LIRNGHING (EARTHQUAKE)

Tunkar 20.11.2014 zanlaia 11:40 PM vel a Lirnghingin Mizoram min sawi ve avang khan tunlai chu titinaah Lirnghing lam a tam hle a, kan sawi chhunzawm ve ang e.

Hriat theih chinah Lirnghing thlengtawh zinga na ber chu Chilean Earthquake, ni 22.5.1960 a thleng 9.5 Magnitude lai a na kha a ni a. Lirnghing rei ber chu kum 1964 a Alaska a nghing, minutes 5 chhung nghing kha a ni. 

Engnge Lirnghing chu? engvanga lo awm nge?: 
Lirnghing hi chhan hrang hrang vangin a awm thei a, Tlangkang, Tuikhawhthla nasa tak, Vur tawlh/Lei min, Nuclear/Atomic explosion, Leihnuai Oil & Gas lakchhuah vangtein a awm thei a, chu chu “Non Tectonic Earthquake” an ti a, a thawkna lutuk ngai lem lo.

Tunkar ni 20.11.14 zana Lirnghing ang chi, Leichhungril thuk taka leilung insiamremna leh insingsakna avanga lo awm ang kha “Techtonic Earthquake” an ti a, a nghing nasa theiin, a nghawng pawh a nasa thei hle a, Lirnghing kan hriat ho hi hetiang chi hi an ni deuh ber. 

Mithiamte sawi dan chuan kan awmna Lei hi a chhungrilah hian hlawm lian deuh deuh (Plate an tih mai) in a awm a, Indian Sub Continent (Indian Plate) te, Asian Plate, Africa, Europe etc te an ni a. Chu’ng Plate lianpui pui hnuai 100-300/500kms vela thuk Asthenosphere an tih (Mantle chunglam) hi sakhal lovin, chirhdiak ang hian a hnang banthluak a. Chu chirhdiak insiamrem leh fawn vel chuan a chunga Khawmualpui Plate te chu a tiche ta thin a, chutia khawmualpui Plate lianpui te a chet avang chuan Lirnghing a lo awm ta tha tin a ni. (Hei hi Mizo pi leh pu ten, Lei hi Satel lianpui chungah a awm a, Satel a chet chuan Lirnghing a lo awm an tih nen a inzul hle. Kan pi leh pute khan hriat mawlmang takin ril tak siin hriatna an nei ve tlat.)

Lirnghing tur hi a hriat lawk theih em?:
Khawvel thiamna tunlai ber ber hmang pawh hian Lirnghing tur leh a thawh nat dan turte, lo pumpelh dan turte hi sawi lawk theih a la ni lo. 

Nungchate leh Lirnghing!:
Mak ve deuh erawh chu, ramsa, ranvulh, nungchate hian hriat lawkna an nei ningeiin a lang tlat a. Lirnghing lo thlen hma emaw alo thlen lai emaw hian nungchate hi mak tak takin an awm thin a, an hram vak emaw an phi riai emaw fo thin. Mahse, nungcha khawsak danglam nazawng kha Lirnghing tur hrilhlawktu a ni bawk si lo. Nungchate nen hian inhrilh chhawng thei ila chuan, Lirnghing hriat lawkdan pawh a awm mahna.

Lirnghing hian thlen zinna leh thlen duhna hmun bik a nei: 
Lirnghing lo thlen tawh thin dan atanga zirin, Lirnghiang hian thlen zinna lai bik leh thlen duhna lai bik a nei tih a chiang a. 

Khawvel mithiam rual kalkhawmin Lirnghing lo thlen tawh dan atangte, leilung awm dan atang tein khawvel hi hlawm (Seismic Zone) hrang hrangah an then a. He Lirnghing Zone then dan hi a dik thei ang ber turin vawi 6 zet ennawn a siam that a ni tawh a. Hetia siamthat apiang hian Mizoram hi a hlauhawm ber lai, Zone -V ah min la dah ziah a ni. Zone V ah hian Magnitude 8 leh a aia sang pawhin a nghing thei a ngaih a ni.

Lirnghing Natzawng: 
Lirnghing tehna langsar ber chu Richter Scale (RS)a ni a 1-9 RS thleng a awm a. He tehna ah hian 0.1 lek pawh a nat zawng a inthlau thei hle. RS 6.33 (Magnitude) chu Hirosima a Atom Bomb an thlak ang vel kha a ni. 

Lirnghing Lo Thlen dan tlangpui:
Lirnghing hi a thleng ngun hle a, a lian tham deuh chu kumtin vawi 15-20 vel nghing ang a ngaih a ni a, mi 1000 vel thi ziah ang a chhut a ni. Mahse lirnghing tam zawk chu kan hriat theih loh khawp a nghing na lo a ni.

Lirnghing lian thamah chuan a lo thlen hmain a hmahruai (fore shock) a lo thleng hmasa tlangpui a, hei hi hrethiam thei ila chuan Lirnghing lian tham lo thleng tur lakah kan him deuh tur, mahse a hmahruai (fore shock) a nih leh nih loh a hriat lawk theih si loh, hriat a nih meuh chuan a lo tlai tawh thin. 

Hetiang deuh hian Lirnghing lian tham thlen hnuah hian a Hnukhawi (after shock) a lo thleng leh deuh ziah bawk, chu chu a nasa lo deuh tlangpui. A Hnukhawi hi Lirnghing vanga leilung che insiam rem leh vang a ni a, vawi tam tak a thleng thei a ni. Kum 2008 May thla a Sihuan, China Lirnghing mi 90000 vel zet thihnaah khan ni khat chhungin after shock vawi 166 lai a nghing a ni.

Mizoram leh Lirnghing : Lei Sakhat ah nge Lei thawlah a thawh nat ?:
Class XII kan zirlaia kan Physics teacher in, “Mizoram chu a lei a thawl a, Lirnghing a thawk na thei lovang, Lei thawl karah thahrui kha a kalral nasa dawn si a” a tih kha ka la hre reng thin. Mahse hei hi a lo dik hauh lo mai. US Geological Society leh Mithiam dangte hmuh dan chuan a Epicentre hi Lei thawlna hmunah a nih ngat chuan, Lei sakhatna hmunah aiin a let 6 zetin a thawk na zawk dawn an ti ve thung. Mizoram hi a leilung a thawl a, Lirnghing thawh nat theihna tur chi a ni dawn tihna a ni.

Mithiamte leh Pathian atanga hria intite sawi dan atangtein kan ram dinhmun chu kan hria a, engtikah emaw chuan Lirnghing na tak hi kan la tawng thei reng tih chu a hriat a. Inti thlarau changsang tak leh inti hre ril taka han sawi uar vak chi pawh a ni chuang lo. Kan thenawm.lawk Douki, Shillong, Meghalaya ah kum 1897 June ni 12 khan 8.5 magnitude laia nain a nghing tawh a, lungtum te pawh a invawrh chhuak hial a. (8.5Mag hi a hnua pek a ni) a, Jan ni 10, 1950 khan Shillong ah na takin a nghing bawk. NE ah hian thla khat chhungin vawi 50 vel a nghing thin niin an sawi. Mizoram hi kan vannei a, lirnghing vanga chhiatna nasa tak kan la tawk hrih lo hlauh. 

Lirnghing leh a kaihhnawih:
Lirnghing hian amah ngau ngau chuan min tina lo ti ila a dik awm e. Lirnghing nghawng, In chim, lungrem chim, Darthlalang keh, bungraw delh te hian mihringte thihna a thlen ber zawk. 

Lirnghing a lo thlenin chiai mai lo ila, In kan sak dawnin mithiam rawn hmasa thin ila. In chhungah bungraw rit reng reng min delh theih turin a kangah dah lo ila. Hun tam tak kan hmanna zan mutna khum bulah Steel Almirah leh thil dang min delhna thei kan dah pawhin, a tluk palah min delh thei lo tur zawngin hung ila, lirnghing a lo thawh chuan darthlalang keh per te hi a hlauhawm thei hle tih hriat a tha. 

Tlangkawmna:
Engpawhnise, Thlipui leh tuifawn hau reh a, Luipui luanglai dangchat thei, kan awmna Lei lung siamtu leh Lirnghing chunga thuneitu Pathian kan nei tih hria ila, Mizoram hi Lirnghing hlauhawmna leh na taka thlen theihna hmun a ni chung pawh a, tun thlenga Lirnghing avanga chhiatna nasa leh thihna em kan la tawng lo hi Pathian min venna vang a ni ngei ang. 

“Pathian chu kan inhumhimna leh kan chakna. Mangan laia tanpui vartu hnai reng a ni. chuvangin leilung hi lo danglamin, Tlangte hi tuifinriat chhungah daih insawn mah sela kan hlau lo vang; a Tuite chu ri hum humin phul bulh bulh mah sela, a fawn nasat avangin tlangte hi nghing dur dur mah sela, kan hlau chuang hek lo vang.” (Sam 46:1-3) 

Buata Bawihtlung 23.11.2014, 12:05 AM, @ TKT

Advertisements

3 thoughts on “LIRNGHING (EARTHQUAKE)

  1. Lirnghing hi mizoram ah ana ta hle mai a,ka hriat duh ang statistic mumal ka la hmu thei meuh lo a,atlangpui thu in mizoram bik ah hian ritcher scale engzat vel ana in nge a nghin thin tih leh arei lam pang te hriat ka van duh ve le aw

    Like

  2. Lirnghing hi mizoram ah ana ta hle mai a,ka hriat duh ang statistic mumal ka la hmu thei meuh lo a,atlangpui thu in mizoram bik ah hian ritcher scale engzat vel ana in nge a nghin thin tih leh arei lam pang te hriat ka van duh ve le aw

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s