LEI A MIN LEH TA

(Ni 1 August, 2010 a ka blog a ka dah tawh hi, a thu tlem tidanglamin hetah hian kan dah ang e)
 – Buata Bawihtlung)

Leimin Aizawl Laipuitlang

Pic: Aizawl Laipuitlang Leimin

Mizoramin furpui kan thleng leh dawn ta. Kan hriat fo thin leh kan lo tawn fo tawh thin bawk – Leimin, Leimin in In a hnawl, chumi khami chu a thi, tih te chuan a ngai te bawkin kan chanchin thar a luah leh ta mek e… a pawi thin hle mai.

        Khawnge ‘Mitigation & Management of Hydro-Meteorological Disasters’ ah Certificate ka nei ve si a. Miten In leh lo bakah, nunna hial an chan fo mai si a, certificate lo kawl ve reng si chuan, tihtheih tlem hle mahse, a rûka thiam loh lo inchan ve mai awl tak a nia.! chuvangin ka rilru a thil awm tlêm kan phawrh ve ang e.

        Ruahtui avanga harsatna ah hian khawvel khawihmun pawh mai hi fihlim leh him tluantling a awm bik lo, kei ni ang ram rethei te hian hmanrua leh sum leh pai te kan neih that tawkloh avang hian heng chhiatrupna lakah hian kan derthawng hlei hlei a, mi ramin nasa vak lo a an tawrh theih pawh kha kei ni chuan nasa takin kan chhiatpui thei a ni. Tute hrilhlawkna leh inti hre deuh te lo sawi lawk ve fo thin, ‘Laipuitlangte hi a la min vek dawn a, Chandmari te pawh i a la inthenphawk dawn’ an tih te hi tak tak niin, lo thleng ta se chuan kan buai ve viau ang le. Mahse chung em em chu chunglam Pathian chauhin a hria.

        Kan ram hi tlangram tih takah, tlangpang kham ko awih tak tak te, ruam thuk tak tak te, hmun chheng che ve tak tak ten min hual vel a, malsawm ruahtui tha tak kan dawng reng bawk a, chutihlai chuan kan ram hian chhiatna leh harsatna then khat – Thli tleh, Ruah nasa taka sur, Rial nasa taka tla, Leimin, Tuilian etc. (Hydro meteorological disasters) te hi kan tawk ve zauh zauh bawk. He khawvela kan awm chhung chuan kan la tawng zel bawk ang. Mahse heng chhiatna thenkhat – Leimin, Sabereka khuangkaih ang chi tam tak hi chu keimahni siam chawp te pawh a ni ve bawk. 

        Han sawi belh zel ila, Rangvamual (Airport kawng) a leimin thinte, Ramhlun South kawngko leitawlh rupte leh hmun dang danga leitawlhte hi a hnuailam kan laih hek nasat lutuk vang emaw Tuihawk luanna kan neih mumal tawk loh vang emaw a nih ngei hmel tlat a ni. Thenkhate hi chu duhdah taka bawlhhlawh kan paih rei tak lo inchhekkhawm tawh, fur ruahtui leh kan tuichhe paihna mumal lo takin a hnuailam a tih hnip tak avanga lo tawlh ta te a ni a. Heng bakah hian kan duham luat tuk avanga khuavang ramri kham tuihawk luan kawr te kan sawn danglam a, kan enkawl mumal leh si loh avanga Tuihawk luanngaihna hreloin a rem remah a luang darh a, chu chuan leimin a siam ta thin niin a lang bawk.  Chuvangin chhiatrupna kan tih tam tak hi chu pumpelh vek theih ni lo mahse a tihtlem dan chu a awm chiang a ni. 

        Thlir dan danga thlir chuan, Pathianin kan awmna tur atana tha tak awihpangah min dah a, kan thli leh tuihawk te pawh buaipui vak ngailovin, amahin a luang bo zung zung thin a. Kan ram te ang, rorelna leh inkaihhruaina la mumal lo tak, dan leh dun te pawh a nihna anga la lek kawh hleih theih lohna, Insakdan leh luikawr luandan te, ram inrelbawlna engkim mai a la hnufual ve tak, Muninicipal Council nei ve tantir chauh tan chuan hetia kan buaipui ve vak ngailo a kan tuihawkte an luangbo zung zung hi chu siamtu Pathian hnenah hian lawmthu sawi kan ba hialin ka hria. Chuti nilo a, phai ram hmun zawlah te awm ila chu, kan thli leh bawlhhlawh avangte hian hri thalo pui pui kan vei tawh mai thei a sin. 

        Engpawhnise, tih ve tur kan nei. He hmun a min awmtir tu Pathian hian chuti ngawta tlawngawl a kan awm chu a phal bik lo a ni mahna! kan ramah heti taka Leimin leh Tuihawk kan buaipui tak ni. Kan Tuihawk te hi mumal deuh zawkin luan bo tir thin ila, kan bawlhhlawh leh tawphnawkte tuihawk luankawr a paih mai lovin, a paihna tur takah paih thei zel ila. Kan In leh a vela atanga tui leh bawlhhlawh lo awm, dithlifarfem leh tuichhe paih te reng reng hi mumal deuh zawk a paih theih nise, kan ram chin a pelh tawh mai avanga duhtawk mai lovin, kawmthang emaw thenawm emaw te ram pawh ni se, a him chin thlenga a luan theih nan mumal taka enzui a, a luankawr te pawh siam zel ni thei a tha hle mai. 

        Kan neih zawng zawng sengin In tha tak tak kan sa a, a chhunglam mam tak leh fai tak ni si a, kan tuichhe paih leh kan thli, tawphnawk te kan In bul velah ngaihsak hlawh lemlo a an awm vel mai mai thin hi chu a pawi hle a, chu chuan kan In chu hmun himlo takah a siam thei a ni tih pawh kan hriat tel a tul ta. Kan tuichhe paih leh dithlifarfem te a luan mumal thin loh avangin kan.inbul leihnuaiahte lutin, kan leilung thawl tak kha a zuk chiah ta a, leichhung lung karah te a lut a, Leichhunga lungpher chungah te tui chu a zuk tai darh a, lei inchar tha lai chu a zuk ti chata tichuan leimin a lo siam thin a. 

        Chutiang bawk chuan khawimaw laia kan bawlhhlawh tlingkhawm te kha fur ruahtui hawkin a rawn chiah ta a, vawileh khatah leimin ang maiin a lo tawlh thin a ni. Heng te avang hian kan fimkhur hle a angai a, kawmthlang lam a min chuan, a chhak lam pawh kan him reng thei bik si lo. Inchung atana Rangva hmang te paw’n inchung ruahtui chu kan khawl duh lo a nih pawhin, a awm ang anga far tir mai lovin Tuidawn (gutter) mumal taka siam a, a paihna tur hmun him lam thlenga chu tui chu kan hruai a pawimawh hle.

        He kan ramah hian kan la awm kumkhua dawn a, eng ang harsatna leh chhiatrupna pawh lo thleng se kan lo sepui tawrh tlawk tlawk bik tur chu a ni lo. Engtin nge kan lo hmachhawn ang? A pumpelh dan a awm em? A pumpelh theihloh pawhin, a tih nep deuh dan a awm em? Chu chhiatrupna lo thlen hma chuan eng angin nge kan inhmakhua ve dawn? tih te hi Sorkar leh khawtlang hruaitu, chhungtin leh mimal tin ten kan ngaihtuah a hun ta.. 

        Chuti lo a, chung Pathian van malsawm Ruahtui chhiatpui fo ram leh hnam kan nih chuan, malsawmna petu hian Malsawm ruah a rawn sur tir duh tawh lo mai palh ang e…!

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s