Pu HNUNDAILOVA hi Lal Awksarala khawnbawl upa a ni a. Kristian hmasa zing ami a ni a. kum 1920 khan Kohhran Upa atan nemngheh a ni. Pu Hnundailova hi Upa Zawmliana Phullen vengthar upa ni mek te, Pu Biakchhunga (L) (Upa Lalramthara PWC Charman hlui pa) te pa a ni. Pathian thu awih hmasa, Kristian tha tak chhungkua an ni a, a tu leh fate zingah pawh Pathian leh a Kohhran tana mi tangkai tak tak, Pastor leh Kohhran Upa an awm nual a ni.

Pu DAREKA hi a hming dik tak nia an sawi chu Darthuama a ni a. Innbuan chak, thu leh hla lama tui mi, pi leh pute thawnthu inhlan chhawn hre tak leh Serh leh sang ngai paeimawh mi a ni a. Apa Thangzika pawh kha Khandaih lal Vanphunga khawnbawl upa te zing a mi a ni. Puma Zai hla leh kaihlek hla te pawh a phuah ve niin an sawi. Hmanlaia lo atana an neih ngam loh Sih huai leh Zawng luro awmna hmun te pawh a thian thiam a, lo atan a nei thin. Hnang deh a thiam hle bawk niin an sawi.

Pu ZAKHUMA hi Upa Tawnkima, Pu K Thanhlira etc te pa a ni. Awksarala khawnbawl upa a ni a, Pu Zakhuma pa pawh kha Vanphunga Khawnbawl upa zing ami a ni. Zakhuma hi Khandaih khua a Kristian hmasate zing ami a ni. Kum 1914 a Awksarala hova Thirhluma kai zingah telin, Kristian tlemte tel zinga pakhat a ni. Heta an awm lai hian Kristian awmchhun te kha an pawimawh em em a. Hetah hian Biak In an sa ve a, Zawlbuk khuang kha Biak Inah an la lut a, hei hi Biak Ina khuang an lakluh hmasakna a nih hmel. Pu Zakhuma te hi mi tha chhung an ni a, Khandaih harhna a a bultanna Hnuneka Pawihte kha, mi harsa tak chhungkua atanga lo piang a nih avangin an hnenah awmin an dawmkanga, an In atangin nupui a nei nghe nghe.

Pu HRANGPHUNGA hi Pu Tlanhnûna (L) pa, Pu K Thlenga nu Pi Tlanthangi pa a ni. Tuna VC member Pu J.Remsiama pu a ni.  Awksarala khawnbawl upa, Kristian hmasa a ni a. Awksarala kianga Thirhlum kai kristian tlemte zing ami a ni. Thirhlum kai lai hian, Kristiante kha Thirhlum ah kai ve lovin Khandaih lamah an awm ta deuh vek kha a nia. Kum 1921 khan Kohhran Upa atan nemngheh a ni. Thirhlumah hian rei tak an awm lo va, khaw thar a nih bakah Kristian tam zawk Khandaih lamah an awm si a, Kristian pathum vel chauh an awm a. Chawlhni te an theihnghilh chang a awm thin a ni awm e. Mahse mak tak maiin harhna a rawn thleng a, Awksarala pawh he hmunah hian Kristianah a in pe a ni.

Pu TUALA hi Khawnbawl upa a nih bakah, Pasaltha a ni a. A hming hi Tualduma tiin an sawi bawk thin. Pu Vankima (Pu Biaktea pa) leh Pu Lalenga (Pu Biakchungnunga Pu Lalrammawia PWC te pa) te pa a ni.  Tum khat chu lalpa hoin an ramvak a, Pu Tuala’n Sakhi a kap a, a Sakhi kah chu an pum rawh ta a, chulai hmun chu Sakhi rawh kawn tiin an sawi ta thin a, tun thlengin Sakhirawhkawn hming hi a lo pu ta a ni.

Pu DOLALA hi Pu Thavapa pa a ni a. A lo upat deuh hnu chuan, lal Awksarala chuan pu Dolala aia a rorelna a tel turin Dolala fapa Pu Thavapa hi a sawm thin a. Naupang te ni chungin a tel ve thin. Tum.khat chu Sailo lal leh Sailo lal an in dawr naah, Serzawl lal Lalsakeia dawr turin lal Awksarala khan a tir vang vang a ni.  Lalnu Pi Lalhliapi (Awksarala nupui) a thih khan, a fate chuan khawnbawl Upa damchhun tiin Pu Thavapa hi Phullena a a awm Aizawlah an hruai thla nghe nghe. Pu Thavapa hi Pi Thaengi chhang chiah a ni a. A nupui Pi Thanliani nen khan an inrual khawp a; zankhata piang ve ve an ni.

A sei leh ta hle mai. Awksarala Khawnbawl upa dangte chanchin hi chu ka mi chhuan leh ngaihsan pahnih Pu Biaka (Ex Chairman PWC) leh Pu Vanthuama (Teacher, Thangthar Historian hlu) te rawn chhunzawm ve atan ka khek e.

Ziah dik loh ka neih chuan, khawngaihin min lo ngaidam ula, a dik zawk min hrilh dawn nia. Ka thulakna langsar zualte chu- Upa Khuangchhana, V.Vanthuampuia, Upa Dohmingthanga, Pu Thavapa chanchin (Vuina a mi), Pu K.Lalthlengliana, Pu L.Biakdanga etc

Buata Bawihtlung
Ni 16.4.2017 Easter Sunday 1:10 PM @ Tkt
Edited on 17.4.2017 Monday 1:15 AM @ tkt

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s