VANSANGPUIIN BAPTISMA A CHANG VE TA.

Ka fanu Vansangpuii chuan Kohhran Serh leh sang pawimawh tak mai ‘Baptisma’ chu Ni 16.08.2015 Sunday khan a chang ve ta, kan va lawm tak em.!  He Baptisma pawimawh tak hi Mission Veng Pastor Bial vawng mektu Pastor Lalrinmawia chuan Pathianni chawhnu inkhawm, Tuikhuahtlang Presbyterian Kohhran Biak In ah a chan tir a ni.

Vansangpuii Baptisma

Vansangpuii Baptisma

Baptisma chungchang hi han sawi zau ve lawk ila. Baptisma tih thumal hi Kohhran tinah a lar hle a, Grik tawng ‘Baptizo” atanga lo piang a ni awm e.  Kohhran hrang hrangah ngaihdan hrang a awm avangin Baptis kan hrilhfiah dan pawh a inang lo hlawm. Chutihrual chuan, Baptisma hi Kohhran tin ten an ngaipawimawh em em vek ti ila a dik awm e. A thenin an thlawr a, a then an hnimphum a, a thenin an theh pawh a ni mai thei, a pawimawh ber chu Pathian nena inzawmna kan neih leh neih loh zawk a ni.

Hmasang Thuthlunghlui hunlai atang tawhin Pathian leh a mite zinga telve tih lanna tur hian serh leh sang pawimawh tak an lo chin thin a awm a, chu chu Serhtan hi a ni awm e. Lal Isua lo pian hnuah erawh chuan Serh tan tawh lovin, Baptisma an chang thin thung. Tirhkoh Paula khan  baptisma hi thlarau lam serhtan a ni e tiin a sawi zui nghe nghe. Baptisma hi Kohhran kalphung duangtu ropui John Calvin-a pawh khan a ngaipawimawh hle a, Pathian fate kan nih theih nana Kohhran chhunga kan luhna entirtu pakhat a ni tiin a sawi thin an ti.

Kaini zirbingna nei ve lo chuan ril tak kan hre ve lo a, mi sawi kan hriat hi a ni mai awm e. Engpawhchunise, keini Presbyterian Kohhran te hman dan tlanglawn tak ka hriat chu Tuia thlawr hi a ni.  Baptisma hi mwlmang taka tuia thlawr a ni satliah ngawt lo va, Pa leh Fapa leh Thlarau Thianghlim hming ngeiin Baptis (Tuia thlawr) a ni thin a, urhsun taka tih ngei ngei ngai chi a ni. Hei hian kan Baptis mek – Nausen emaw puitling emaw chu Pathian leh a Kohhran zingah lawmluh a ni ta tih a entir ber niin a lang a. Baptisma changtu chuan Pathian a ring a, nun thara nung turin Pathian leh a Kohhran hnenah a in pe ta tih entirna ang pawhin a ngaih theih awm e, chuvang chuan a pawimawh em em a ni

Vansangpuii leh a thiante pahnih Baptisma chan inkhawm hi Pastor Lalrinmawia hian a kaihruaia, amah pui turin Kohhran Secretary Upa Vanengmawia (Member, OM Synod) a sawm bawk a. Kohhran Secretary chuan min ko chhuak a, nausen Baptis tur pathum leh an nu leh pa te chu Maicham hmaah kan ding tlar a.

Nausen Baptisma chang tur zingah hian Vansangpuii hi a hmasa ber a. Baptisma chantir hma hian Pastor chuan, Vansangpuii hi Pathian duh dan a, Thlarau thianghlim awmpuina a Pathian leh a Kohhran hnena hruai tlat zel kan intiam theih leh theih loh Nu leh Pa te chu min zawt a, kan tiam thu in kan chhang a. Sangpuii nu hi a ‘aw’ a chhuak ri ring lo hle a, kei a hnunga ding chuan “Tiam e”  tiin ring deuh hretin ka sawi nawn leh a, tichuan vawi hnih lai ka tiam bik a. Ka rilruin Sangpuii nu khan sawi mai tur hrelo haih chham khan a tiam loh palh ka hlauh em vang a ni, mahse a lo tiam ngei a lo ni tih inkhawm banah a sawi.

Baptisma tluang taka kan chan hnuah, Pastor Lalrinmawia chuan Bible chang chhiarin tawngtainate a hmang a, Pathian Thuchah a sawi zui nghal a. Chhungkaw pawimawhzia te, nausen te puitlinna kawnga kaihhruai tura Nu leh pa, puitling zawkte pawimawh dante a sawi a. Nundan tha leh mawi te hi sawi vak vak aimaha a taka nunpui a, chetzia hmang hmanga lantir hian naupangte a kaihhruai theih zia a sawi chuan rilru a hneh tak zet a. Nausen te hi Baptisma an chan tawh chuan, dan an zawhkim a, Kohhran dan chhunga lawmluh an nih hma chuan, thu tiam laksaktu Nu leh pa ten mawhphurhna sang tak kan nei nia a hriat thu a sawi chuan ngaihtuah a ti thui hle a, mawhphurhna sang tak kan neih zia rilruin a hre fiah hle.

Pathian kaihhruaina zarah Vansangpuii pawhin kawng dik a zawh a, Isua hnungzui a, Pathian leh a Kohhran tana mi tangkai ni tura kahhruai thei zel turin a Nu leh pa, a chhungkhat lainate zawng zawng hian Thlarau Thianghlim awmpuina kan ngai a ni tih kan hre thar leh a, chu chu kan beisei a, kan dil mawlh mawlh a ni.

Mihring tak pawh a ka mi ngaihsan, Pastor zingah pawh ka mi ngaihsan leh ngainat ve em em (amah phei chuan min hre chiang chiah lem lo ang) in Vansangpuiin Baptisma a chan tir hian ka lawm a ti zual hle a. Amah pui tu kan Kohhran Secretary, hi Kohhran Upa zingah pawh fel ka tih em em mai Upa Vanengmawia a lo ni leh zel te kha ka lawmna tizualtu a ni. Inkhawm hun hmandan engkim mai kha Pathian remruat a ni a, a fel fai tak zet a ni.

Kohhran mite nuna thil pawimawh tak Baptisma chu zawh a nit a a, thaw a veng huai mai. Chutih rualin Nu leh Pa ten mawhphurhna nasa tak kan nei zui ta a ni tih hi Thlarau Thianghlimin min hriat nawn tir fo kan ngai a, kan beisei bawk. Nu leh pa ten, kan intiam anga Pathian hnena Vansangpuii hi kan hruaithlen ngei theihnan Lalpa Pathian chuan min awmpui zel mawlh rawh se. AMEN

1 Kor 12:12-13, Rom 6: 3-7, Kol 2:11-12,  (Rom 6:3-4, Mk 1:4, 1 Kor 6:11, Eph.5:25-27), Rom 4:11, Gal 2:11-12, Kol 2:11, Tirh. 16:15; 33:1, 1 Kor 1:16.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s