LALBAWNGA BAWIHTLUNG

Khandaih lal Vanphunga Sailo Khawnbawl upa min Lalbawnga chanchin hi tam tak hre thei tawh lo mah ila, kan hriat theih chinah pa fell eh fing tak, rorel thiam tak a ni tih a hriat a. A chanchin hi a ngaihnawm hle.

Lalbawnga hi chi leh kuang lamah chuan Bawihtlung hnam a ni a, Thangphunga Bawihtlung fapa a ni. Lalbawnga pa Thangphunga hi, Pasaltha huaisen Chalchima tupa a ni a. Chalchima fapa Dothuama fapa a ni. Tichuan Lalbawnga pa leh pu hriat theih chinte chu – Chalchima, Chalchima fapa Dothuama, Dothuama fapa Thangphunga te an ni.

Lalbawnga thlahtu hriattheih chin te:

  1. Chalchima
  2. Dothuama
  3. Thangphunga

Thangphunga hi Lalbawnga pa a ni a, Lalbawnga pian hun leh a pianna hmun hi hriat a ni chiah lova, Pawihbawiha Sailo fate Vanphunga Sailo te nen unau ang maia in en, inpawh tak an nih avang hian, Pawihbawiha Sailo khua atanga piang a nih a rinawm hle.

Lalbawnga te unau hi pathum an ni a, chung a unaute chu –

  1. Lalbawnga
  2. Hrangkunga
  3. Sabinga

Lalbawnga fapa chu Thanghrima a ni a, a tute chu Siamlianate, B.Ngurdawla, Lalthangliani, Lalhliapi, Lalrintluangi, Solfathangi, B.Ngurchhawna, Mangthanga, Thangdaii te an ni a. Heng a tute hian tu leh fa thahnem tak an nei ve leh tawh bawk. Tin Lalbawnga unaupa Hrangkunga fate chu Pawibawiha leh Vuaiate an ni a. Pawibawiha hi Pu B.Taial pa a ni a, Vuaia hi Pu PB Lalauva pa a ni. Sabinga hi Mizoram pum a thangchhuak ve a ni a. Indopui laia France ram kal zingah pawh a fel leh remhria, a hnathawh that avanga, Indopui hnu a France sorkarin Rs 850 a rawn pek zui leh ngat a ni a. A hnu a Sipai a luh dawn pawh a interview ve ngai lo, tling sa an tih, Naik kai pha ngat, Mizo Football Team Captain hmasa ber a ni. Vairama thi mah nise, a pualin Sorkar leh Assam Ruffle leh a chhung ten Khatla ah hian lung an phun a, tunthlengin a la ding a ni.

Lalbawnga hi pa fel leh fing tak, rorel thiam tak a ni tih a lanna chu Lal chhungkua ten an rin em emna hi a ni. Sailo lal chhungkua ten en hian unau ang maia inen an ni a. Lal ropui tak Vanphunga Sailo, Khandaih lal Khawnbawl upa min a ni. Lal rorelna kawngah a tangkaiin a thu lakna ber pakhat a ni a. Vanphunga Sailo chu a ropui em em a, a hausain ram a nei zau hle a, a hmei fate tih loh, a fate pawhin tlang hran an chang vek thei a ni.

Vanphunga Sailo hian Lalbawnga hi a ring em em a. A lalram chhung Mawmrang tlang chung Luangpawn hmunah chuan Bawk khawh turin Lalbawnga chu a tir a.  Lalbawnga chuan mi engemaw zat hruaiin kum 1909 khan Khandaih atangin Luangpawnah chuan kaiin khua a din ta a. Tichuan Lalbawnga chu Luangpawnah rei vak lo lalin, ro a rel a. Khang hun lai khan British in Mizoram hi a awp tawh a, lal te chu Sailo an ni deuh vek a, mipuite pawhin an la zah em em a ni.

Hetih lai hian Lalbawnga chuan lal nih chu nuam a ti vak lo a. A rorelna kawngahte chuan harsatna nei lem lo mahse, Sailo hnam a nih chiah loh avang chuan lal ho inhmuhkhawm nikhuaah, lal dangte chuan Sailo lalte ang tluk chuan an en tak tak thei lo tih chu a hrethiam ve vek a. Tichuan Vanphunga Sailo hnenah chuan a hmeifa Lalbuaia Sailo chu a aiah Luangpawna lal tir zawk turin a ngen ta a.

Vanphunga Sailo hian Lalbawnga dilna leh rawtna hi a uksak mai lo va. Rorel kawngah a fingin a fel em em tho bawk nen. Mahse, na deuh zawkin Vanphunga Sailo chu a kar leh ta a. Vanphunga Sailo hnenah chuan, “Hetianga ka dilna min tihhlawhtlin sak loh a, i fapa Lalbuaia sailo, tuna Vanbawnga a nu kianga awm mek chu Luangpawnah lala i rawn dah dawn lo a nih chuan, I unaupa Thangkama Sihfa lal chuan a khua a pem turin leh khawnbawl upa ni turin min sawm ve reng tho bawk a, ka pem zawk mai ang” a ti a.

Chuti taka Lalbawngan a ngen takah chuan Khandaih lal Vanphunga Sailo chuan, a fapa Lalbuaia Sailo chu kum 1912 khan Luangpawnah lal in a dah ta a. Tichuan Lalbawnga pawh chu Sihfa lama pem ta lovin Luangpawnah chuan a awm zui ta a. Lal te nen chuan inpawh takin an awm a, Khawnbal upa min niin lal rorelpui tu ber a ni zui ta a.

Lalbawnga hi an lal tan a tangkai em em a,  lal rorel dan leh ngaidan a dik tawk loh chang pawh a khap ngam tu ber a ni a. Tumkhat pawh an lal Lalbuaia hian, tlangval ho a hau hrep a, hmawlhin a vaw bawk a. Khatihlaia lal dinhmun kha a sang em a, lal thiltih chu sawisel thiang a ni lova, vuivaiah pawh lak a ni ngai lo.  Mahse Lalbawnga chuan, tlangval ho hriat lohah an lalpa chu hauvin a zilh ta a, “Hetianga kutte i thlak fo te chuan, khua leh tui kan nei thei nang le? Kutthlak hi chu ti tawh suh  khai” a ti a ni awm a. Lal pawh chuan dik a ti hle a ni awm e. Hetianga lal te zilhhau ngam khawp hian lal te nen an inpawh a, mite pawhin an zah em em a ni.

Source : Biang biakte

  • B Ngurchhawna S/o Thanghrima, Phullen
  • Solfathangi S/o Thanghrima, Tuikhuahtlang
  • Nundanga S/o Hranga, Chhinga veng
  • Ngurthankima Sailo S/o Lalsavunga Sailo, Mission veng
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s